ഓസ്ട്രേലിയക്കെതിരായ ഏകദിനത്തിനിടെ പരിക്കേറ്റ ഇന്ത്യൻ താരം ശ്രേയസ് അയ്യർക്ക് രണ്ട് മാസം വിശ്രമം വേണ്ടിവന്നേക്കും. ശസ്ത്രക്രിയക്ക് ശേഷം സുഖം പ്രാപിക്കുന്ന താരത്തിന് ഇതോടെ ദക്ഷിണാഫ്രിക്കയ്ക്കെതിരായ ഏകദിന പരമ്പര നഷ്ടമാകും.
സിഡ്നി: ഓസ്ട്രേലിയക്കെതിരെ മൂന്നാം ഏകദിനത്തില് പരിക്കേറ്റതിനെ തുടര്ന്ന് ചികിത്സ പുര്ത്തിയാക്കികൊണ്ടിരിക്കുന്ന ഇന്ത്യന് താരം ശ്രേയസ് അയ്യര്ക്ക് രണ്ട് മാസം വിശ്രമം വേണ്ടി വന്നേക്കും. ശസ്ത്രക്രിയക്ക് ശേഷം അദ്ദേഹം ആരോഗ്യം വീണ്ടെടുക്കുന്നുണ്ടെങ്കിലും പൂര്ണമായി ശരീരം പാകമാകാന് രണ്ട് മാസമെടുക്കുമെന്നാണ് റിപ്പോര്ട്ടുകള് വരുന്നത്. ഇതോടെ, അടുത്ത മാസം ദക്ഷിണാഫ്രിക്കയ്ക്കെതിരെ നടക്കുന്ന ഏകദിന പരമ്പരയും ശ്രേയസിന് നഷ്ടമാവും. ജനുവരിയില് ന്യൂസിലന്ഡിനെതിരെ നടക്കുന്ന ഏകദിന പരമ്പരയിലും താരം കളിക്കുന്ന കാര്യം ഉറപ്പില്ല.
സിഡ്നിയില് ആശുപത്രിയിലുള്ള ശ്രേയസ് ഇന്ന് ആദ്യ പ്രതികരണം നടത്തിയിരുന്നു. ശ്രേയസിന്റെ പ്രതികരണം ഇങ്ങനെ... ''ഞാനിപ്പോള് സുഖം പ്രാപിച്ച് വരികയാണ്. ഓരോ ദിവസം കഴിയുന്തോറും ആരോഗ്യനിലിയല് മാറ്റം സംഭവിക്കുന്നുണ്ട്. എന്നെ പിന്തുണച്ചവരോട്, ആശംസിച്ചവരോട് ഞാന് വളരെ നന്ദിയുള്ളവനായിരിക്കും. എന്നെ നിങ്ങളുടെ പ്രാര്ത്ഥനകളില് ഉള്പ്പെടുത്തിയതിന് നന്ദി.'' ശ്രേയസ് സോഷ്യല് മീഡിയയില് കുറിച്ചിട്ടു.
നേരത്തെ, ശ്രേയസിനെ ഐസിയുവില് നിന്ന് മാറ്റിയിരുന്നു. ഓസീസിനെതിരെ മൂന്നാം ഏകദിനത്തില് ക്യാച്ച് എടുക്കുന്നതിനിടെ പ്ലീഹയ്ക്ക് പരിക്കേറ്റതിനെ തുടര്ന്നാണ് ശസ്ത്രക്രിയ ആവശ്യമായി വന്നത്. ക്യാച്ച് പൂര്ത്തിയാക്കാന് മുന്നോട്ട് ഡൈവ് ചെയ്യുന്നതിനിടെ, വീണപ്പോഴാണ് ശ്രേയസിന് പരിക്കേല്ക്കുന്നത്. ചെറിയ ശസ്ത്രക്രിയ മാത്രമായിരുന്നു താരത്തിന് വേണ്ടിയിരുന്നത്. പക്ഷേ അയ്യര്ക്ക് കുറഞ്ഞത് അഞ്ച് ദിവസമെങ്കിലും, ഒരുപക്ഷേ ഒരു ആഴ്ച വരെ വിശ്രമം വേണ്ടിവരും. ബിസിസിഐ അദ്ദേഹത്തിന്റെ അവസ്ഥ സൂക്ഷ്മമായി നിരീക്ഷിച്ചുവരികയാണ്.
Related Articles
അയ്യര് ഫോണ് കോളുകള് എടുക്കുകയുമൊക്കെ ചെയ്യുന്നുണ്ടെന്നും പതിവ് ജോലികള് പോലും സ്വന്തമായി ചെയ്യുന്നുണ്ടെന്നും ഇന്ത്യന് ടി20 ക്യാപ്റ്റന് സൂര്യകുമാര് യാദവ് വ്യക്തമാക്കിയിരുന്നു. സൂര്യയുടെ വാക്കുകള് ഇങ്ങനെയായിരുന്നു... 'ശ്രേയസിന് പരിക്കുണ്ടെന്ന് അറിഞ്ഞ ആദ്യ ദിവസം തന്നെ ഞങ്ങള് അദ്ദേഹത്തോട് സംസാരിച്ചു. ആദ്യം ഞാന് അദ്ദേഹത്തെ വിളിച്ചു. പിന്നീട് അദ്ദേഹത്തിന്റെ കൈവശം ഫോണ് ഇല്ലെന്ന് മനസ്സിലാക്കി. അങ്ങനെ ഞാന് ഫിസിയോ കമലേഷിനെ വിളിച്ചു. ശ്രേയസ് ആരോഗ്യവാനാണെന്ന് എന്നോട് പറഞ്ഞു. രണ്ട് ദിവസമായി ഞങ്ങള് സംസാരിച്ചുകൊണ്ടിരിക്കുകയാണ്. അദ്ദേഹം മറുപടി നല്കുന്നുണ്ട്. അതുതന്നെ ശ്രേയസിന്റെ ആരോഗ്യകാര്യത്തില് പുരോഗതിയുണ്ടെന്ന് തെളിയിക്കുന്നതാണ്.'' സൂര്യ വ്യക്തമാക്കി.
