ഹ്യൂമൻ പാപ്പിലോമ വൈറസ് (HPV) എന്ന വൈറസാണ് ഇതിന് പ്രധാന കാരണം. ലൈംഗിക ബന്ധത്തിലൂടെയാണ് ഈ വൈറസ് പകരുന്നത്. മിക്ക സ്ത്രീകളിലും ശരീരം തന്നെ ഇതിനെ പ്രതിരോധിക്കുമെങ്കിലും, ചിലരിൽ വൈറസ് ബാധ ദീർഘകാലം നിലനിൽക്കുകയും പിന്നീട് കോശങ്ങളിൽ മാറ്റങ്ങൾ വരുത്തി ക്യാൻസറായി മാറുകയും ചെയ്യുന്നു.
സ്ത്രീകളെ ബാധിക്കുന്ന ക്യാൻസറുകളിൽ ഏറ്റവും വേഗത്തിൽ പ്രതിരോധിക്കാൻ സാധിക്കുന്ന ഒന്നാണ് ഗർഭാശയമുഖ അർബുദം അഥവാ Cervical Cancer. എന്നാൽ, അറിവില്ലായ്മയും രോഗലക്ഷണങ്ങൾ അവഗണിക്കുന്നതും മൂലം പലപ്പോഴും ഇത് വൈകിയാണ് തിരിച്ചറിയപ്പെടുന്നത്.
കാരണം
ഹ്യൂമൻ പാപ്പിലോമ വൈറസ് (HPV) എന്ന വൈറസാണ് ഇതിന് പ്രധാന കാരണം. ലൈംഗിക ബന്ധത്തിലൂടെയാണ് ഈ വൈറസ് പകരുന്നത്. മിക്ക സ്ത്രീകളിലും ശരീരം തന്നെ ഇതിനെ പ്രതിരോധിക്കുമെങ്കിലും, ചിലരിൽ വൈറസ് ബാധ ദീർഘകാലം നിലനിൽക്കുകയും പിന്നീട് കോശങ്ങളിൽ മാറ്റങ്ങൾ വരുത്തി ക്യാൻസറായി മാറുകയും ചെയ്യുന്നു.
Related Articles
തിരിച്ചറിയേണ്ട ലക്ഷണങ്ങൾ
തുടക്കത്തിൽ ഈ രോഗത്തിന് കാര്യമായ ലക്ഷണങ്ങൾ കണ്ടെന്നു വരില്ല. എങ്കിലും താഴെ പറയുന്നവ ശ്രദ്ധിക്കണം:
- ആർത്തവ ചക്രത്തിന് പുറമെ കാണുന്ന രക്തസ്രാവം.
- ലൈംഗിക ബന്ധത്തിന് ശേഷമുള്ള രക്തസ്രാവം.
- ആർത്തവവിരാമത്തിന് (Menopause) ശേഷം കാണുന്ന രക്തം.
- ദുർഗന്ധത്തോടു കൂടിയ വെള്ളപോക്ക്.
പ്രതിരോധ മാർഗ്ഗങ്ങൾ
എന്റെ ചികിത്സാനുഭവത്തിൽ നിന്ന് പറയട്ടെ, കൃത്യസമയത്തുള്ള പരിശോധനയാണ് ഏറ്റവും വലിയ മരുന്ന്.
1. HPV വാക്സിനേഷൻ : പെൺകുട്ടികൾക്ക് ഒൻപത് വയസ്സ് മുതൽ ഈ വാക്സിൻ നൽകാം. ലൈംഗിക ജീവിതം ആരംഭിക്കുന്നതിന് മുൻപ് നൽകുന്നതാണ് ഏറ്റവും ഫലപ്രദം.
2. പാപ് സ്മിയർ ടെസ്റ്റ് (Pap Smear): ഗർഭാശയമുഖത്തെ കോശങ്ങളിൽ മാറ്റങ്ങൾ വരുന്നുണ്ടോ എന്ന് പരിശോധിക്കാനുള്ള ലളിതമായ മാർഗ്ഗമാണിത്. 30 വയസ്സ് കഴിഞ്ഞ എല്ലാ സ്ത്രീകളും മൂന്ന് വർഷത്തിലൊരിക്കലെങ്കിലും ഈ ടെസ്റ്റ് ചെയ്യുന്നത് നല്ലതാണ്.
3. HPV ടെസ്റ്റ്: വൈറസിന്റെ സാന്നിധ്യം മുൻകൂട്ടി അറിയാൻ ഈ പരിശോധന സഹായിക്കുന്നു.
ചികിൽസയും അതിജീവനവും
ആദ്യഘട്ടത്തിൽ തന്നെ രോഗം കണ്ടെത്തിയാൽ നൂറ് ശതമാനവും ഭേദമാക്കാൻ സാധിക്കും. ശസ്ത്രക്രിയ, റേഡിയേഷൻ തെറാപ്പി, കീമോതെറാപ്പി എന്നിവയാണ് പ്രധാന ചികിത്സാരീതികൾ. രോഗം പടരുന്നതിന് മുൻപ് തന്നെ ചികിത്സ തേടുക എന്നതാണ് പ്രധാനം. ഭയമല്ല, ജാഗ്രതയാണ് ആവശ്യം. ലക്ഷണങ്ങൾക്കായി കാത്തിരിക്കാതെ കൃത്യമായ ഇടവേളകളിൽ പരിശോധനകൾ നടത്തുക. നിങ്ങളുടെ ആരോഗ്യമാണ് നിങ്ങളുടെ കുടുംബത്തിന്റെ കരുത്ത്.
ലേഖനം തയ്യാറാക്കിയത് :
ഡോ. കാർത്തിക രമേശ് ചന്ദ്ര എം,
ഓങ്കോളജിസ്റ്റ്,
സ്റ്റാർകെയർ, ഹോസ്പിറ്റൽ, കോഴിക്കോട്.
