തരുൺ മൂർത്തി സംവിധാനം ചെയ്യുന്ന പുതിയ ചിത്രത്തിൽ മോഹൻലാൽ അഭിനയിക്കുന്നു. L366 എന്ന് താൽക്കാലികമായി പേരിട്ടിരിക്കുന്ന ചിത്രത്തിൻ്റെ ഷൂട്ടിംഗ് തൊടുപുഴയിൽ ആരംഭിച്ചു
ഇടവേളയ്ക്ക് ശേഷം മോഹന്ലാലിന്റേതായി തിയറ്ററുകളില് ഏറെ ആഘോഷിക്കപ്പെട്ട ചിത്രമായിരുന്നു തുടരും. തരുണ് മൂര്ത്തി ആയിരുന്നു ചിത്രത്തിന്റെ സംവിധാനം. ഇപ്പോഴിതാ തരുണും മോഹന്ലാലും വീണ്ടും ഒന്നിക്കുകയാണ്. മോഹന്ലാലിന്റെ കരിയറിലെ 366-ാം ചിത്രത്തിന്റെ വര്ക്കിംഗ് ടൈറ്റില് എല് 366 എന്നാണ്. സിനിമയുടെ ചിത്രീകരണത്തിന് ഇന്ന് തൊടുപുഴയില് തുടക്കമായി. ലൊക്കേഷനില് നിന്നുള്ള ആദ്യ ചിത്രങ്ങള് മോഹന്ലാല് തന്നെ സോഷ്യല് മീഡിയയിലൂടെ പങ്കുവച്ചിട്ടുണ്ട്. ആഷിക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക് ഉസ്മാനാണ് ഈ ചിത്രം നിർമ്മിക്കുന്നത്.
ആഷിക് ഉസ്മാന് പ്രൊഡക്ഷന്സ്
നേരത്തെ ചിത്രത്തിന്റെ പൂജ ചടങ്ങുകള് വൈക്കം മഹാദേവ ക്ഷേത്രത്തിൽ വച്ച് നടന്നിരുന്നു. അതേസമയം ദൃശ്യം 3 ന് ശേഷം മോഹന്ലാല് വീണ്ടും തൊടുപുഴയിലേക്ക് ചിത്രീകരണത്തിനായി എത്തുകയാണ് ഈ സിനിമയ്ക്ക് വേണ്ടി. നിരവധി വിജയ ചിത്രങ്ങൾ നിർമ്മിച്ചിട്ടുളള ആഷിക് ഉസ്മാൻ പ്രൊഡക്ഷൻസിന്റെ 21-ാമത്തെ ചിത്രം കൂടിയാണിത്. പൊലീസ് വേഷത്തിലാണ് ചിത്രത്തില് മോഹന്ലാല് എത്തുന്നത്. ഒരു വലിയ ഇടവേളയ്ക്ക് ശേഷമാണ് മോഹൻലാൽ ഒരു പൊലീസ് കഥാപാത്രത്ത അവതരിപ്പിക്കുന്നത് എന്ന പ്രത്യേകതയുമുണ്ട്. മീര ജാസ്മിനാണ് ചിത്രത്തിലെ നായിക. മലയാളത്തിലെ പ്രമുഖ താരങ്ങളും ചിത്രത്തിൽ അണിനിരക്കുന്നുണ്ട്.
രതീഷ് രവിയുടേതാണ് ചിത്രത്തിന്റെ തിരക്കഥ. സംഗീതം ജേക്സ് ബിജോയ്, ഛായാഗ്രഹണം ഷാജികുമാർ, എഡിറ്റിംഗ് വിവേക് ഹർഷൻ, ശബ്ദസംവിധാനം വിഷ്ണു ഗോവിന്ദ്, വസ്ത്രാലങ്കാരം മഷർ ഹംസ, പ്രൊഡക്ഷൻ ഡിസൈനർ ഗോകുൽ ദാസ്, കോ ഡയറക്റ്റര് ബിനു പപ്പു, പ്രൊഡക്ഷൻ കൺട്രോളർ സുധർമ്മൻ വള്ളിക്കുന്ന്, സഹസംവിധാനം ബിനു പപ്പു, മേക്കപ്പ് റോണെക്സ് സേവിയര്. സെൻട്രൽ പിക്ചേഴ്സ് ആണ് ഈ ചിത്രം പ്രദർശനത്തിനെത്തിക്കുന്നത്.
Related Articles
