മാര്‍ച്ച് 31 വരെ കേരളത്തില്‍ ലോക്ക് ഡൗണ്‍; ആശങ്ക വേണ്ടെന്നും സഹകരിക്കണമെന്നും മുഖ്യമന്ത്രി | Live Updates

Covid 19 number of cases in India rising fast states going into lock down  Live Updates 23 March

11:27 PM IST

മലപ്പുറത്തും വയനാട്ടിലും നിരോധനാജ്ഞ പ്രഖ്യാപിച്ചു

കൊവിഡ് 19 ഭീഷണി നിലനില്‍ക്കുന്ന സാഹചര്യത്തില്‍ വയനാട്ടില്‍ നിരോധനാജ്ഞ പ്രഖ്യാപിച്ചു. ഇന്ന് അര്‍ധരാത്രി മുതലാണ് നിരോധനാജ്ഞ പ്രാബല്ല്യത്തില്‍ വരിക. അഞ്ചുപേരില്‍ കൂടുതല്‍ കൂട്ടം കൂടി നില്‍ക്കരുത്. സംസ്ഥാനത്ത് ലോക്ക് ഡൗണ്‍ പ്രഖ്യാപിച്ചതിന് പിന്നാലെ മലപ്പുറത്തും നിരോധനാജ്ഞ പ്രഖ്യാപിച്ചിരുന്നു

10:11 PM IST

രാജ്യത്തെ സിനിമാ മേഖലയും സമ്പൂര്‍ണ്ണ ലോക്ക് ഡൗണിലേക്ക്

കൊവിഡ് 19 ജാഗ്രതയുടെ ഭാഗമായി കേരളമുള്‍പ്പെടെയുള്ള സംസ്ഥാനങ്ങള്‍ ലോക്ക് ഡൗണിലേക്ക് പോകുന്ന സാഹചര്യത്തില്‍ രാജ്യത്ത് സിനിമകളുടെ സെന്‍സറിംഗ് നടപടികള്‍ നിര്‍ത്തിവെക്കാന്‍ സിബിഎഫ്‍സി തീരുമാനമെടുത്തു. ഈ മാസം 31 വരെ തിരുവനന്തപുരം ഉള്‍പ്പെടെ സെന്‍സര്‍ ബോര്‍ഡിന്‍റെ റീജിയണല്‍ ഓഫീസുകള്‍ അടച്ചിടും. സെന്‍ട്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷന്‍ ചെയര്‍മാന്‍ പ്രസൂണ്‍ ജോഷി പുറത്തിറക്കിയ ഉത്തരവിലാണ് ഇക്കാര്യം ചൂണ്ടിക്കാട്ടുന്നത്.

10:11 PM IST

അടച്ചുപൂട്ടൽ നടപ്പാക്കാൻ കർശന നടപടിയുമായി പൊലീസ്; ഐജിമാർ ഉൾപ്പെടെ രംഗത്ത്

സംസ്ഥാനത്ത് പൂർണ്ണ അടച്ചുപൂട്ടൽ പ്രഖ്യാപിച്ച  സാഹചര്യത്തിൽ കർശന നടപടികളുമായി പൊലീസ്. അടച്ചുപൂട്ടൽ സംബന്ധിച്ച നടപടികൾ ഏകോപിപ്പിക്കാൻ ഐ ജിമാർ, ഡി ഐ ജിമാർ,  ജില്ലാ പൊലീസ് മേധാവിമാർ എന്നിവരുടെ നേതൃത്വത്തിൽ ചൊവ്വാഴ്ച രാവിലെ അഞ്ചു മണി മുതൽ ശക്തമായ പൊലീസ് സന്നാഹം നിരത്തുകളിൽ ഉണ്ടാകും. 

