ഇംഗ്ലണ്ടിനെതിരായ ഏകദിന മത്സരത്തിൽ 430 റൺസ് വിജയലക്ഷ്യം മറികടന്ന ശ്രീലങ്കൻ ടീമിനെ പ്രശംസിച്ച് മുഹമ്മദ് അസ്ഹറുദ്ദീൻ. ഹാരി ബ്രൂക്കിന്റെ ഇരട്ട സെഞ്ചുറിയെ അഭിനന്ദിച്ച അദ്ദേഹം ടെസ്റ്റ് ക്രിക്കറ്റിനെ പ്രോത്സാഹിപ്പിക്കണമെന്നും ഓർമ്മിപ്പിച്ചു. പവൻ രത്‌നായകെ, അവിഷ്‌ക ഫെർണാണ്ടോ, ദാസുന്‍ ഷാനക എന്നിവരുടെ ബാറ്റിംഗാണ് ശ്രീലങ്കയ്ക്ക് ചരിത്ര ജയം സമ്മാനിച്ചത്.
കറാച്ചി: ഇംഗ്ലണ്ടിനെതിരായ ഏകദിന മത്സരത്തില്‍ 430 റണ്‍സിന്റെ കൂറ്റന്‍ വിജയലക്ഷ്യം മറികടന്ന ശ്രീലങ്കന്‍ ക്രിക്കറ്റ് ടീമിനെ പ്രശംസിച്ച് മുന്‍ ഇന്ത്യന്‍ ക്യാപ്റ്റനും തെലങ്കാന കാബിനറ്റ് മന്ത്രിയുമായ മുഹമ്മദ് അസ്ഹറുദ്ദീന്‍. ആധുനിക ക്രിക്കറ്റില്‍ 400 റണ്‍സിന് മുകളിലുള്ള വിജയലക്ഷ്യങ്ങള്‍ ചേസ് ചെയ്ത് ജയിക്കുക എന്നത് തികച്ചും അവിശ്വസനീയമാണ് എന്ന് അദ്ദേഹം അഭിപ്രായപ്പെട്ടു. ഇതോടൊപ്പം ഇംഗ്ലണ്ട് താരം ഹാരി ബ്രൂക്കിന്റെ റെക്കോര്‍ഡ് ഇരട്ട സെഞ്ചുറിയെ അഭിനന്ദിച്ച അസ്ഹറുദ്ദീന്‍, ടെസ്റ്റ് ക്രിക്കറ്റിനെ പ്രോത്സാഹിപ്പിക്കേണ്ടതിന്റെ ആവശ്യകതയും ഓര്‍മ്മിപ്പിച്ചു.
ഇംഗ്ലണ്ട് കൂറ്റന്‍ സ്‌കോര്‍ പടുത്തുയര്‍ത്തിയിട്ടും പൊരുതാനുള്ള മനോഭാവം ഉപേക്ഷിക്കാതിരുന്ന ശ്രീലങ്കയുടെ നിശ്ചയദാര്‍ഢ്യം അഭിനന്ദനാര്‍ഹമാണെന്ന് അസ്ഹറുദ്ദീന്‍ പറഞ്ഞു. ''400 റണ്‍സ് എന്നത് എന്നെ സംബന്ധിച്ചിടത്തോളം അവിശ്വസനീയമാണ്, എന്നാല്‍ ഇന്നത്തെ ക്രിക്കറ്റ് അത്തരത്തിലേക്ക് മാറി കഴിഞ്ഞു. ഞങ്ങള്‍ക്കും ജയിക്കാന്‍ സാധിക്കും, ഇത്രയും വലിയ സ്‌കോര്‍ പടുത്തുയര്‍ത്താന്‍ കഴിയുമെന്ന് പ്രതീക്ഷ കാത്തുസൂക്ഷിച്ച ശ്രീലങ്കന്‍ ടീമിന് എന്റെ അഭിനന്ദനങ്ങള്‍.'' അസ്ഹറുദ്ദീന്‍ പറഞ്ഞു.
