2023-ൽ തിയറ്ററുകളിൽ എത്തിയ ഈ ചിത്രം, പി പത്മരാജന്റെ കഥയെ ആസ്പദമാക്കിയുള്ളതാണ്. അമിത് ചക്കാലയ്ക്കൽ, സാബുമോൻ തുടങ്ങിയവർ അഭിനയിച്ചിരിക്കുന്നു
തിയറ്റര് റിലീസ് കഴിഞ്ഞ് രണ്ട് വര്ഷത്തിനിപ്പുറം ഒരു മലയാള ചിത്രം യുട്യൂബില് സ്ട്രീമിംഗ് തുടങ്ങി. നവാസ് അലി സംവിധാനം ചെയ്ത പ്രാവ് എന്ന ചിത്രമാണ് ഇത്. 2023 സെപ്റ്റംബറില് തിയറ്ററുകളില് എത്തിയ ചിത്രമാണ് ഇത്. ഈ വര്ഷം ആദ്യം ചിത്രം ഒടിടിയിലും എത്തിയിരുന്നു. പിന്നാലെയാണ് യുട്യൂബില് സൗജന്യ സ്ട്രീമിംഗ് ആരംഭിച്ചിരിക്കുന്നത്. പി പത്മരാജന്റെ വിഖ്യാതമായ ഒരു കഥയെ അവലംബമാക്കി ഒരുക്കിയ ചിത്രമാണ് ഇത്. ചിത്രത്തിലെ കേന്ദ്രകഥാപാത്രങ്ങളെ അവതരിപ്പിച്ചിരിക്കുന്നത് ആദർശ് രാജയും യാമി സോനയുമാണ്. അമിത് ചക്കാലയ്ക്കൽ, മനോജ് കെ യു, സാബുമോൻ, തകഴി രാജശേഖരൻ, അജയൻ തകഴി, ജംഷീന ജമാൽ, നിഷ സാരംഗ്, ഡിനി ഡാനിയൽ, ടീന സുനിൽ, ഗായത്രി നമ്പ്യാർ, അലീന എന്നിവർ മറ്റു പ്രധാന വേഷങ്ങളിലെത്തുന്നു. സി ഇ റ്റി സിനിമാസിന്റെ ബാനറിൽ തകഴി രാജശേഖരൻ ആണ് ചിത്രം നിര്മ്മിച്ചിരിക്കുന്നത്.
പ്രാവിന്റെ അണിയറ പ്രവർത്തകർ ഇവരാണ്. ഛായാഗ്രഹണം ആന്റണി ജോ, ഗാനരചന ബി കെ ഹരിനാരായണൻ, സംഗീതം ബിജിബാൽ, പ്രൊഡക്ഷൻ ഡിസൈനർ അനീഷ് ഗോപാൽ, വസ്ത്രാലങ്കാരം അരുൺ മനോഹർ, മേക്കപ്പ് ജയൻ പൂങ്കുളം, എഡിറ്റിംഗ് ജോവിൻ ജോൺ, ചീഫ് അസോസിയേറ്റ് ഡയറക്ടർ ഉണ്ണി കെ ആർ, എക്സിക്യൂട്ടീവ് പ്രൊഡ്യൂസർ എസ് മഞ്ജുമോൾ, പ്രൊഡക്ഷൻ കൺട്രോളർ ദീപക് പരമേശ്വരൻ, സൗണ്ട് ഡിസൈനർ കരുൺ പ്രസാദ്, സ്റ്റിൽസ് ഫസ ഉൾ ഹഖ്, ഡിസൈൻസ് പനാഷേ. ദുല്ഖര് സല്മാന്റെ ഉടമസ്ഥതയിലുള്ള വേഫെറര് ഫിലിംസ് ആണ് ചിത്രം കേരളത്തിലെ തിയറ്ററുകളില് എത്തിച്ചത്. ഗുഡ്വില് സിനിമാസിന്റെ യുട്യൂബ് ചാനലിലൂടെയാണ് ചിത്രം എത്തിയിരിക്കുന്നത്.