10:11 PM IST

കൊവിഡ് 19: രാജ്യത്ത് ഇന്ന് രണ്ട് മരണം, 467 പേര്‍ക്ക് രോഗം സ്ഥിരീകരിച്ചു

കൊവിഡ് ബാധിച്ച് ഇന്നുമാത്രം രാജ്യത്ത് മരിച്ചത് രണ്ടുപേര്‍. ഇതോടെ മരണസംഖ്യ ഒന്‍പതായി ഉയര്‍ന്നു. കൊല്‍ക്കത്തിയിലും ഹിമാചല്‍ പ്രദേശിലുമാണ് മരണം സംഭവിച്ചത്. അമേരിക്കയില്‍ നിന്ന് വന്ന ടിബറ്റന്‍ അഭയാര്‍ത്ഥിയാണ് ഹിമാചല്‍ പ്രദേശില്‍ മരിച്ചത്. ഇറ്റലിയില്‍ നിന്ന് വന്നയാളാണ് മരിച്ച മറ്റൊരാള്‍. ഇയാള്‍ കൊല്‍ക്കത്തയിലെ എഎംആര്‍എ ആശുപത്രിയില്‍ ചികിത്സയിലായിരുന്നു. അതേസമയം രാജ്യത്ത് കൊവിഡ് ബാധിതരുടെ എണ്ണം 467 ആയി ഉയര്‍ന്നു

10:11 PM IST

പൊതുമേഖലാ സ്ഥാപനങ്ങള്‍ക്ക് അവധി

കൊവിഡ് 19 പ്രതിരോധ പ്രവര്‍ത്തനങ്ങളുടെ ഭാഗമായി മാര്‍ച്ച് 31 വരെ വ്യവസായ വകുപ്പിനു കീഴിലുള്ള പൊതുമേഖല സ്ഥാപനങ്ങള്‍ അടച്ചിടും. കൊറോണ പടരുന്ന സാഹചര്യത്തില്‍ കൂടുതല്‍ ആളുകള്‍ ഒന്നിച്ച് ജോലി ചെയ്യുന്ന സാഹചര്യം ഒഴിവാക്കാനാണ് തീരുമാനം.

8:27 PM IST

ഒരു സമയം ഏഴുപേര്‍ മാത്രം; സൂപ്പര്‍ മാര്‍ക്കറ്റുകളില്‍ നിയന്ത്രണം

സംസ്ഥാനത്ത് ലോക്ക് ഡൗണ്‍ പ്രഖ്യാപിച്ച സാഹചര്യത്തില്‍ കൊച്ചിയില്‍ സൂപ്പര്‍ മാര്‍ക്കറ്റുകളില്‍ പ്രവേശനത്തിന് നിയന്ത്രണമേര്‍പ്പെടുത്തി. ഒരു സമയം പരമാവധി ഏഴുപേര്‍ക്ക് മാത്രമായിരിക്കും സൂപ്പര്‍ മാര്‍ക്കറ്റുകളില്‍ പ്രവേശിക്കാന്‍ കഴിയുക. നിലവില്‍ സൂപ്പര്‍മാര്‍ക്കറ്റുകള്‍ക്ക് മുന്‍പില്‍ നീണ്ട ക്യൂവാണ്. ചെറുകടകളില്‍ സാധാരണ തിരക്ക് മാത്രമാണുള്ളത്

8:19 PM IST

അനിതരസാധാരണമായ സാഹചര്യം

അനിതരസാധാരണമായ സാഹചര്യമെന്ന് മുഖ്യമന്ത്രി പിണറായി വിജയൻ വ്യക്തമാക്കി. ആളുകൾ പുറത്തിറങ്ങരുതെന്നും നിര്‍ദ്ദേശം ലംഘിച്ചാൽ അറസ്റ്റ് വേണ്ടി വരുമെന്നും അദ്ദേഹം അറിയിച്ചു. അവശ്യ സാധനങ്ങൾ ഉറപ്പ് വരുത്തും. പൊതു ഗതാഗത സംവിധാനങ്ങൾ ഉണ്ടാകില്ല. സ്വകാര്യ വാഹനങ്ങൾ തടയില്ല. അത്യാവശ്യത്തിന് പുറത്തിറങ്ങുന്നവര്‍ ശാരിരിക അകലം പാലിക്കണമെന്നും മുഖ്യമന്ത്രി അഭ്യര്‍ത്ഥിച്ചു.