ഏകദിന ക്രിക്കറ്റില്‍ 400ലധികം റണ്‍സ് ചേസ് ചെയ്ത് ജയിക്കുന്നത് അപൂര്‍വ്വമാണെന്നും, 2006-ല്‍ ഓസ്‌ട്രേലിയയ്ക്കെതിരെ ദക്ഷിണാഫ്രിക്ക നടത്തിയ ചരിത്രപരമായ ചേസിംഗിന് ശേഷമാണ് ഇത്തരമൊരു സംഭവം വീണ്ടും ഉണ്ടാകുന്നതെന്നും അദ്ദേഹം ചൂണ്ടിക്കാണിച്ചു. ഇതോടൊപ്പം, ടി20, ഏകദിന ഫോര്‍മാറ്റുകള്‍ക്ക് വലിയ സ്വീകാര്യത ലഭിക്കുമ്പോഴും പരമ്പരാഗത ടെസ്റ്റ് ക്രിക്കറ്റിനെ പ്രോത്സാഹിപ്പിക്കണമെന്ന് അദ്ദേഹം കൂട്ടിച്ചേര്‍ത്തു. ന്യൂസിലന്‍ഡിനെതിരായ ഒന്നാം ടി20 മത്സരത്തില്‍ വിജയിച്ച ഇന്ത്യന്‍ ക്രിക്കറ്റ് ടീമിനെയും അസ്ഹറുദ്ദീന്‍ അഭിനന്ദിച്ചു.
പാകിസ്ഥാനില്‍ നടക്കുന്ന ഏകദിന ട്രൈ-സീരീസിലെ മൂന്നാം മത്സരത്തിലാണ് ഇംഗ്ലണ്ടിനെതിരെ ശ്രീലങ്ക ഈ ചരിത്ര വിജയം കുറിച്ചത്. റാവല്‍പിണ്ടിയില്‍ നടന്ന മത്സരത്തില്‍ ഹാരി ബ്രൂക്കിന്റെ തകര്‍പ്പന്‍ ഇരട്ട സെഞ്ചുറിയുടെ (116 പന്തില്‍ 202 റണ്‍സ്) കരുത്തില്‍ ഇംഗ്ലണ്ട് 50 ഓവറില്‍ 429/4 എന്ന കൂറ്റന്‍ സ്‌കോര്‍ പടുത്തുയര്‍ത്തി. ഏകദിന ക്രിക്കറ്റ് ചരിത്രത്തില്‍ ഒരു ഇംഗ്ലണ്ട് താരം നേടുന്ന ആദ്യ ഇരട്ട സെഞ്ചുറിയാണിത്. കൂടാതെ ഏറ്റവും വേഗമേറിയ ഇരട്ട സെഞ്ചുറി എന്ന റെക്കോര്‍ഡും ബ്രൂക്ക് സ്വന്തമാക്കി.
430 റണ്‍സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ശ്രീലങ്ക തുടക്കത്തിലെ രണ്ട് വിക്കറ്റുകള്‍ നഷ്ടപ്പെട്ടെങ്കിലും തകര്‍പ്പന്‍ തിരിച്ചുവരവ് നടത്തി. പവന്‍ രത്‌നായകെ (106 പന്തില്‍ 130), അവിഷ്‌ക ഫെര്‍ണാണ്ടോ (83 പന്തില്‍ 97), ക്യാപ്റ്റന്‍ ദാസുന്‍ ഷാനക (50 പന്തില്‍ 97) എന്നിവരുടെ വെടിക്കെട്ട് ബാറ്റിംഗാണ് ശ്രീലങ്കയെ വിജയത്തിന് അരികിലെത്തിച്ചത്. അവസാന ഓവറുകളില്‍ ജനിത് ലിയാനഗെ പുറത്താകാതെ നേടിയ അര്‍ദ്ധസെഞ്ചുറി കൂടി ചേര്‍ന്നതോടെ ശ്രീലങ്ക ചരിത്ര ജയം സ്വന്തമാക്കി.
