ഐടെൽ പുതിയ ബജറ്റ് ഫീച്ചർ ഫോണായ ഏസ് 3 ഹീര ഇന്ത്യൻ വിപണിയിൽ അവതരിപ്പിച്ചു. 949 രൂപ വിലയുള്ള ഈ മോഡലിൽ ടൈപ്പ്-സി ചാർജിങ്, 1,000 എംഎഎഎച്ച് ബാറ്ററി, ഓട്ടോമാറ്റിക് കോൾ റെക്കോർഡിങ് തുടങ്ങിയ സവിശേഷതകളുണ്ട്.
ബജറ്റ് വിഭാഗത്തിൽ പുതിയ ഫീച്ചർ ഫോൺ അവതരിപ്പിച്ച് ഐടെൽ. ഐടെൽ ഏസ് 3 ഹീര എന്ന പേരിലാണ് കമ്പനി പുതിയ മോഡൽ ഇന്ത്യൻ വിപണിയിലെത്തിച്ചത്. 949 രൂപയാണ് ഫോണിന്റെ വില. ടൈപ്പ്-സി ചാർജിങ് പോർട്ട്, 1,000 എംഎഎഎച്ച് ബാറ്ററി, ബ്ലൂടൂത്ത് കണക്റ്റിവിറ്റി, ഓട്ടോമാറ്റിക് കോൾ റെക്കോർഡിങ് തുടങ്ങിയ സവിശേഷതകളുമായാണ് പുതിയ മോഡൽ എത്തുന്നത്. ബ്ലാക്ക്, ബ്ലൂ, പർപ്പിൾ എന്നീ മൂന്ന് നിറങ്ങളിലാണ് ഫോൺ ലഭ്യമാകുന്നത്. രാജ്യത്തെ റീട്ടെയിൽ സ്റ്റോറുകൾ വഴി ഉപഭോക്താക്കൾക്ക് ഫോൺ വാങ്ങാനാകും.
ഒരു വർഷത്തെ റീപ്ലേസ്മെന്റ് വാറന്റി
ഐടെൽ ഏസ് 2 ഹീരയുടെ പിൻഗാമിയായാണ് പുതിയ മോഡൽ അവതരിപ്പിച്ചിരിക്കുന്നത്. മുൻ മോഡലിന്റെ വില 1,109 രൂപയായിരുന്നു. പുതിയ ഐടെൽ ഏസ് 3 ഹീരയ്ക്ക് നിർമാണത്തിലെ തകരാറുകൾ കണ്ടെത്തിയാൽ ഒരു വർഷത്തെ കൗണ്ടർ റീപ്ലേസ്മെന്റ് സൗകര്യവും കമ്പനി പ്രഖ്യാപിച്ചിട്ടുണ്ട്.
9.64 മണിക്കൂർ ടോക്ക് ടൈം, സൂപ്പർ ബാറ്ററി മോഡ്
1.8 ഇഞ്ച് ഡിസ്പ്ലേയാണ് ഫോണിൽ നൽകിയിരിക്കുന്നത്. 1,000 എംഎഎഎച്ച് ശേഷിയുള്ള ബാറ്ററിയാണ് കരുത്ത് പകരുന്നത്. എഐ അധിഷ്ഠിത ബാറ്ററി മാനേജ്മെന്റ് സംവിധാനവും ഫോണിലുണ്ട്. ഒറ്റ ചാർജിൽ പരമാവധി 9.64 മണിക്കൂർ വരെ ടോക്ക് ടൈമും 177 മണിക്കൂർ വരെ സ്റ്റാൻഡ്ബൈ സമയവും ലഭിക്കുമെന്നാണ് കമ്പനിയുടെ അവകാശവാദം. ബാറ്ററി കുറഞ്ഞ ശേഷിയിലായിരിക്കുമ്പോഴും കൂടുതൽ സമയം ഉപയോഗിക്കാൻ സഹായിക്കുന്ന സൂപ്പർ ബാറ്ററി മോഡും ഫോണിൽ ഉൾപ്പെടുത്തിയിട്ടുണ്ട്.
Related Articles
ടൈപ്പ്-സി പോർട്ട്, ബ്ലൂടൂത്ത്, 32 ജിബി വരെ സ്റ്റോറേജ്
യുഎസ്ബി ടൈപ്പ്-സി പോർട്ടും ബ്ലൂടൂത്ത് കണക്റ്റിവിറ്റിയും ഫോണിന്റെ പ്രധാന സവിശേഷതകളാണ്. മൈക്രോ എസ്ഡി കാർഡിന്റെ സഹായത്തോടെ 32 ജിബി വരെ സ്റ്റോറേജ് വികസിപ്പിക്കാനാകും. ഓട്ടോമാറ്റിക് കോൾ റെക്കോർഡിങ്, റെക്കോർഡിങ് സൗകര്യത്തോടെയുള്ള വയർലെസ് എഫ്എം റേഡിയോ, സ്പീഡ് ഡയൽ എന്നിവയും ഫോണിൽ ലഭ്യമാണ്. 500 കോൺടാക്റ്റുകളും 250 സന്ദേശങ്ങളും വരെ ഫോണിൽ സംഭരിക്കാനാകും.
വോയിസ് അസിസ്റ്റന്റും പ്രാദേശിക ഭാഷകൾക്കും പിന്തുണ
ഇംഗ്ലീഷിനും ഹിന്ദിക്കും പിന്തുണയുള്ള കിങ് ടോക്കർ വോയ്സ് അസിസ്റ്റന്റും ഐടെൽ ഏസ് 3 ഹീരയിൽ ഉൾപ്പെടുത്തിയിട്ടുണ്ട്. ഇതിന് പുറമെ 10 പ്രാദേശിക ഭാഷകൾക്കും ഫോൺ പിന്തുണ നൽകുന്നുണ്ട്. കുറഞ്ഞ വിലയിൽ കൂടുതൽ സൗകര്യങ്ങൾ തേടുന്നവരെ ലക്ഷ്യമിട്ടാണ് പുതിയ ഫീച്ചർ ഫോൺ കമ്പനി അവതരിപ്പിച്ചിരിക്കുന്നത്.