8:08 PM IST

അവശ്യസാധനങ്ങള്‍ സുലഭമെന്ന് മന്ത്രി മെഴ്സിക്കുട്ടിയമ്മ

ലോക്ക് ഡൗണ്‍ പ്രഖ്യാപിച്ച സാഹചര്യത്തില്‍ ആശങ്ക വേണ്ടെന്ന് മന്ത്രി ജെ മെഴ്സിക്കുട്ടിയമ്മ. അവശ്യസാധനങ്ങള്‍ സുലഭമെന്നും മന്ത്രി ഏഷ്യാനെറ്റ് ന്യൂസിനോട് പറഞ്ഞു. പൊതുജനങ്ങള്‍ക്ക് വേണ്ട എല്ലാ സൗകര്യങ്ങളും സര്‍ക്കാര്‍ ഒരുക്കുമെന്നും മന്ത്രി വ്യക്തമാക്കി

6:18 PM IST

രോഗവ്യാപനം അതീവ ആശങ്കാജനകമായ സ്ഥിതിയിൽ : മുഖ്യമന്ത്രി

6:18 PM IST

ലോക്ക് ഡൌൺ മാർച്ച് 31

 

6:17 PM IST

കേരളത്തിൽ നിലനിൽക്കുന്നത് അസാധാരണ സാഹചര്യം : മുഖ്യമന്ത്രി

രോഗം സ്ഥിരീകരിച്ച 28 പേരിൽ 25 പേരും ദുബായിൽ നിന്നും എത്തിയവരാണ്. അസാധാരണമായ സാഹചര്യത്തിലേക്കാണ് കേരളം പോകുന്നത്. ഈ അവസ്ഥയിൽ കേരളം മൊത്തം ലോക്ക് ഡൌണ് പ്രഖ്യാപിക്കുന്നു. മാർച്ച് 31 വരെയാണ് നിലവിലെ ലോക്ക് ഡൌണ്. അതിനുശേഷം എന്തു വേണം എന്ന് ആലോചിച്ച് തീരുമാനിക്കും. ലോക്ക് ഡൌണിൽ സംസ്ഥാനം മൊത്തം  അടച്ചിടും പൊതുഗതാഗതം ഉണ്ടാവില്ല. സ്വകാര്യ ബസുകളോ കെഎസ്ആർടിസിയോ ഉണ്ടാവില്ല. എന്നാൽ സ്വകാര്യ വാഹനങ്ങളില്ർ പോകാം. ആശുപത്രികൾ പ്രവർത്തിക്കും. ഇഢന പാചക വിതരണം തുടരും. ആരാധനാലയങ്ങളിൽ ആളെക്കൂട്ടിയുള്ള എല്ലാ പരിപാടികളും റദ്ദാക്കും. അവശ്യസാധനങ്ങൾ വിൽക്കുന്ന കടകള്ർക്ക് തുറക്കാം മറ്റെല്ലാ കടകളും അടച്ചിടും. ഹോട്ടലുകളിൽ ഇരുന്ന് ഭക്ഷണം കഴിക്കാനൻ പാടില്ല. എന്നാൽ ഭക്ഷണം വാങ്ങി വീട്ടിൽ കൊണ്ടു പോകാം. അടിയന്തര ആവശ്യങ്ങൾക്കായി പുറത്തിറങ്ങുമ്പോൾ മറ്റുള്ളവരിൽ നിന്നും അകലം പാലിക്കണം. ചികിത്സയിലുണ്ടായിരുന്ന കണ്ണൂരിലെ ഒരു രോഗി ഇന്ന് ഡിസ്ചാരർജ്ജായി വീട്ടിൽ പോയി. 383 പേർ ആശുപത്രിയിൽ ഇപ്പോഴും ഉണ്ട്. 122 പേരെ ഇന്ന് ആശുപത്രിയിലേക്ക് മാറ്റി. 4291 സാംപിളുകൾ പരിശോധനയ്ക്ക് അയച്ചു. 2987 എണ്ണം നെഗറ്റീവായി റിപ്പോർട്ട് ചെയ്തു.

കാസർഗോഡ് ജില്ലയിലെ സ്ഥിതി മറ്റിടങ്ങളിൽ നിന്നും വ്യത്യസ്തമാണ്. അവിടെ കൂടുതൽ കടുത്ത നിയന്ത്രണങ്ങൾ സർക്കാർ പ്രഖ്യാപിക്കുന്നു. കാസർഗോഡ് ജില്ലയിൽ ഇനിയൊരാളും അനാവശ്യമായി പുറത്തേക്ക് ഇറങ്ങരുത്. ഇറങ്ങിയാൽ അറസ്റ്റ് ചെയ്യുകയും കടുത്ത പിഴത്തുക ഈടാക്കുകയും ചെയ്യും. അന്യസംസ്ഥാനങ്ങളിൽ നിന്നും കേരളത്തിലേക്ക് വരുന്ന എല്ലാവർക്കും 14 ദിവസത്തെ നിരീക്ഷണം ആവശ്യമാണ്.

