- Home
- Yatra
- Destinations (Yatra)
- മൂന്നാർ മാത്രമല്ല ഇടുക്കി; അടുത്ത യാത്രയിൽ ഉൾപ്പെടുത്തേണ്ട ചില ഡെസ്റ്റിനേഷനുകൾ
മൂന്നാർ മാത്രമല്ല ഇടുക്കി; അടുത്ത യാത്രയിൽ ഉൾപ്പെടുത്തേണ്ട ചില ഡെസ്റ്റിനേഷനുകൾ
കേരളത്തിലെ പ്രശസ്തമായ വിനോദസഞ്ചാര കേന്ദ്രങ്ങളുള്ള ജില്ലയാണ് ഇടുക്കി. കാഴ്ചകളാൽ സമ്പന്നമായ ഇടുക്കിയിലേയ്ക്കുള്ള യാത്രയിൽ ഉറപ്പായും കണ്ടിരിക്കേണ്ട ചില സ്ഥലങ്ങളുണ്ട്.
മൂന്നാർ
ഇടുക്കിയിലെ ഏറ്റവും പ്രശസ്തമായ വിനോദസഞ്ചാര കേന്ദ്രമാണ് മൂന്നാർ. സമുദ്രനിരപ്പിൽ നിന്ന് ഏകദേശം 1,600 മീറ്റർ ഉയരത്തിൽ സ്ഥിതി ചെയ്യുന്ന മൂന്നാറിൽ തേയിലത്തോട്ടങ്ങളുടെ വിശാലമായ കാഴ്ചയും തണുത്ത കാലാവസ്ഥയുമാണ് പ്രധാന ആകർഷണം. ഇരവികുളം നാഷണൽ പാർക്ക്, മാട്ടുപ്പെട്ടി ഡാം, എക്കോ പോയിന്റ്, ടോപ് സ്റ്റേഷൻ എന്നിവ മൂന്നാറിലെ പ്രധാന കാഴ്ചകളാണ്.
ഇടുക്കി ഡാം, കുളമാവ്
ഏഷ്യയിലെ തന്നെ ആദ്യത്തെ ആർച്ച് ഡാമാണ് ഇടുക്കി ഡാം. ഒരു എൻജിനീയറിങ് അത്ഭുതം തന്നെയാണിത്. കുറവൻ, കുറത്തി മലകൾക്കിടയിലായി നിർമ്മിച്ചിരിക്കുന്ന ഈ ഡാമിന്റെ ഗാംഭീര്യം നേരിട്ട് കണ്ടറിയുക തന്നെ വേണം.
വാഗമൺ
കോട്ടയം-ഇടുക്കി അതിർത്തിയിൽ സ്ഥിതി ചെയ്യുന്ന വാഗമൺ അതിമനോഹരമായ ഹിൽസ്റ്റേഷനാണ്. മൊട്ടക്കുന്നുകൾക്കും പൈൻ മരക്കാടുകൾക്കും പ്രസിദ്ധമായ ഇവിടുത്തെ കുരിശുമലയും തങ്ങൾപാറയും സന്ദർശകർക്ക് സമാധാനപരമായ അന്തരീക്ഷം നൽകുന്നു. സാഹസികത ഇഷ്ടപ്പെടുന്നവർക്ക് വാഗമണ്ണിൽ പാരഗ്ലൈഡിംഗും ഗ്ലാസ് ബ്രിഡ്ജും പരീക്ഷിക്കാവുന്നതാണ്.
രാമക്കൽമേട്
ഇടുക്കിയിലെ മനോഹരമായ ഒരു വ്യൂ പോയിന്റാണ് രാമക്കൽമേട്. കാറ്റിന്റെ നാടെന്നറിയപ്പെടുന്ന ഇവിടെ നിന്നാൽ തമിഴ്നാടിന്റെ വിദൂരദൃശ്യങ്ങൾ കാണാൻ സാധിക്കും. കുറവൻ കുറത്തി ശില്പമാണ് ഇവിടുത്തെ മറ്റൊരു ആകർഷണം. എപ്പോഴും ശക്തിയോടെ വീശിയടിക്കുന്ന ശക്തമായ കാറ്റാണ് രാമക്കൽമേട്ടിലെ പ്രത്യേകത.
തേക്കടി
പ്രകൃതി, വന്യജീവി സ്നേഹികൾക്ക് ഏറ്റവും അനുയോജ്യമായ സ്ഥലമാണ് തേക്കടി. പെരിയാർ വന്യജീവി സങ്കേതമാണ് ഇവിടുത്തെ പ്രധാന ആകർഷണം. പെരിയാർ തടാകത്തിലൂടെയുള്ള ബോട്ട് യാത്രയാണ് ഹൈലൈറ്റ്. ഈ യാത്രയ്ക്കിടെ ആനക്കൂട്ടങ്ങളെയും മറ്റ് വന്യമൃഗങ്ങളെയും നേരിട്ട് കാണാൻ സാധിച്ചേക്കും. കാടിനുള്ളിലെ ട്രെക്കിംഗും എലിഫന്റ് സഫാരിയും തേക്കടിയെ സ്പെഷ്യലാക്കുന്നു.
പാഞ്ചാലിമേട്
പുരാണവുമായും ഐതിഹ്യങ്ങളുമായുമെല്ലാം ബന്ധപ്പെട്ടു കിടക്കുന്ന മനോഹരമായ ഒരു ഹിൽ സ്റ്റേഷനാണ് പാഞ്ചാലിമേട്. പാണ്ഡവർ വനവാസകാലത്ത് ഇവിടെ താമസിച്ചിരുന്നു എന്നാണ് വിശ്വാസം. മഞ്ഞുമൂടിയ മലനിരകളും തണുത്ത കാറ്റും ഇവിടേയ്ക്കുള്ള യാത്രയെ അവിസ്മരണീയമാക്കും.
