വിവേക് അഗ്നിഹോത്രി സംവിധാനം ചെയ്യുന്ന ചിത്രത്തില് 'കാന്താര'യിലെ നായിക
വിവേക് അഗ്നിഹോത്രി സംവിധാനം ചെയ്യുന്ന ചിത്രത്തില് സപ്തമി ഗൗഡ.
കന്നഡയില് നിന്നെത്തി രാജ്യമൊട്ടാകെ ശ്രദ്ധയാകര്ഷിച്ച ചിത്രമാണ് കാന്താര. ഋഷഭ് ഷെട്ടി സ്വന്തം സംവിധാനത്തില് നായകനായ 'കാന്താര' മലയാളം, ഹിന്ദി, തെലുങ്ക്, തമിഴ്, ഭാഷകളിലും മൊഴി മാറ്റി പ്രദര്ശനത്തിന് എത്തിയിരുന്നു. വിവിധ ഭാഷകളിലെ സൂപ്പര് താരങ്ങളടക്കം പ്രശംസിച്ച 'കാന്താര'യില് സപ്തമി ഗൗഡയാണ് നായികയായത്. സപ്തമി ഗൗഡ ഒരു ബോളിവുഡ് ചിത്രത്തില് അഭിനയിക്കുന്നുവെന്നതാണ് പുതിയ വാര്ത്ത.
'ദ കശ്മിര് ഫയല്സ്' എന്ന ചിത്രത്തിലൂടെ ശ്രദ്ധയാകര്ഷിച്ച വിവേക് അഗ്നിഹോത്രിയുടെ സംവിധാനത്തിലാണ് സപ്തമി ഗൗഡ അഭിനയിക്കുക. വിവേക് അഗ്നിഹോത്രി സംവിധാനം ചെയ്യുന്ന പുതിയ ചിത്രം 'ദ വാക്സിൻ വാര്' ലക്നൗവില് ചിത്രീകരണം തുടങ്ങിയിരുന്നു. അവിശ്വസനീയമായ യഥാര്ഥ കഥയാണ് ചിത്രം പറയുകയെന്ന് വിവേക് അഗ്നിഹോത്രി വ്യക്തമാക്കിയിരുന്നു. 2023 സ്വാതന്ത്ര്യദിനത്തില് റിലീസ് ചെയ്യുന്ന ചിത്രം വിവിധ ഭാഷകളില് എത്തും.
കൊവിഡ് 19നെ കുറിച്ചും രാജ്യത്തെ വാക്സിനേഷൻ പ്രക്രിയയെ കുറിച്ചുമായിരിക്കും ചിത്രമെന്നാണ് റിപ്പോര്ട്ട്. അയാം ബുദ്ധ പ്രൊഡക്ഷൻസ് തന്നെയാണ് ചിത്രം നിര്മിക്കുന്നത്. അഭിഷേക് അഗര്വാള് ആര്ട്സ് ബാനറിലൂടെയാണ് ചിത്രം റിലീസ് ചെയ്യുക.'ദ വാക്സിൻ വാറി'ന്റെ കൂടുതല് വിവരങ്ങള്ക്കായി കാത്തിരിക്കുകയാണ് ആരാധകര്.
കശ്മിരി പണ്ഡിറ്റുകളുടെ പലായനത്തിന്റെ കഥ പറഞ്ഞ ചിത്രം ആയിരുന്നു 'ദ കശ്മിര് ഫയല്സ്'. മാര്ച്ച് 11ന് തിയറ്ററുകളിലെത്തിയ ചിത്രത്തിന്റെ റിലീസ് രാജ്യമൊട്ടാകെ 630 തിയറ്ററുകളില് മാത്രമായിരുന്നു. എന്നാല് വിതരണക്കാരെയും തിയറ്റര് ഉടമകളെയും അമ്പരപ്പിച്ചുകൊണ്ട് നേടിയ കളക്ഷന് 4.25 കോടി ആയിരുന്നു. രണ്ടാം ദിനമായ ശനിയാഴ്ച 10.10 കോടി നേടിയതോടെ തിയറ്റര് ഉടമകളുടെ ആവശ്യപ്രകാരം ചിത്രത്തിന് സ്ക്രീന് കൗണ്ട് വലിയ രീതിയില് വര്ധിച്ചു. 2000 സ്ക്രീനുകളിലായിരുന്നു ആദ്യ ഞായറാഴ്ച ആയപ്പോഴേക്കും ചിത്രത്തിന്റെ പ്രദര്ശനം. രണ്ടാം വാരത്തിലേക്ക് കടന്നപ്പോള് തിയറ്റര് കൗണ്ട് 4000 ആയും വര്ധിച്ചിരുന്നു. അനുപം ഖേര് മിഥുൻ ചക്രവർത്തി, ദർശൻ കുമാർ, പല്ലവി ജോഷി, ചിന്മയി മാണ്ട്ലേകർ, പുനീത് ഇസ്സർ, പ്രകാശ് ബേലവാടി, അതുൽ ശ്രീവാസ്തവ, മൃണാൽ കുൽക്കർണി എന്നിവരും അഭിനയിച്ച 'ദ കശ്മിര് ഫയല്സ്' വൻ ഹിറ്റാകുകയും ചെയ്തു.
Read More: വി കെ പ്രകാശിന്റെ സംവിധാനത്തില് അനുപം ഖേര്, ഹിന്ദി ചിത്രം പ്രഖ്യാപിച്ചു