കേരള ക്രിക്കറ്റ് ലീഗ് രണ്ടാം സീസണിൽ സഞ്ജു സാംസൺ കൊച്ചി ബ്ലൂ ടൈഗേഴ്സിനായി കളിക്കും. വിഷ്ണു വിനോദിനെ കൊല്ലം സെയ്ലേഴ്സും സ്വന്തമാക്കി.
തിരുവനന്തപുരം: കേരള ക്രിക്കറ്റ് ലീഗ് രണ്ടാം സീസണില് ഇന്ത്യന് ടി20 വിക്കറ്റ് കീപ്പര് സഞ്ജു സാംസണ് കൊച്ചി ബ്ലൂ ടൈഗേഴ്സിന് വേണ്ടി കളിക്കും. കെസിഎല്ലിലെ റെക്കോഡ് തുകയായ 26.80 ലക്ഷത്തിനാണ് കൊച്ചി സഞ്ജുവിനെ സ്വന്തമാക്കിയത്. ലീഗില് പങ്കെടുക്കുന്ന എല്ലാ ടീമുകളും സഞ്ജുവിന് വേണ്ടി താല്പര്യം പ്രകടിപ്പിച്ചു. എന്നാല് കൊച്ചിയുടെ വലിയ തുകയ്ക്ക് മുന്നില് ശേഷിക്കുന്ന ടീമുകള് മുട്ടുമടക്കുകയായിരുന്നു. മൂന്ന് ലക്ഷമായിരുന്നു സഞ്ജുവിന്റെ അടിസ്ഥാന വില. സഞ്ജുവിന്റെ ആദ്യ കെസിഎല് സീസണാണിത്.
അഞ്ച് ലക്ഷത്തില് നിന്നാണ് സഞ്ജുവിനുള്ള ലേലം വിളി തുടങ്ങിയത്. എന്നാല് തിരുവനന്തപുരം റോയല്സ് 20 ലക്ഷം വരെയാക്കി ഉയര്ത്തി. എങ്കിലും തൃശൂര് ടൈറ്റന്സ് വിട്ടുകൊടുത്തില്ല. 25 ലക്ഷം ഓഫര് ചെയ്ത് താല്പര്യം പ്രകടിപ്പിച്ചു. എന്നാല് ബ്ലൂ ടൈഗേഴ്സ് 26.80 രൂപയ്ക്ക് സഞ്ജുവിനെ ടീമിലെത്തിച്ചു. ലീഗ് ചരിത്രത്തിലെ ഏറ്റവും വലിയ തുകയാണിത്. ആദ്യ കെസിഎല്ലില് സഞ്ജു കളിച്ചിരുന്നില്ല. സഞ്ജുവിന്റെ വരവ് ലീഗിന് ഉണര്വാകുമെന്നുള്ള കാര്യത്തില് സംശയമില്ല. അതേസമയം, വിഷ്ണു വിനോദിനെ 12.8 ലക്ഷത്തിന് ഏരീസ് കൊല്ലം സെയ്ലേഴ്സ് സ്വന്തമാക്കി.
ജലജ് സക്സേനയെ 12.40 ലക്ഷത്തിന് ആലപ്പി റിപ്പിള്സ് സ്വന്തമാക്കി. പേസര് ബേസില് തമ്പി തിരുവനന്തപുരം റോയല്സിന് വേണ്ടി കളിക്കും. 8.4 ലക്ഷത്തിലാണ് ബേസില് തിരുവനന്തപുരത്തെത്തിയത്. ഷോണ് റോജര് തൃശൂര് ടൈറ്റന്സിന് വേണ്ടി കളിക്കും. 4.40 ലക്ഷത്തിലാണ് ഷോണിനെ ടൈറ്റന്സ് സ്വന്തമാക്കിയത്. സിജോമോന് ജോസഫും തൃശൂരിലെത്തി 5.20 ലക്ഷമാണ് താരത്തിനായി മുടക്കിയത്. വിനൂപ് മനോഹരനെ മൂന്ന് ലക്ഷത്തിന് കൊച്ചി സ്വന്തമാക്കി. എം എസ് അഖിലിനെ 8.40 ലക്ഷം മടക്കി കൊല്ലം ടീമിലെത്തിച്ചു. അഭിജിത് പ്രവീണ് 4.20 ലക്ഷത്തിന് തിരുവനന്തപുരം റോയല്സിലെത്തി.
എ, ബി, സി കാറ്റഗറികളിലായി 170 താരങ്ങളെയാണ് ലേലത്തിനായി ലിസ്റ്റ് ചെയ്തിട്ടുള്ളത്. ഇതില് 15 താരങ്ങളെ വിവിധ ഫ്രാഞ്ചൈസികള് നിലനിര്ത്തിയിട്ടുണ്ട്. ശേഷിക്കുന്ന 155 താരങ്ങള്ക്കായാണ് ശനിയാഴ്ചത്തെ ലേലം. ബിസിസിഐ ഫസ്റ്റ് ക്ലാസ്, ലിസ്റ്റ് എ, ഐപിഎല് എന്നിവയില് കളിച്ചിട്ടുളള താരങ്ങളെയാണ് എ കാറ്റഗറിയില് ഉള്പ്പെടുത്തിയിട്ടുള്ളത്. മൂന്ന് ലക്ഷം രൂപയാണ് ഇവരുടെ അടിസ്ഥാന തുക. അണ്ടര് 19, അണ്ടര് 23 വിഭാഗങ്ങളില് കളിച്ച ബി കാറ്റഗറിയിലെ താരങ്ങള്ക്ക് ഒരു ലക്ഷവും ജില്ലാ, സോണല്, കെസിഎ ടൂര്ണമെന്റുകളില് കളിച്ച സി കാറ്റഗറിയിലെ അംഗങ്ങള്ക്ക് 75000വുമാണ് അടിസ്ഥാന തുക.