6:03 PM IST

കേരളത്തിൽ ഇന്ന് മാത്രം 28 കേസ് - തത്സമയസംപ്രേഷണം

5:45 PM IST

കോഴിക്കോട് പുതിയ ഒരു കേസ് കൂടി

കോഴിക്കോട് ജില്ലയിൽ ഒരു കൊവിഡ് കേസ് കൂടി സ്ഥിരീകരിച്ചതായി ജില്ലാ ഭരണകൂടം. കണ്ണൂർ സ്വദേശിയായ യുവാവിനാണ് കൊവിഡ് സ്ഥിരീകരിച്ചിട്ടുള്ളത്. ഇതോടെ കോഴിക്കോട് ജില്ലയിൽ മൂന്ന് പേർക്ക് കൊവിഡ് സ്ഥിരീകരിച്ചതായി ജില്ലാ ഭരണകൂടം വ്യക്തമാക്കി. പുതുതായി കൊവിഡ് സ്ഥിരീകരിച്ചയാൾ വിദേശത്ത് നിന്ന് വന്നതാണോ എന്ന വിവരത്തിൽ ഇതുവരെ വ്യക്തതയില്ല.
 

5:45 PM IST

കോഴിക്കോട്ടെ സ്ഥിതിവിവരക്കണക്ക് ഇങ്ങനെ:

കോഴിക്കോട് ജില്ലയില്‍ ആകെ 8408 പേര്‍ നിരീക്ഷണത്തിലുണ്ട്. ഇതില്‍ 263 പേര്‍ പുതുതായി നിരീക്ഷണത്തില്‍ വന്നവരാണ്. മെഡിക്കല്‍ കോളേജില്‍ 17 പേരും ബീച്ച് ആശുപത്രിയില്‍ 19 പേരും ഉള്‍പ്പെടെ ആകെ 36 പേര്‍ ഐസൊലേഷന്‍ വാര്‍ഡില്‍ നിരീക്ഷണത്തിലാണ്. ബീച്ച് ആശുപത്രിയില്‍ നിന്ന് 8 പേരെ ഡിസ്ചാര്‍ജ്ജ് ചെയ്തു.  

ഇന്നലെ (22/3/20) 14 സ്രവ സാംപിള്‍ പരിശോധനയ്ക്ക് അയച്ചു.  ആകെ 190 സാംപിളുകള്‍ പരിശോധനയ്ക്ക് അയച്ചതില്‍ 162 എണ്ണത്തിന്റെ പരിശോധനാ ഫലം ലഭിച്ചു. 158 എണ്ണം നെഗറ്റീവ് ആണ്. 3 പേരുടെ പരിശോധനാഫലം പോസിറ്റീവ് ആണ്. ഇതില്‍ ഒന്ന് കണ്ണൂര്‍ സ്വദേശിയുടേതാണ്. ഇനി 29 പേരുടെ പരിശോധനാ ഫലം മാത്രമേ ലഭിക്കാന്‍ ബാക്കിയുള്ളു. 

5:45 PM IST

ക്വാലലംപൂരിൽ കുടുങ്ങിയവരെ ഇന്ന് തിരികെ എത്തിക്കും

മലേഷ്യയിലെ ക്വാലലംപൂർ വിമാനത്താവളത്തിൽ കുടുങ്ങിയ ഒരു സംഘം ഇന്ത്യക്കാരെ ഇന്ന് തിരികെ എത്തിക്കും. എയർ ഏഷ്യാ വിമാനത്തിൽ ഇവരെ ചെന്നൈയിലാണ് എത്തിക്കുക. വിവിധ രാജ്യങ്ങളിൽ നിന്ന് ഇന്ത്യയിലേക്കുള്ള യാത്രക്കിടെ ക്വാലലംപൂർ വിമാനത്താവളത്തിൽ കുടുങ്ങിയ 104 പേരെയാണ് തിരികെ എത്തിക്കുന്നത്. 

