2025-ൽ റിലീസ് ചെയ്യാനിരിക്കുന്ന വൈആർഎഫ് സ്പൈ യൂണിവേഴ്സ് ചിത്രമായ വാർ 2-ൽ ജൂനിയർ എൻടിആർ, ഹൃത്വിക് റോഷൻ, കിയാര അദ്വാനി എന്നിവർ അഭിനയിക്കുന്നു.
മുംബൈ: വൈആർഎഫ് സ്പൈ യൂണിവേഴ്സ് സിനിമയായ 'വാർ 2' 2025-ല് ബോളിവുഡ് ഏറ്റവും പ്രതീക്ഷ അര്പ്പിക്കുന്ന പ്രോജക്റ്റുകളിലൊന്നാണ്. ഹൃത്വിക് റോഷനും എൻടിആർ ജൂനിയറും ആദ്യമായി ഒരുമിച്ച് അഭിനയിക്കുന്ന ഈ ചിത്രത്തിന്റെ ടീസര് പുറത്തിറങ്ങിയത് മെയ് 20നാണ്. ജൂനിയര് എന്ടിആറിന്റെ ജന്മദിനമായ മെയ് 20നാണ് ടീസര് ഇറങ്ങിയിരിക്കുന്നത്.
സിനിമാ തിയേറ്ററുകളിൽ വന് ഹൈപ്പ് സൃഷ്ടിക്കും എന്ന് കരുതുന്ന ചിത്രം അയാൻ മുഖർജിയാണ് സംവിധാനം ചെയ്യുന്നത്. ബ്രഹ്മാസ്ത്ര പോലുള്ള ചിത്രങ്ങള് ഒരുക്കിയ അയാന് മുഖര്ജിയുടെ വൈആർഎഫ് സ്പൈ യൂണിവേഴ്സിലെ ആദ്യത്തെ ചിത്രമാണ് വാര് 2. ചിത്രം ഹിന്ദിക്ക് പുറമേ തെലുങ്ക്, തമിഴ് ഭാഷകളിലും ഇറങ്ങും.
2025 ഓഗസ്റ്റ് 14-ന് ലോകമെമ്പാടുമുള്ള തിയേറ്ററുകളില് ചിത്രം റിലീസ് ചെയ്യും എന്നാണ് പ്രഖ്യാപിക്കപ്പെട്ടിരിക്കുന്നത്. ഹൃതിക് റോഷൻ, ജൂനിയർ എൻടിആർ, കിയാര അദ്വാനി എന്നിവർ അഭിനയിക്കുന്ന ഈ ചിത്രത്തില് വൈആർഎഫ് സ്പൈ യൂണിവേഴ്സിലെ മറ്റ് താരങ്ങളായ സല്മാന്റെ ടൈഗറോ, ഷാരൂഖിന്റെ പഠാനോ ക്യാമിയോ ആയി എത്തുമോ എന്നാണ് പ്രേക്ഷകര് ഉറ്റുനോക്കുന്നത്. ഒപ്പം ചിത്രം ആഗോള ബോക്സ് ഓഫീസിൽ എന്ത് തരംഗം സൃഷ്ടിക്കും എന്നത് ബോളിവുഡ് ഉറ്റുനോക്കുന്ന കാര്യമാണ്.
Related Articles
ഇപ്പോഴിതാ ചിത്രത്തിലെ പ്രധാന താരങ്ങളുടെ ശമ്പള വിവരങ്ങളാണ് പുറത്തുവരുന്നത്. കൊയ്മോയിയുടെ റിപ്പോര്ട്ട് പ്രകാരം ജൂനിയർ എൻടിആർ വാർ 2 ൽ 60 കോടി രൂപ പ്രതിഫലത്തിന് കരാറിൽ ഒപ്പുവച്ചുവെന്നാണ് വിവരം. ഇത് ആർആർആറിന് അദ്ദേഹം വാങ്ങിയ 45 കോടി രൂപ പ്രതിഫലത്തെക്കാള് അധികമാണ്.
മേജർ കബീർ എന്ന കഥാപാത്രത്തെ വീണ്ടും അവതരിപ്പിക്കുന്ന ഹൃത്വിക് റോഷൻ 2019-ൽ വാറിനെ ബോക്സ് ഓഫീസ് ഹിറ്റാക്കിയ നായക നടനാണ്. വാര് 2വില് എത്തുമ്പോള് ഹൃത്വിക് റോഷന്റെ ഫീസ് 48 കോടി രൂപയാണ് എന്നാണ് റിപ്പോർട്ട്, ഇത് യാഷ് രാജ് ഫിലിംസിനൊപ്പമുള്ള അദ്ദേഹത്തിന്റെ മുൻ ചിത്രങ്ങളേക്കാൾ കൂടുതലാണ്.
കിയാര അദ്വാനിയാണ് ഹൃത്വിക് റോഷന്റെ നായികയായി അഭിനയിക്കുന്നത്. ഒരു നിർണായക വേഷമാകുമെന്ന് പ്രതീക്ഷിക്കുന്ന ചിത്രത്തിൽ, കിയാരയ്ക്ക് 15 കോടി രൂപ പ്രതിഫലം ലഭിക്കുന്നതായി റിപ്പോർട്ടുണ്ട് - ഇതുവരെയുള്ള കിയാരയുടെ ഏറ്റവും വലിയ ശമ്പളമാണ് ഇതെന്നാണ് വിവരം. അതേ സമയം ഹൃത്വിക്കിനെക്കാള് കൂടിയ പ്രതിഫലം ജൂനിയര് എന്ടിആറിന് ഉണ്ട് എന്നത് ശരിക്കും ബോളിവുഡിനെ ഞെട്ടിച്ചിട്ടുണ്ട്.
