താൻ മനസ്സിൽ കണ്ടിരുന്ന കഥയാണ് 'ലോക'യുടേതെന്ന് സംവിധായകൻ വിനയൻ പ്രശംസിച്ചു. കള്ളിയങ്കാട്ട് നീലി എന്ന ഐതിഹ്യത്തെ അടിസ്ഥാനമാക്കിയുള്ള ഈ ലേഡി സൂപ്പർഹീറോ ചിത്രം, ആഗോളതലത്തിൽ 260 കോടിയിലധികം നേടി വൻ വിജയമായി.
'ലോക'യെ പ്രശംസിച്ച് സംവിധായകൻ വിനയൻ. മാധ്യമങ്ങളുടെ ചോദ്യങ്ങൾക്ക് മറുപടി നൽകവെയായിരുന്നു വിനയന്റെ പ്രതികരണം. താൻ മനസ്സിൽവെച്ചിരുന്ന കഥയാണ് അടിച്ചോണ്ട് പോയതെന്നും, ലോകയുടെ വിജയത്തിൽ സന്തോഷമുണ്ടെന്നും വിനയൻ പറഞ്ഞു. "ലോക പോലെയുള്ള സിനിമകളുടെ കാലമാണ് ഇനി വരാന് പോകുന്നത്, പഴയകാല ഹൊറര് കോണ്സെപ്റ്റ് മാറി. ഇങ്ങനെ ഒരെണ്ണം ചെയ്യണമെന്ന് എനിക്ക് ആഗ്രഹമുണ്ടായിരുന്നു. പ്രത്യേകിച്ച്, പെണ്കുട്ടികളെവെച്ച് ചെയ്യുമ്പോള് സൂപ്പര്സ്റ്റാറുകളുടെ പുറകേ പോവാതെ ചെയ്യാന് കഴിയും. അതിലിപ്പോള് ഒരെണ്ണം അടിച്ചുമാറ്റികഴിഞ്ഞു. ഞാന് ഇനി വേറെ ഒരെണ്ണമുണ്ടാക്കും. എന്റെ മനസില് ഞാന് കണ്ടിരുന്നതുപോലെയൊരു സബ്ജക്റ്റാണ് ലോക." വിനയൻ പറഞ്ഞു.
അതേസമയം മികച്ച പ്രേക്ഷക പ്രതികരണങ്ങളോടെ ലോക പ്രദർശനം തുടരുകയാണ്. ആഗോള കളക്ഷനായി 260 കോടിയിലധികം തുകയാണ് റിലീസ് ചെയ്ത് ഒരു മാസത്തിനുള്ളിൽ ചിത്രം കളക്റ്റ് ചെയ്തിരിക്കുന്നത്. ഇന്ത്യൻ സിനിമയിലെ ഒരു ഫീമെയിൽ സെൻട്രിക് ചിത്രം നേടുന്ന ഏറ്റവും വലിയ കളക്ഷൻ റെക്കോർഡ് കൂടിയാണ് ലോക സ്വന്തമാക്കിയിരിക്കുന്നത്.
മലയാളത്തിലെ ആദ്യ ലേഡി സൂപ്പർ ഹീറോ
അതേസമയം മികച്ച പ്രേക്ഷക പ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നത്. മലയാളത്തിലെ ആദ്യത്തെ ലേഡി സൂപ്പർ ഹീറോ ചിത്രം എന്ന ഖ്യാതിയോടെ എത്തിയ ലോക കള്ളിയങ്കാട്ട് നീലി എന്ന മിത്തിനെ ആസ്പദമാക്കിയാണ് ഒരുക്കിയിട്ടുള്ളത്. ദുൽഖറിന്റെ വേഫെറർ ഫിലിംസ് നിർമ്മിച്ച ഏഴാം ചിത്രമായ ‘ലോക - ചാപ്റ്റർ വൺ: ചന്ദ്ര’ ബോക്സ് ഓഫീസിൽ ജൈത്രയാത്ര തുടരുകയാണ്. റിലീസ് ആയി 7 ദിവസം കൊണ്ട് തന്നെ ചിത്രം 100 കോടി ക്ലബിൽ ഇടം പിടിച്ചിരുന്നു. അഞ്ച് ഭാഗങ്ങളുള്ള ഒരു സൂപ്പർ ഹീറോ സിനിമാറ്റിക് യൂണിവേഴ്സിലെ ആദ്യ ചിത്രമാണിത്.
Related Articles
കല്യാണി പ്രിയദർശൻ നായികയായെത്തിയ ചിത്രത്തിൽ നസ്ലെനും പ്രധാന കഥാപാത്രത്തെ അവതരിപ്പിക്കുന്നു. കാഴ്ചക്കാരുടെ മുന്നിലേക്ക് ഒരു അത്ഭുത ലോകം തുറന്നിടുന്ന ചിത്രം, കേരളത്തിലെ പ്രശസ്തമായ ഐതിഹ്യമായ കള്ളിയങ്കാട്ട് നീലിയുടെ കഥയിൽ നിന്ന് പ്രചോദനം ഉൾക്കൊണ്ടാണ് ഒരുക്കിയത്. സാൻഡി, ചന്തു സലിംകുമാർ, അരുൺ കുര്യൻ, ശരത് സഭ, നിഷാന്ത് സാഗർ, വിജയരാഘവൻ എന്നിവരും ചിത്രത്തിന്റെ താരനിരയിലുണ്ട്. കൂടാതെ ദുൽഖർ സൽമാൻ, ടൊവിനോ തോമസ്, സണ്ണി വെയ്ൻ തുടങ്ങിയവരും കാമിയോ റോളിൽ ചിത്രത്തിലെത്തുന്നു. ചിത്രത്തിൻറെ അടുത്ത ഭാഗം ടൊവിനോ തോമസ് പ്രധാന കഥാപാത്രമായി എത്തുന്ന ചാത്തന്മാരുടെ കഥയാണ് പറയുന്നത്. ലോക ആദ്യ ഭാഗം അവസാനിക്കുന്നത് ചാത്തന്റെ ഇൻട്രോയോട് കൂടിയാണ്.