5:45 PM IST

ശ്രീചിത്രയിലെ ഡോക്ടറുമായി സമ്പർക്കം പുലർത്തിയ ഭൂരിപക്ഷം പേരുടെ ഫലവും നെഗറ്റീവ്, ആശ്വാസം

ശ്രീചിത്രയിലെ ഡോക്ടറുമായി സമ്പര്ക്കം ഉണ്ടായിരുന്ന ഭൂരിപക്ഷം പേരുടെ ഫലവും നെഗറ്റീവ്. കുറച്ചു ഫലങ്ങൾ കൂടി കിട്ടാൻ ഉണ്ട്. തിരുവനന്തപുരത്ത് കൊവിഡ് ബാധിച്ച് ചികിത്സയിൽ കഴിയുന്ന ഇറ്റാലിയൻ സ്വദേശിയുടെ അന്തിമഫലവും നെഗറ്റീവാണ്. രോഗം മാറിയോ എന്ന് മെഡിക്കൽ ബോർഡ് സ്ഥിരീകരിക്കും. തിരുവനന്തപുരം ജില്ലയിലെ 4 കേസുകളുടെയും പ്രൈമറി കോണ്ടാക്റ്റുകളുടെ ഫലം നെഗറ്റീവാണെന്നും ജില്ലാ കളക്ടർ.

5:45 PM IST

നിരീക്ഷണത്തിൽ കഴിയുന്ന പ്രവാസി ആശാ വർക്കറെ മർദ്ദിച്ചു

തിരുവനന്തപുരത്ത് നിരീക്ഷണത്തിൽ കഴിയേണ്ട പ്രവാസി പല സ്ഥലത്തും കറങ്ങി നടക്കുന്നത് ആരോഗ്യ വകുപ്പിനെ അറിയിച്ച ആശ വർക്കറെ മർദ്ദിച്ചതായി പരാതി. പൂവത്തൂരിലെ ആശ വർക്കർ ലിസിയെ പ്രവാസി മർദ്ദിച്ചുവെന്നാണ് പരാതി. വെഞ്ഞാറമൂട് പൊലീസ് കേസെടുത്തിട്ടുണ്ട്.

5:45 PM IST

കെഎസ്ആർടിസി സർവീസ് തുടരും

തിരുവനന്തപുരത്ത് അടുത്ത 15 ദിവസം നിർണായകം. കെഎസ്ആര്ടിസി സർവീസ് മുടങ്ങില്ല, ബസുകളിൽ ആളുകൾ തിരക്ക് കൂട്ടരുത്. 3000 ഐസോലഷൻ കിടക്കകൾ ജില്ലയിൽ തയ്യാർ. പത്രം, പാൽ വിതരണക്കാർ, ഗ്യാസ് ജീവനക്കാർ കൂടുതൽ ശ്രദ്ധ പാലിക്കണം. കെഎസ്ആര്ടിസി, സൂപ്പർമാർക്കറ്റുകൾ എന്നിവയിൽ ആളുകളുടെ എണ്ണം നിജപ്പെടുത്തും. ബെവ്കോ ഔട്ട്‌ലെറ്റ്  ജീവനക്കാർ നിരീക്ഷണത്തിലായ സംഭവം പരിശോധിക്കുമെന്നും കളക്ടർ. 

5:44 PM IST

തിരുവനന്തപുരത്ത് അവശ്യവസ്തുക്കൾ മുടങ്ങില്ല, ആശങ്കയുണ്ടാക്കരുത്: കളക്ടർ

തിരുവനന്തപുരത്ത് നിരീക്ഷണത്തിൽ കഴിയുന്ന ചിലർ നിയന്ത്രണങ്ങൾ തെറ്റിക്കുന്നതായി വിവരം കിട്ടിയിട്ടുണ്ടെന്നും, കർശനനടപടികൾ ഇതിൽ ഉണ്ടാകുമെന്നും ജില്ലാ കളക്ടർ കെ ഗോപാലകൃഷ്ണൻ. ജില്ലയിൽ അവശ്യവസ്തുകൾ മുടങ്ങില്ല. പലചരക്ക് കടകൾ തുറന്ന് പ്രവർത്തിക്കും. ഇവിടെ ആൾക്കൂട്ടങ്ങളും തിരക്കും ഒഴിവാക്കണം. മറ്റ് സംസ്ഥാനങ്ങളിൽ നിന്നുള്ള അവശ്യവസ്തുക്കളുടെ വരവും തുടരും. 

