രണ്ട് വിക്കറ്റ് നഷ്ടത്തില് 82 റണ്സെന്ന നിലയില് രണ്ടാം ദിനം ക്രീസിലിറങ്ങിയ കേരളത്തിന് സ്കോര് 100 കടന്നതിന് പിന്നാലെ അഹമ്മദ് ഇമ്രാന്റെ വിക്കറ്റാണ് ആദ്യം നഷ്ടമായത്.
തിരുവനന്തപുരം: രഞ്ജി ട്രോഫി ക്രിക്കറ്റില് സൗരാഷ്ട്രക്കെതിരെ കേരളം ഒന്നാം ഇന്നിംഗ്സില് 233 റണ്സിന് പുറത്ത്. സൗരാഷ്ട്രയുടെ ഒന്നാം ഇന്നിംഗ്സ് സ്കോറായ 160 റണ്സിന് മറുപടിയായി രണ്ട് വിക്കറ്റ് നഷ്ടത്തില് 82 റണ്സെന്ന നിലയില് രണ്ടാം ദിനം ക്രീസിലിറങ്ങിയ കേരളം 233 റണ്സിന് ഓൾ ഔട്ടായി. സൗരാഷ്ട്രക്കെതിരെ കൂറ്റന് ലീഡ് പ്രതീക്ഷിച്ച കേരളത്തിന് 73 റണ്സിന്റെ ലീഡെ നേടാനായുള്ളു. 80 റണ്സെടുത്ത രോഹൻ കുന്നുമ്മലിന് പുറമെ 69 റണ്സെടുത്ത ബാബാ അപരാജിതും 38 റണ്സെടുത്ത അങ്കിത് ശര്മയും മാത്രമാണ് കേരളത്തിനായി ഒന്നാം ഇന്നിംഗ്സില് പൊരുതിയത്. നാലു വിക്കറ്റ് വീഴ്ത്തിയ ക്യാപ്റ്റൻ ജയദേവ് ഉനദ്ഘട്ടും രണ്ട് വിക്കറ്റെടുത്ത ഹിറ്റെന് കൻബിയുമാണ് സൗരാഷ്ട്രക്കായി ബൗളിംഗില് തിളങ്ങിയത്.
രണ്ട് വിക്കറ്റ് നഷ്ടത്തില് 82 റണ്സെന്ന നിലയില് രണ്ടാം ദിനം ക്രീസിലിറങ്ങിയ കേരളത്തിന് സ്കോര് 100 കടന്നതിന് പിന്നാലെ അഹമ്മദ് ഇമ്രാന്റെ വിക്കറ്റാണ് ആദ്യം നഷ്ടമായത്.10 റണ്സെടുത്ത അഹമ്മദ ഇമ്രാനെ സൗരാഷ്ട്ര നായകന് ജയദേവ് ഉനദ്ഘട്ടാണ് പുറത്താക്കിയത്. അര്ധസെഞ്ചുറിയുമായി ക്രീസില് നിന്ന രോഹന് കുന്നുമ്മലിനെ(80) വിക്കറ്റിന് മുന്നില് കുടുക്കിയ ചിരാഗ് ജാനി കേളത്തിന് അടുത് പ്രഹരമേല്പിച്ചു. പിന്നാലെ ക്യാപ്റ്റൻ മുഹമ്മദ് അസറുദ്ദീനെ(0) പൂജ്യത്തിന് മടക്കിയ ഉനദ്ഘട്ട് കേരളത്തെ 136-5ലേക്ക് തള്ളിയിട്ട് പ്രതിരോധത്തിലാക്കിയെങ്കിലും അപരാജിത്-അങ്കിത് ശര്മ സഖ്യം കേരളത്തിന് ഒന്നാം ഇന്നിംഗ്സ് ലീഡ് സമ്മാനിച്ചു.
ഇരുവരും ചേര്ന്ന് ആറാം വിക്കറ്റില് 78 റണ്സ് കൂട്ടിച്ചേര്ത്തശേഷമാണ് വേര്പിരിഞ്ഞത്. അങ്കിത് ശര്മയെ പുറത്താക്കിയ ധര്മേന്ദ്ര ജഡേജയാണ് കൂട്ടുകെട്ട് പൊളിച്ചത്. പിന്നാലെ വരുണ് നായനാരെ(0) പ്രേരക് മങ്കാദ് പുറത്താക്കിയപ്പോള് എന് പി ബേസില്(0) റണ്ണൗട്ടായി. ഏദന് ആപ്പിള് ടോമിനെ(4) ബൗള്ഡാക്കിയ ഉനദ്ഘട്ട് ബാബാ അപരാജിതിനെ(69) കൂടി മടക്കി കേരളത്തിന്റെ ഇന്നിംഗ്സ് അവസാനിപ്പിച്ചു.സീസണില് ആദ്യമാണ് കേരളം എതിരാളികള്ക്കെതിരെ ഒന്നാം ഇന്നിംഗ്സ് ലീഡ് നേടുന്നത്.
Related Articles
ഇന്നലെ ഓപ്പണര് ആകര്ഷിന്റെയും(18) മുന് ക്യാപ്റ്റൻ സച്ചിന് ബേബിയുടെയും(1) വിക്കറ്റുകള് കേരളത്തിന് നഷ്ടമായിരുന്നു. രോഹന് കുന്നുമ്മലിനൊപ്പം ഓപ്പണിംഗ് വിക്കറ്റില് 61 റണ്സ് കൂട്ടിച്ചേര്ത്തശേഷമാണ് ആകര്ഷ് പുറത്തായത്. ആദ്യ മൂന്ന് കളികളില് രണ്ട് സമനിലയും ഒരു ഇന്നിംഗ്സ് തോല്വിയും വഴങ്ങിയ കേരളത്തിന് സൗരാഷ്ട്രക്കെതിരെ മികച്ച വിജയം അനിവാര്യമാണ്.
