സ്കോട്‌ലന്‍ഡിനെ വീഴ്ത്തി സിംബാബ്വെ; സൂപ്പര്‍ 12 പോരാട്ടചിത്രം വ്യക്തമായി
സ്കോട്‌ലന്‍ഡ് ഉയര്‍ത്തിയ 133 റണ്‍സ് വിജയലക്ഷ്യത്തിലേക്ക് ബാറ്റ് വീശിയ സിംബാബ്വെ തുടക്കത്തില്‍ തകര്‍ന്നടിഞ്ഞിരുന്നു. 7-2ലേക്കും 42-3ലേക്കും വീണ സിംബാബ്‌വെയെ സിക്കന്ദര്‍ റാസയും(23 പന്തില്‍ 40), ക്രെയ്ഗ് ഇര്‍വിന്‍(54 58) എന്നിവരുടെ പോരാട്ടമികവില്‍ ലക്ഷ്യത്തിലെത്തി.
മെല്‍ബണ്‍: ടി20 ലോകകപ്പിലെ സൂപ്പര്‍ 12 പോരാട്ടചിത്രം വ്യക്തമായി. സൂപ്പര്‍ 12 യോഗ്യതാ പോരാട്ടത്തിലെ അഴസാന മത്സരത്തില്‍ സ്കോട്‌ലന്‍ഡിനെ അഞ്ച് വിക്കറ്റിന് തകര്‍ത്ത് സിംബാബ്വെ സൂപ്പര്‍ 12ലെ അവസാന ടീമായി. ബി ഗ്രൂപ്പില്‍ ചാമ്പ്യന്‍മാരായ സിംബാബ്വെ ഇന്ത്യയുള്‍പ്പെടുന്ന ഗ്രൂപ്പിലാണ് മത്സരിക്കുക. നിര്‍ണായക പോരാട്ടത്തില്‍ സ്കോട്‌ലന്‍ഡ് ഉയര്‍ത്തിയ 133 റണ്‍സ് വിജയലക്ഷ്യം സിംബാബ്വെ 18.3 ഓവറില്‍ അഞ്ച് വിക്കറ്റ് നഷ്ടത്തില്‍ മറികടന്നു. 58 റണ്‍സെടുത്ത ക്രെയ്ഗ് ഇര്‍വിനാണ് സിംബാബ്‌വെയുടെ ടോപ് സ്കോറര്‍.
സ്കോട്‌ലന്‍ഡ് ഉയര്‍ത്തിയ 133 റണ്‍സ് വിജയലക്ഷ്യത്തിലേക്ക് ബാറ്റ് വീശിയ സിംബാബ്വെ തുടക്കത്തില്‍ തകര്‍ന്നടിഞ്ഞിരുന്നു. 7-2ലേക്കും 42-3ലേക്കും വീണ സിംബാബ്‌വെയെ സിക്കന്ദര്‍ റാസയും(23 പന്തില്‍ 40), ക്രെയ്ഗ് ഇര്‍വിന്‍(54 58) എന്നിവരുടെ പോരാട്ടമികവില്‍ ലക്ഷ്യത്തിലെത്തി. ലക്ഷ്യത്തിന് അടുത്തെത്തിയപ്പോള്‍ ഇര്‍വിനും റാസയും മടങ്ങിയത് സിംബാബ്‌വെയെ നേരിയ സമ്മര്‍ദ്ദത്തിലാക്കിയെങ്കിലും മിള്‍ട്ടണ്‍ ഷുംബയും(11), റയാന്‍ ബേളും(9) ചേര്‍ന്ന് സിംബാബ്‌വെയെ ലക്ഷ്യത്തിലെത്തിച്ചു.
ടി20 ലോകകപ്പില്‍ സൂപ്പര്‍ 12 കാണാതെ വിന്‍ഡീസ് പുറത്ത്; അയര്‍ലന്‍ഡിന് ഐതിഹാസിക ജയം
നേരത്തെ ടോസ് നേടി ആദ്യം ബാറ്റ് ചെയ്ത സ്കോട്‌ലന്‍ഡ് ജോര്‍ജ് മുന്‍സി(51 പന്തില്‍ 54)യുടെ പോരാട്ടത്തിന്‍റെ മികവിലാണ് ഭേദപ്പെട്ട സ്കോറിലെത്തിയത്. തുടക്കത്തില്‍ തകര്‍ന്നടിഞ്ഞെങ്കിലും മക്‌ലോയ്ഡ്(25) ക്യാപ്റ്റന്‍ ബെറിങ്ടണ്‍(13), ലീസ്ക്(12) എന്നിവരുടെ ബാറ്റിംഗ് മികവിലാണ് 132 റണ്‍സിലെത്തിയത്.
സൂപ്പര്‍ 12ല്‍ ഇന്ത്യ, പാക്കിസ്ഥാന്‍, ദക്ഷിണാഫ്രിക്ക, ബംഗ്ലാദേശ്, നെതര്‍ലന്‍ഡ്സ്, സിംബാബ്വെ എന്നിങ്ങനെയാണ് ഗ്രൂപ്പ് രണ്ടിലെ ടീമുകള്‍. ഇംഗ്ലണ്ട്, ന്യൂസിലന്‍ഡ്, ശ്രീലങ്ക, അയര്‍ലന്‍ഡ്, അഫ്ഗാനിസഥാന്‍, ഓസ്ട്രേലിയ എന്നീ ടീമുകളാണ് ഗ്രൂപ്പ് ഒന്നിലുള്ളത്. നാളെ ഓസ്ട്രേലിയ-ന്യൂസിലന്‍ഡ് പോരാട്ടത്തോടെയാണ് സൂപ്പര്‍ 12 പോരാട്ടങ്ങള്‍ക്ക് തുടക്കാമകുക. ഞായറാഴ്ചയാണ് സൂപ്പര്‍ 12ലെ സൂപ്പര്‍ പോരാട്ടമായ ഇന്ത്യ-പാക്കിസ്ഥാന്‍ മത്സരം.
