ഫണ് ത്രില്ലര് ആണ് ചിത്രം
ഒടിടി പ്ലാറ്റ്ഫോമിനുവേണ്ടി ഒമര് ലുലു (Omar Lulu) ആദ്യമായി സംവിധാനം ചെയ്യുന്ന ചിത്രമാണ് നല്ല സമയം (Nalla Samayam). ആദ്യ ഗാനം റെക്കോര്ഡ് ചെയ്തുകൊണ്ട് ചിത്രത്തിന്റെ നിര്മ്മാണ പ്രവര്ത്തനങ്ങള് ഇന്ന് കൊച്ചിയില് ആരംഭിച്ചു. നവാഗതനായ സിദ്ധാര്ഥ് സംഗീത സംവിധാനം നിര്വ്വഹിക്കുന്ന ചിത്രത്തിലെ ആദ്യഗാനം ആലപിച്ചത് അഭയ ഹിരണ്മയിയാണ് (Abhaya Hiranmayi). കൊച്ചിയിലെ ഓഡിയോജീന് സ്റ്റുഡിയോയില് വച്ചായിരുന്നു റെക്കോര്ഡിംഗ്.
ഒറ്റ രാത്രിയിൽ നടക്കുന്ന സംഭവങ്ങളാണ് ദൃശ്യവല്ക്കരിക്കുന്ന ഒരു ഫണ് ത്രില്ലര് ആയിരിക്കും ചിത്രം. നാല് പുതുമുഖ നായികമാരാണ് പ്രധാന വേഷത്തിൽ എത്തുന്നത്. ജൂണ് 27ന് ഗുരുവായൂർ, തൃശൂർ എന്നിവടങ്ങളിലായി ചിത്രീകരണം ആരംഭിക്കുന്ന സിനിമയുടെ ഛായാഗ്രഹണം സിനു സിദ്ധാർഥ് ആണ് നിർവ്വഹിക്കുന്നന്നു. ഒമർ ലുലുവിന്റെ അഞ്ചാമത്തെ ചിത്രമാണിത്. കെജിസി സിനിമാസിന്റെ ബാനറിൽ നവാഗതനായ കലന്തൂർ ആണ് നിര്മ്മാണം. ബാബു ആന്റണിയെ നായകനാക്കി ഒരുക്കുന്ന പവര് സ്റ്റാറിനു മുന്പേ നല്ല സമയം റിലീസ് ചെയ്യുമെന്ന് ഒമര് ലുലു അറിയിച്ചിരുന്നു. ക്രിസ്മസ് റിലീസ് ആയാണ് പവര് സ്റ്റാര് പ്ലാന് ചെയ്യുന്നത്.
ALSO READ : മലയാളത്തില് യുവതാരങ്ങള്ക്കൊപ്പം ത്രില്ലര് ഒരുക്കാന് പ്രിയദര്ശന്?
അതേസമയം ആക്ഷന് ഹീറോ ആയി ബാബു ആന്റണിയുടെ തിരിച്ചുവരവ് എന്ന നിലയില് പ്രഖ്യാപന സമയം മുതല് പ്രേക്ഷകശ്രദ്ധയിലുള്ള ചിത്രമാണ് പവര് സ്റ്റാര്. പ്രശസ്ത തിരക്കഥാകൃത്ത് ഡെന്നിസ് ജോസഫിന്റെ അവസാന തിരക്കഥ കൂടിയാണിത്. പത്തു വർഷങ്ങൾക്കു ശേഷമാണു ബാബു ആന്റണി മലയാള സിനിമയില് നായകനായി തിരിച്ചെത്തുന്നത്. മുഴുനീള ആക്ഷന് ചിത്രത്തിന്റെ നിര്മ്മാണം റോയൽ സിനിമാസും ജോയ് മുഖർജി പ്രൊഡക്ഷൻസും ചേർന്നാണ്. ഡ്രഗ് മാഫിയയുടെ പശ്ചാത്തലത്തിൽ കഥ പറയുന്ന ചിത്രമാണിത്. നായികയും പ്രണയവും കോമഡി രംഗങ്ങളും ഇല്ലാതെ ആക്ഷന് മാത്രം പ്രാധാന്യം നൽകി ചെറിയ പിരീഡിൽ നടക്കുന്ന കഥ പറയുന്ന ചിത്രമായിരിക്കും പവർസ്റ്റാർ എന്ന് ഒമർ ലുലു പറഞ്ഞിരുന്നു. നീണ്ട മുടിയും കാതിൽ കുരിശിന്റെ കമ്മലുമിട്ട് മാസ് ലുക്കിലാണ് ചിത്രത്തിൽ ബാബു ആന്റണി എത്തുന്നത്. ഒരു കാലത്ത് മലയാള സിനിമയുടെ അവിഭാജ്യ ഘടകമായിരുന്ന ബാബു ആന്റണിയുടെ പഴയ ലുക്കിനെ ഓർമ്മപ്പെടുത്തുന്നതിനാണ് ചിത്രത്തിലെ ലുക്കെന്ന് സംവിധായകൻ നേരത്തെ വ്യക്തമാക്കിയിരുന്നു. ചിത്രത്തിൽ നായകനായ ബാബു ആന്റണിയെ കൂടാതെ റിയാസ് ഖാൻ, ഷമ്മി തിലകൻ, അബു സലിം, ശാലു റഹീം, അമീർ നിയാസ്, ഹരീഷ് കണാരൻ തുടങ്ങിയവർ പ്രധാന വേഷത്തിലെത്തുന്നു.
