മത്സ്യത്തൊഴിലാളികളുടെ പ്രശ്നം പരിഹരിക്കാന്‍ ഒപ്പമുണ്ടാകും: രാഹുല്‍ ഗാന്ധി
കേരള സന്ദര്‍ശനത്തിനിടെ മത്സ്യത്തൊഴിലാളികളുടെ പ്രശ്നങ്ങളെ കുറിച്ച് മനസിലാക്കാനെത്തിയ കോണ്‍ഗ്രസ് എം പി രാഹുല്‍ ഗാന്ധി മത്സ്യത്തൊഴിലാളികള്‍ക്കൊപ്പം കടലില്‍ മത്സ്യബന്ധനം നടത്തി. ഏതാണ്ട് രണ്ട് മണിക്കൂറുകളോളം രാഹുല്‍ ഗാന്ധി മത്സ്യത്തൊഴിലാളികള്‍ക്കൊപ്പം കടലില്‍ ചിലവഴിച്ചു. അവർക്കൊപ്പം കടലിൽ സമയം ചിലവിട്ടതോടെ തൊളിലാളികൾ കടലില്‍ നേരിടുന്ന ബുദ്ധിമുട്ടുകൾ മനസിലാക്കാൻ തനിക്ക് സാധിച്ചെന്ന് രാഹുൽ ഗാന്ധി എം പി പറഞ്ഞു. തൊഴിലാളികളുടെ വിഷമങ്ങൾ പരിഹരിക്കാൻ ശ്രമിക്കുമെന്നും അദ്ദേഹം പറഞ്ഞു.
ഇന്നലെ കൊല്ലത്തെത്തിയ രാഹുല്‍ ഗാന്ധി വാടി കടപ്പുറത്ത് നിന്നും മത്സ്യത്തൊഴിലാളികൾക്കൊപ്പം മത്സ്യ ബന്ധന ബോട്ടിലാണ് യാത്ര നടത്തിയത്. ഏകദേശം രണ്ട് മണിക്കൂറോളം രാഹുൽ മത്സ്യത്തൊഴിലാളികൾക്ക് ഒപ്പം കടലിൽ ചിലവഴിച്ചു. തൊഴിലാളികളുടെ പ്രശ്നങ്ങൾ മനസിലാക്കാൻ കടൽ യാത്രയിലൂടെ സാധിച്ചെന്ന് രാഹുൽ പറഞ്ഞു. കൊല്ലം തങ്കശേരി കടപ്പുറത്ത് രാഹുല്‍ ഗാന്ധിയും മത്സ്യത്തൊഴിലാളികളും തമ്മില്‍ സംവാദവും നടന്നു. (കൂടുതല്‍ ചിത്രങ്ങള്‍ കാണാന്‍ Read More - ല്‍ ക്ലിക്ക് ചെയ്യുക)
ആഴക്കടൽ മൽസ്യബന്ധന വിവാദത്തിൽ സംസ്ഥാന സർക്കാരിനെതിരെ പ്രതിഷേധം ശക്തമാക്കുന്നതിനിടെയാണ് ഇന്ന് മത്സ്യ തൊഴിലാളികളുമായുള്ള രാഹുലിന്‍റെ സംവാദമെന്നത് ശ്രദ്ധേയമാണ്. യുഡിഎഫ് പ്രകടന പത്രികയിൽ മത്സ്യ തൊഴിലാളികൾക്ക് പ്രത്യേക പരിഗണന നൽകുമെന്ന് കോൺഗ്രസ് എംപി രാഹുൽ ഗാന്ധി പറഞ്ഞു.
ഇതിനായി മത്സ്യ തൊഴിലാളികളുമായി നിരന്തരം ആശയവിനിമയം നടത്തി അവരുടെ ആവശ്യങ്ങൾ മനസിലാക്കാൻ സംസ്ഥാന നേതാക്കളോട് ആവശ്യപ്പെട്ടിട്ടുണ്ടെന്നും നികുതി പിൻവലിക്കണമെന്ന ആവശ്യം യുഡിഎഫ് പ്രകടന പത്രികയിൽ ഉണ്ടാകുമെന്നും രാഹുൽ വ്യക്തമാക്കി.
ഏറ്റവും ഉറപ്പുള്ള വാഗ്ദാനങ്ങളാണ് യുഡിഎഫ് മത്സ്യ തൊഴിലാളികൾക്ക് നൽകുന്നത്. പ്രകടന പത്രികയിൽ എന്തൊക്കെ ഉൾപ്പെടുത്തുന്നുവോ അതെല്ലാം നടപ്പിലാക്കുമെന്ന് താൻ ഉറപ്പ് നൽകുകയാണെന്നും അദ്ദേഹം കൂട്ടിച്ചേർത്തു.
മത്സ്യ തൊഴിലാളി മേഖലയിലെ പ്രശ്നങ്ങൾ കഴിയും വിധം പരിഹരിക്കാൻ ശ്രമിക്കുമെന്ന് ഉറപ്പു നല്‍കിയ രാഹുല്‍ ഗാന്ധി ഇതിനായി പ്രത്യേക വകുപ്പ് കേന്ദ്രത്തില്‍ രൂപീകരിക്കുമെന്നും പറഞ്ഞു.
മത്സ്യ തൊഴിലാളികൾക്കായി ഒരു മന്ത്രാലയം കേന്ദ്രത്തിലില്ലെന്നും കേന്ദ്രത്തില്‍ അധികാരം ലഭിച്ചാല്‍ ഇതിനായി ശ്രമിക്കുമെന്നും അദ്ദേഹം മത്സ്യത്തൊഴിലാളികളുമായി നടന്ന സംവാദത്തിനിടെ പറഞ്ഞു.
