റഷ്യൻ സൈന്യത്തിലുള്ള മുഴുവൻ ഇന്ത്യക്കാരെയും വിട്ടയയ്ക്കണമെന്ന ആവശ്യവുമായി ഇന്ത്യ. റഷ്യൻ സൈന്യത്തിലേക്ക് റിക്രൂട്ട് ചെയ്ത ഏകദേശം 140 ഇന്ത്യൻ പൗരന്മാരെ വിട്ടയയ്ച്ചുവെന്നാണ് ഇന്ത്യയുടെ കണക്ക്. എന്നാൽ റഷ്യൻ സൈന്യത്തിൽ സേവനം അനുഷ്ഠിക്കുന്ന 55 പേരെ കുറിച്ചുള്ള വിവരങ്ങൾ യോഗത്തിൽ ഇന്ത്യ റഷ്യയോട് ആരാഞ്ഞിട്ടുണ്ട്.
ദില്ലി: റഷ്യൻ സൈന്യത്തിൽ നിർബന്ധിതമായി റിക്രൂട്ട് ചെയ്യപ്പെട്ട 55 ഇന്ത്യൻ പൗരന്മാർ ഇനിയും അവിടെ തുടരുന്നതായി വിദേശകാര്യ മന്ത്രാലയം. ദില്ലിയിൽ നടന്ന ഇന്ത്യ - റഷ്യ കൺസൾട്ടേറ്റീവ് കമ്മിറ്റി യോഗത്തിലാണ് വിവരങ്ങൾ പുറത്തുവിട്ടത്. ഇവരെ എത്രയും വേഗം സൈന്യത്തിൽ നിന്ന് വിടുതൽ ചെയ്ത് നാട്ടിലെത്തിക്കുന്നതിനായി ഇന്ത്യ റഷ്യയ്ക്ക് മേൽ ശക്തമായ സമ്മർദം ചെലുത്തുന്നുണ്ടെന്ന് വാർത്താ ഏജൻസിയായ എഎൻഐ റിപ്പോർട്ട് ചെയ്തു.
ഇതുവരെ റഷ്യൻ സൈന്യത്തിൽ അകപ്പെട്ടുപോയ 140 ഓളം ഇന്ത്യൻ പൗരന്മാരെ വിജയകരമായി ഡിസ്ചാർജ് ചെയ്ത് നാട്ടിലെത്തിക്കാൻ കേന്ദ്ര സർക്കാരിന് സാധിച്ചിട്ടുണ്ട്. റഷ്യൻ അധികൃതരുമായി ഏറ്റവും ഉയർന്ന നയതന്ത്ര തലത്തിൽ തന്നെ നടത്തിയ ചർച്ചകളുടെ ഫലമായാണ് ഇത് സാധ്യമായത്. സൈന്യത്തിൽ ബാക്കിയുള്ള 55 പേരുടെ കൃത്യമായ വിവരങ്ങൾക്കും അവരുടെ സുരക്ഷയ്ക്കുമായി ഇന്ത്യൻ നയതന്ത്രജ്ഞർ റഷ്യൻ ഉദ്യോഗസ്ഥരുമായി നിരന്തരം ബന്ധപ്പെടുന്നുണ്ടെന്ന് യോഗത്തിൽ അറിയിച്ചതായി എഎൻഐ വ്യക്തമാക്കി.
കഴിഞ്ഞ മാസം വിദേശകാര്യ സെക്രട്ടറി വിക്രം മിസ്രി പങ്കുവെച്ച കണക്കുകൾ പ്രകാരം, ആകെ 227 ഇന്ത്യക്കാരാണ് വിവിധ സാഹചര്യങ്ങളിൽ റഷ്യൻ സൈന്യത്തിൻ്റെ ഭാഗമായി മാറിയത്. ഇതിൽ ദൗർഭാഗ്യവശാൽ 51 ഇന്ത്യൻ പൗരന്മാർക്ക് ജീവൻ നഷ്ടപ്പെട്ടതായും അദ്ദേഹം സ്ഥിരീകരിച്ചിരുന്നു.
Related Articles
തൊഴിൽ വാഗ്ദാനം നൽകിയും ഉയർന്ന ശമ്പളം വാഗ്ദാനം ചെയ്തും ഇന്ത്യക്കാരെ ചതിയിൽപ്പെടുത്തി റഷ്യൻ സൈന്യത്തിൽ എത്തിക്കുന്ന വ്യാജ റിക്രൂട്ട്‌മെന്റ് ഏജന്റുമാർക്കെതിരെ ഇന്ത്യൻ അന്വേഷണ ഏജൻസികൾ കർശനമായ നിയമനടപടികൾ സ്വീകരിക്കുന്നുണ്ട്. മനുഷ്യക്കടത്ത് നടത്തുന്ന ഇത്തരം മാഫിയകളെ പൂർണമായും അടിച്ചമർത്താനാണ് ഇന്ത്യൻ ഏജൻസികളുടെ തീരുമാനം.
