ധോണിയും ട്രംപും ഒരുമിച്ച് ഗോള്ഫ് കളിക്കുന്നതിന്റെ ചിത്രങ്ങളും ദൃശ്യങ്ങളും ധോണിയുടെ സുഹൃത്തും ദുബായിലെ വ്യവസായിയുമായ ഹിതേഷ് സങ്വിയാണ് സമൂഹമാധ്യമങ്ങളിലൂടെ പുറത്തുവിട്ടിരുന്നു.
ന്യൂയോര്ക്ക്: യുഎസ് ഓപ്പണ് ടെന്നീസില് കാര്ലോസ് അല്ക്കാരസും അലക്സാണ്ടര് സ്വരേവും തമ്മിലുള്ള ക്വാര്ട്ടര് മത്സരം കാണാനായി സ്റ്റേഡിയത്തിലെത്തിയതിന് പിന്നാലെ ഗോള്ഫിലും ഒരു കൈ നോക്കി ചെന്നൈ സൂപ്പര് കിംഗ്സ് നായകന് എം എസ് ധോണി. ധോണിക്കൊപ്പം ഗോള്ഫ് കളിക്കാനായി എത്തിയത് ചില്ലറക്കാരനല്ല. മുന് യുഎസ് പ്രസിഡന്റ് ഡൊണാള്ഡ് ട്രംപായിരുന്നു ബെഡ്മിനിസ്റ്ററിലെ ട്രംപ് നാഷണല് ഗോള്പ് ക്ലബ്ബില് ധോണിയുടെ സഹതാരം.
ധോണിയും ട്രംപും ഒരുമിച്ച് ഗോള്ഫ് കളിക്കുന്നതിന്റെ ചിത്രങ്ങളും ദൃശ്യങ്ങളും ധോണിയുടെ സുഹൃത്തും ദുബായിലെ വ്യവസായിയുമായ ഹിതേഷ് സങ്വിയാണ് സമൂഹമാധ്യമങ്ങളിലൂടെ പുറത്തുവിട്ടിരുന്നു. സങ്വിക്കും മറ്റൊരു സുഹൃത്തിനുമൊപ്പമാണ് ധോണി കഴിഞ്ഞ ദിവസം യുഎസ് ഓപ്പണ് ക്വാര്ട്ടര് പോരാട്ടം കാണാനായി സ്റ്റേഡിയത്തിലെത്തിയത്. ഐപിഎല്ലില് ചെന്നൈ സൂപ്പര് കിംഗ്സിനെ അഞ്ചാം കിരീടത്തിലേക്ക് നയിച്ച 42കാരനായ ധോണി അടുത്ത ഐപിഎല്ലിലും കളിക്കുമെന്ന് നേരത്തെ അറിയിച്ചിരുന്നു.
ഐപിഎല്ലിനിനിടെ കാല്മുട്ടിന് പരിക്കേറ്റെങ്കിലും ഫൈനലില് അടക്കം ടീമിനെ മുന്നില് നിന്ന് നയിച്ചാണ് ധോണി ചെന്നൈ ടീമിന് അഞ്ചാം കിരീടം സമ്മാനിച്ചത്. കാല്മുട്ടിനേറ്റ പരിക്കിന് പിന്നീട് ശസ്ത്രക്രിയക്ക് വിധേയനായ ധോണി കഴിഞ്ഞ മാസം തന്റെ സൂപ്പര് ബൈക്കിലും കാറിലുമെല്ലാം റാഞ്ചിയിലെ നിരത്തുകളിലൂടെ ചീറിപ്പായുന്നതിന്റെ വീഡിയോയും ആരാധകരുമായി പങ്കുവെച്ചിരുന്നു.
