കുന്നുകൂടിയ പ്ലാസ്റ്റിക് മാലിന്യങ്ങളുടെ വീഡിയോ ഐഎഫ്എസ് ഉദ്യോഗസ്ഥൻ പങ്കുവെച്ചു. 13,000 അടി ഉയരത്തിൽ പോലും വിനോദസഞ്ചാരികൾ ഉപേക്ഷിച്ച മാലിന്യങ്ങൾ പ്രകൃതിക്ക് ഭീഷണിയാകുന്നതിനെതിരെ രൂക്ഷ വിമർശനമാണ് ഉയരുന്നത്.
ഷിംല: "മലനിരകൾ എന്നെ വിളിക്കുന്നു, ഞാൻ പോയേ തീരൂ" എന്ന യാത്രാപ്രേമികളുടെ പ്രിയപ്പെട്ട മുദ്രാവാക്യത്തെ തിരുത്തിക്കുറിക്കുന്ന ഒരു ദൃശ്യമാണ് ഇപ്പോൾ ഇന്റർനെറ്റിൽ വൈറലാകുന്നത്. ഹിമാചൽ പ്രദേശിലെ മണിമഹേഷ് യാത്രയ്ക്കിടെ മലനിരകളിൽ കുന്നുകൂടി കിടക്കുന്ന പ്ലാസ്റ്റിക് മാലിന്യങ്ങളുടെ വീഡിയോ പങ്കുവെച്ചുകൊണ്ട് ഐഎഫ്എസ് ഉദ്യോഗസ്ഥനായ പർവീൺ കസ്വാനാണ് വിനോദസഞ്ചാരികളുടെ ഉത്തരവാദിത്തമില്ലായ്മയെ രൂക്ഷമായി വിമർശിച്ചത്.
സമുദ്രനിരപ്പിൽ നിന്ന് ഏകദേശം 13,000 അടി ഉയരത്തിലുള്ള പ്രകൃതിരമണീയമായ സ്ഥലങ്ങൾ പോലും പ്ലാസ്റ്റിക് കുപ്പികളും കവറുകളും കൊണ്ട് നിറഞ്ഞിരിക്കുന്ന കാഴ്ചയാണ് വീഡിയോയിലുള്ളത്. "മലനിരകൾ ശരിക്കും നമ്മെ വിളിക്കുകയാണെന്ന് നിങ്ങൾ കരുതുന്നുണ്ടോ? ഹിമാചൽ പ്രദേശിലെ മണിമഹേഷ് യാത്രയിൽ നിന്നുള്ള ദൃശ്യമാണിത്. 13,000 അടി ഉയരത്തിൽ പോലും നാം നമ്മുടെ അടയാളങ്ങൾ അവശേഷിപ്പിക്കുന്നു," - പർവീൺ കസ്വാൻ കുറിച്ചു.
വൈറലായ വീഡിയോയും ജനരോഷവും
കുറഞ്ഞ സമയത്തിനുള്ളിൽ തന്നെ പതിനായിരക്കണക്കിന് ആളുകളാണ് ഈ വീഡിയോ കണ്ടത്. വീഡിയോയ്ക്ക് താഴെ സഞ്ചാരികളുടെയും തീർത്ഥാടകരുടെയും മനോഭാവത്തെ വിമർശിച്ചുകൊണ്ട് നിരവധി പേർ രംഗത്തെത്തി. തീർത്ഥാടനത്തിന് എത്തുന്നവർ പുണ്യസ്ഥലങ്ങൾ ഇത്തരത്തിൽ മലിനമാക്കുന്നത് ആത്മീയതയ്ക്ക് നിരക്കാത്തതാണെന്നും പലരും ചൂണ്ടിക്കാട്ടി. പ്ലാസ്റ്റിക് മാലിന്യങ്ങൾ മലനിരകളിലെ വന്യജീവികൾക്കും ജലസ്രോതസ്സുകൾക്കും വലിയ ഭീഷണിയാകുന്നുവെന്ന് പരിസ്ഥിതി പ്രവർത്തകർ ആശങ്കപ്പെടുന്നു.
Related Articles
വിനോദസഞ്ചാര സീസണുകളിൽ കൃത്യമായ മാലിന്യ സംസ്കരണ സംവിധാനങ്ങൾ ഒരുക്കണമെന്നും നിയമങ്ങൾ ലംഘിക്കുന്നവർക്കെതിരെ കർശന നടപടി വേണമെന്നും സോഷ്യൽ മീഡിയ ഉപയോക്താക്കൾ ആവശ്യപ്പെട്ടു. പല സഞ്ചാരികളും പ്രകൃതിയെ വെറുമൊരു ഫോട്ടോ എടുക്കാനുള്ള പശ്ചാത്തലം മാത്രമായാണ് കാണുന്നതെന്നും, അതൊരു ജീവനുള്ള ആവാസവ്യവസ്ഥയാണെന്ന കാര്യം മറന്നുപോകുന്നുവെന്നും കസ്വാൻ തന്റെ പോസ്റ്റിലൂടെ ഓർമ്മിപ്പിക്കുന്നു.