5:37 PM IST

കോഴിക്കോട് ഒരാള്‍ക്ക് കൂടി കൊവിഡ്

കോഴിക്കോട് ഒരാള്‍ക്ക് കൂടി കൊവിഡ് സ്ഥിരീകരിച്ചു. കണ്ണൂര്‍ സ്വദേശിയാണ് ഇയാള്‍. 

4:48 PM IST

രാജ്യത്ത് ഒരു കൊവിഡ് മരണം കൂടി

രാജ്യത്ത് ഒരു കൊവിഡ് മരണം കൂടി. ബംഗാളിലാണ് മരണം സംഭവിച്ചത്. സംസ്ഥാനത്തെ ആദ്യ കൊവിഡ് മരണമാണ് ഇത് ഇതോടെ രാജ്യത്തെ കൊവിഡ് മരണങ്ങൾ എട്ടായി.

4:44 PM IST

ബെവ്കോ ജീവനക്കാരിക്ക് കൊവിഡ് ഇല്ല

പനി ബാധിച്ച് ചികിത്സയിൽ കഴിയുന്നു ബെവ്കോ ജീവനക്കാരിയുടെ പരിശോധന ഫലം നെഗറ്റീവ്. തിരുവനന്തപുരം മെഡിക്കൽ കോളജ് ആശുപത്രിയിൽ നടത്തിയ പരിശോധനയിലാണ് ജീവനക്കാരിക്ക് കൊവിഡ് ഇല്ലെന്ന് കണ്ടെത്തിയത്. 

4:43 PM IST

ആഭ്യന്തരവിമാനസർവീസുകൾ നിർത്തുന്നു

രാജ്യത്തെ എല്ലാ ആഭ്യന്തര വിമാനസർവീസുകളും റദ്ദാക്കും. ഇന്ന് അർദ്ധരാത്രി മുതലാണ് സർവീസുകൾ റദ്ദാക്കുന്നത്. എല്ലാ വിമാനത്താവളങ്ങളും അടയ്ക്കും.

4:40 PM IST

കണ്ണൂരിൽ 4 കൊവിഡ് കെയർ സെന്‍ററുകൾ

കണ്ണൂരിൽ 4 കൊവിഡ് കെയർ സെന്‍ററുകൾ തുടങ്ങും. 2 എണ്ണം സജ്ജമായി. തളിപ്പറമ്പ് ആയുർവേദ ആശുപത്രി, കണ്ണൂർ എസ്സി പ്രീമെട്രിക് ഹോസ്റ്റൽ എന്നിവയാണ് സജ്ജമായത്. മാങ്ങാട്ടുപറമ്പിലെ സർക്കാർ വനിത ശിശു ആശുപ്രതി കൊവിഡ് ചികിത്സക്ക് വേണ്ടി മാത്രം ഉപയോഗിക്കും

4:32 PM IST

ലോക് ഡൗൺ കൂടിയേ തീരുവെന്ന് കേന്ദ്രം

ദില്ലി: രാജ്യത്ത് ലോക്ഡൗൺ കൊണ്ട് മാത്രമെ സമൂഹ വ്യാപനം തടയാനാകൂവെന്ന് കേന്ദ്ര ആരോഗ്യമന്ത്രാലയം. കൊവിഡ് രോഗികളെ ചികിത്സിക്കാനായി മാത്രം പ്രത്യേക ആശുപത്രികൾ സജ്ജമാക്കാൻ സംസ്ഥാനങ്ങൾക്ക‌് നിർദ്ദേശം

