ഇനിയും ബ്ലാക്ക്ഹെഡ്സ് മാറിയില്ലേ? പരീക്ഷിക്കാം ഈ പൊടിക്കൈകള്‍...
ബ്ലാക്ക്ഹെഡ്സ് ഇന്ന് ഒരു സൗന്ദര്യപ്രശ്നമായി അലട്ടാത്തവർ വിരളമായിരിക്കും. ചര്‍മ്മത്തിലെ സുഷിരങ്ങളില്‍ അഴുക്കടിഞ്ഞു കൂടുന്നതുകൊണ്ടാണ് പ്രധാനമായും ബ്ലാക്ക്ഹെഡ്സ് രൂപപ്പെടുന്നത്. മൂക്ക്, കവിൾ, താടി തുടങ്ങിയ ഭാഗങ്ങളിലാണ് പ്രധാനമായും ബ്ലാക്ക്ഹെഡ്സ് കാണുന്നത്. ബ്ലാക്ക്ഹെഡ്സ് അകറ്റാന്‍ വീട്ടില്‍ പരീക്ഷിക്കാവുന്ന ചില പൊടിക്കൈകള്‍ എന്തൊക്കെയാണെന്ന് നോക്കാം.
ഒന്ന്...
ആരോഗ്യത്തിന് മാത്രമല്ല, സൗന്ദര്യത്തിനും ഗ്രീന്‍ ടീ സഹായിക്കും. ബ്ലാക്ക്ഹെഡ്സിനെ നീക്കം ചെയ്യാന്‍ ആന്‍റിഓക്സിഡന്‍റുകള്‍ അടങ്ങിയ ഗ്രീന്‍ ടീ ഉപയോഗിക്കാം. ഇതിനായി ആദ്യം വെള്ളം ചൂടാക്കുക. ശേഷം വെള്ളം തിളയ്ക്കുമ്പോള്‍ ഇതിലേയ്ക്ക് ഗ്രീന്‍ ടീ ബാഗ് ഇടാം. തണുത്തതിന് ശേഷം ഈ ബാഗ് പൊട്ടിച്ച് ഗ്രീന്‍ ടീ ഇലകള്‍ ബ്ലാക്ക്ഹെഡ്സ് ഉള്ള ഭാഗങ്ങള്‍ പുരട്ടാം. ആഴ്ചയില്‍ രണ്ട് ദിവസമെങ്കിലും ഇത് ചെയ്യാം.
രണ്ട്...
ബേക്കിംഗ് സോഡയും ബ്ലാക്ക്ഹെഡ്സിനെ നീക്കം ചെയ്യാന്‍ സഹായിക്കും. ഇതിനായി അരടീസ്പൂണ്‍ ബേക്കിംഗ് സോഡ ഒരു ടീസ്പൂണ്‍ വെള്ളത്തില്‍ ചേര്‍ത്ത് മിശ്രിതമാക്കുക. ശേഷം ഈ മിശ്രിതം ബ്ലാക്ക്ഹെഡ്സുള്ള ഭാഗങ്ങളില്‍ പുരട്ടാം. പത്ത് മിനിറ്റിന് ശേഷം തണുത്ത വെള്ളത്തില്‍ കഴുകാം.
മൂന്ന്...
പല സൗന്ദര്യപ്രശ്നങ്ങള്‍ക്കുമുള്ള ഉത്തമ പരിഹാരമാണ് തേന്‍. ബ്ലാക്ക്ഹെഡ്സ് ഇല്ലാതാക്കാനും തേന്‍ സഹായിക്കും. ഇതിനായി മുഖത്ത് ആവി പിടിച്ചതിന് ശേഷം ബ്ലാക്ക്ഹെഡ്സുള്ള ഭാഗങ്ങളില്‍ തേന്‍ പുരട്ടാം. ശേഷം പഞ്ഞിയോ കോട്ടണ്‍ തുണിയോ കൊണ്ട് ഈ ഭാഗം മൂടാം. ഉണങ്ങിയതിന് ശേഷം തുണി മാറ്റാം. തേനില്‍ പഞ്ചസാര മിക്സ് ചെയ്ത് മസാജ് ചെയ്യുന്നതും ബ്ലാക്ക്ഹെഡ്സ് മാറാന്‍ സഹായിക്കും.
നാല്...
ചെറുനാരങ്ങ മുറിച്ചതിന് മുകളില്‍ പഞ്ചസാര വിതറിയും ബ്ലാക്ക്ഹെഡ്സുള്ള ഭാഗത്ത് സ്‌ക്രബ് ചെയ്യാം. ആഴ്ചയില്‍ രണ്ട് ദിവസം വരെയൊക്കെ ഇങ്ങനെ ചെയ്യുന്നതും ബ്ലാക്ക്ഹെഡ്സ് മാറാന്‍ സഹായിക്കും.
അഞ്ച്...
ബ്ലാക്ക്ഹെഡുകൾ നീക്കം ചെയ്യാന്‍ ഓട്സ് സഹായിക്കും. ഇതിനായി ആദ്യം ഓട്സ് നന്നായി പൊടിച്ച് പൗഡർ രൂപത്തിലാക്കുക. ഇനി ഇതിലേയ്ക്ക് കട്ടത്തൈരും ഒലീവ് ഓയിലും ചേർത്ത് പേസ്റ്റ് രൂപത്തിലാക്കാം. ശേഷം ഈ മിശ്രിതം മുഖത്ത് പുരട്ടാം. 20 മിനിറ്റിന് ശേഷം തണുത്ത വെള്ളത്തിൽ കഴുകി കളയാം. ആഴ്ചയിൽ രണ്ടോ മൂന്നോ തവണ ഇത് ചെയ്യാവുന്നതാണ്.
