പ്രായം 30 കഴിഞ്ഞോ? എങ്കിൽ ഈ മെഡിക്കൽ ടെസ്റ്റുകൾ ചെയ്തിരിക്കണം, ഹെൽത്ത് ചെക്കപ്പ് ലിസ്റ്റ് ഇതാ

30 വയസിന് മുകളിലുള്ള പുരുഷൻമാര്‍ക്കും സ്ത്രീകൾക്കും പല തരത്തിലുള്ള ആരോഗ്യപ്രശ്നങ്ങൾ വരാനുള്ള സാധ്യത കൂടുതലാണ്. ഇടയ്ക്കിടെയുള്ളതും വിട്ടുമാറാത്തതുമായ ആരോഗ്യ പ്രശ്നങ്ങൾ ഉണ്ടാകാനുള്ള സാധ്യത മുന്നിൽക്കണ്ട് ചില ടെസ്റ്റുകൾ നടത്തേണ്ടതുണ്ട്. 

Image Credit : Getty

രക്തപരിശോധനകൾ

ലിപിഡ് പ്രൊഫൈൽ: രക്തത്തിലെ കൊളസ്‌ട്രോളിന്റെ (HDL, LDL, Triglycerides) അളവ് അറിയാനാണ് ഈ ടെസ്റ്റ് നടത്തുന്നത്. ഇത് ഹൃദ്രോഗ സാധ്യത മുൻകൂട്ടി അറിയാൻ സഹായിക്കും.

ബ്ലഡ് ഷുഗർ (Fastng & HbA1c): പ്രമേഹം ഉണ്ടോ എന്ന് കണ്ടെത്താൻ ഈ പരിശോധന സഹായിക്കും. HbA1c ടെസ്റ്റ് നടത്തുന്നതിലൂടെ കഴിഞ്ഞ മൂന്ന് മാസത്തെ ശരാശരി ഷുഗർ നില മനസിലാക്കാൻ സാധിക്കും.

ഇതിനൊപ്പം കംപ്ലീറ്റ് ബ്ലഡ് കൗണ്ട് കൂടി പരിശോധിക്കുന്നത് നന്നായിരിക്കും. ഇതിലൂടെ വിളർച്ച (അനീമിയ), ഇൻഫെക്ഷനുകൾ എന്നിവ കണ്ടെത്താം.

Image Credit : Getty

ഓര്‍ഗൻ ഫംഗ്ഷൻ ടെസ്റ്റ്

അവയവങ്ങളുടെ പ്രവർത്തനം അറിയാൻ ഓര്‍ഗൻ ഫംഗ്ഷൻ ടെസ്റ്റ് നടത്താം.

ലിവർ ഫം​ഗ്ഷൻ ടെസ്റ്റ് (എൽഎഫ്ടി): കരളിന്റെ ആരോഗ്യം അറിയാൻ എൽഎഫ്ടി പരിശോധന നടത്താം. ഇതുവഴി ഫാറ്റി ലിവർ പോലെയുള്ള പ്രശ്നങ്ങൾ തുടക്കത്തിൽ തന്നെ കണ്ടെത്താൻ സഹായിക്കും.

കിഡ്നി ഫംഗ്ഷൻ ടെസ്റ്റ്: വൃക്കകളുടെ പ്രവർത്തനം കൃത്യമാണോ എന്ന് മനസ്സിലാക്കാൻ (ക്രിയാറ്റിൻ, യൂറിയ നിലകൾ) കിഡ്നി ഫംഗ്ഷൻ ടെസ്റ്റ് നടത്താം.

Image Credit : stockPhoto

ഹൃദയാരോഗ്യം

രക്തസമ്മർദ്ദം: 'നിശബ്ദ കൊലയാളി' എന്ന് വിളിക്കപ്പെടുന്ന ബ്ലഡ് പ്രഷര്‍ അഥവാ രക്തസമ്മര്‍ദ്ദം കൃത്യമായ ഇടവേളകളിൽ പരിശോധിക്കണം.

ഇ.സി.ജി: ഹൃദയമിടിപ്പിലെ വ്യതിയാനങ്ങൾ അറിയാൻ ഇസിജി പരിശോധിക്കാം.

Image Credit : Getty

വൈറ്റമിൻ പരിശോധനകൾ

വൈറ്റമിൻ ഡി, ബി12: ഇന്നത്തെ കാലത്ത് മിക്കവരിലും വൈറ്റമിൻ ഡിയുടെ കുറവ് കാണാറുണ്ട്. പ്രത്യേകിച്ച് പുരുഷൻമാരിൽ വൈറ്റമിൻ ഡി കുറവാണ് കാണാറുള്ളത്. ഇത് എല്ലുകളുടെ ആരോഗ്യത്തിനും മാനസികാവസ്ഥയ്ക്കും പ്രധാനമാണ്. അതിനാൽ വൈറ്റമിൻ പരിശോധനകൾ നടത്താൻ മടിക്കരുത്.

Image Credit : Getty

മറ്റ് ശാരീരിക പരിശോധനകൾ

ബോഡി മാസ് ഇൻഡെക്സ്: അമിതഭാരം ഉണ്ടോ എന്നറിയാൻ ബോഡി മാസ് ഇൻഡെക്സ് പരിശോധിക്കാം. ജീവിതശൈലി ക്രമീകരിക്കാൻ ഇത് സഹായിക്കും.

യൂറിക് ആസിഡ്: സന്ധിവേദനയും മറ്റും ഒഴിവാക്കാൻ യൂറിക് ആസിഡിന്റെ അളവ് നോക്കുന്നത് നല്ലതാണ്.