സുപ്രീം കോടതി ചീഫ് ജസ്റ്റിസ് സൂര്യകാന്ത് മാർച്ച് 28-ന് ലേ സന്ദർശിക്കും. ചരിത്രത്തിലാദ്യമായി ഒരു ചീഫ് ജസ്റ്റിസ് സൈനിക ബേസ് ക്യാമ്പിലെത്തി സൈനികരെ അഭിസംബോധന ചെയ്യും. ഈ സന്ദർശനത്തിൽ ലേയിലെയും കാർഗിലിലെയും പുതിയ ജില്ലാ കോടതി സമുച്ചയങ്ങളുടെ ഉദ്ഘാടനവും അദ്ദേഹം നിർവഹിക്കും
ദില്ലി: സുപ്രീം കോടതി ചീഫ് ജസ്റ്റിസ് സൂര്യകാന്ത് ഈ മാസം 28 ന് ലേ സന്ദർശിക്കും. ചരിത്രത്തിലാദ്യമായാണ് ഒരു ചീഫ് ജസ്റ്റിസ് ലേയിലെ സൈനിക ബേസ് ക്യാമ്പ് നേരിട്ട് സന്ദർശിച്ച് സൈനികരെ അഭിസംബോധന ചെയ്യുന്നത്. രാജ്യത്തിന്റെ സുരക്ഷാ ചുമതലയിലുള്ള സൈനികരുമായി ചീഫ് ജസ്റ്റിസ് നേരിട്ട് സംവദിക്കുന്ന ഈ സന്ദർശനം അതീവ പ്രാധാന്യത്തോടെയാണ് നിയമ - പ്രതിരോധ വൃത്തങ്ങൾ നോക്കിക്കാണുന്നത്. സൈനികരെ അഭിസംബോധന ചെയ്യുന്നതിനോടൊപ്പം ലേയിലെയും കാർഗിലിലെയും പുതിയ ജില്ലാ കോടതി സമുച്ചയങ്ങളുടെ ഉദ്ഘാടനവും ചീഫ് ജസ്റ്റിസ് നിർവ്വഹിക്കും. ലഡാക്കിലെ നീതിന്യായ സംവിധാനങ്ങൾ ശക്തിപ്പെടുത്തുന്നതിന്റെ ഭാഗമായാണ് പുതിയ കോടതി മന്ദിരങ്ങൾ സജ്ജമാക്കിയിരിക്കുന്നത്. ചീഫ് ജസ്റ്റിസിന്റെ സന്ദർശനത്തോടനുബന്ധിച്ച് ലേയിലും കാർഗിലിലും വിപുലമായ സുരക്ഷാ ക്രമീകരണങ്ങളാണ് ഏർപ്പെടുത്തിയിരിക്കുന്നത്.
ഏഷ്യാനെറ്റ് ന്യൂസ് വാർത്തകൾ തത്സമയം കാണാം