4:16 PM IST

അരുണാചൽപ്രദേശിലും ലോക്ഡൗൺ

അരുണാചൽപ്രദേശിലും ലോക്ഡൗൺ

4:15 PM IST

കോഴിക്കോട് ജില്ലയിൽ 31 കെയർ സെന്‍ററുകൾ

കോവിഡ് 19 അടിയന്തര സാഹചര്യം നേരിടാൻ കോഴിക്കോട് ജില്ലയിൽ 31 കെയർ സെന്‍ററുകൾ രൂപീകരിച്ചതായി ജില്ലാഭരണകൂടം. ജില്ലയിലെ വിവിധ കോളേജുകൾ ഹോസ്റ്റലുകൾ  ഒഴിഞ്ഞുകിടക്കുന്ന സർക്കാർ സ്ഥാപനങ്ങൾ കോട്ടേജുകൾ എന്നിവയാണ് കെയർ സെൻററുകൾ ആയി പ്രവർത്തിക്കുക. ഈ സ്ഥാപനങ്ങളുടെ നിയന്ത്രണം ജില്ലാഭരണകൂടം ഏറ്റെടുക്കും. ഏറ്റെടുക്കുന്ന സ്ഥാപനങ്ങളിലെ ഓരോ മുറികളിലും ജില്ലാ മെഡിക്കല്‍ ഓഫീസര്‍ ആരോഗ്യ സുരക്ഷാ ക്രമീകരണങ്ങളും നിരീക്ഷണ സംവിധാനങ്ങളും ഒരുക്കും.

4:02 PM IST

ആയുഷ് ആശുപത്രികളിലെ രോഗികളെ ഡിസ്ചാർജ് ചെയ്യാൻ നിർദ്ദേശം

ആയുഷ് വകുപ്പിന് കീഴിലുള്ള ആശുപത്രികളിലെ എല്ലാ രോഗികളെയും ഡിസ്‌ചാർജ് ചെയ്യാൻ നിർദേശം . ഗുരുതരാവസ്ഥയിൽ ഉള്ളവർ ഉണ്ടെങ്കിൽ അടുത്തുള്ള അലോപ്പതി ആശുപത്രികളിലേക്ക് റഫർ ചെയ്യണം. പനിയ്ക്കും ശ്വാസകോശ സംബന്ധമായ അസുഖങ്ങൾക്കും ചികിൽസ തേടി എത്തുന്നവരെ അലോപ്പതി ആശുപത്രികളിലേക്ക് റഫർ ചെയ്യണം. ആയുഷ് വിഭാഗം ചികിത്സ നൽകാൻ പാടില്ല. 

4:02 PM IST

തെലങ്കാനയിൽ 3 പേർക്ക് കൂടി കൊവിഡ്

തെലങ്കാനയിൽ 3 പേർക്ക് കൂടി കൊവിഡ് സ്ഥിരീകരിച്ചു. ഇതോടെ സംസ്ഥാനത്തെ രോഗബാധിതരുടെ എണ്ണം 18 ആയി. 

3:57 PM IST

ബെവ്‌കോ ഹെഡ് ഓഫീസിനു മുന്നിൽ യൂത്ത് കോൺഗ്രസ്‌ പ്രതിഷേധം

തിരുവനന്തപുരം: കോവിഡ് നിരീക്ഷണത്തിലുള്ള ജീവനക്കാർ ജോലി ചെയ്ത ഔട്ട്ലെറ്റ് പൂട്ടണമെന്ന് ആവശ്യപ്പെട്ട് തിരുവനന്തപുരം ബെവ്‌കോ ഹെഡ് ഓഫീസിനു മുന്നിൽ യൂത്ത് കോൺഗ്രസ്‌ പ്രതിഷേധം. പ്രവർത്തകരെ പോലീസ് അറസ്റ്റു ചെയ്തു നീക്കുന്നു.

3:54 PM IST

മലയാളി വിദ്യാർത്ഥികളുമായി ഇന്ത്യൻ എംബസി ബന്ധപ്പെട്ടു

മൊൽഡോവയിൽ കുടുങ്ങിയ മലയാളി വിദ്യാർത്ഥികളുമായി ഇന്ത്യൻ എംബസി ബന്ധപ്പെട്ടെന്ന് വിദേശകാര്യമന്ത്രാലയം. വിമാനസർവ്വീസ് പുനസ്ഥാപിക്കുമ്പോൾ ഇവരെ തിരിച്ചെത്തിക്കുമെന്നും വിദേശകാര്യമന്ത്രാലയം. 

3:32 PM IST

കൊവിഡ് പ്രതിസന്ധി മിൽമയിലും

കോഴിക്കോട്: മിൽമ മലബാർ മേഖലാ യൂണിയൻ നാളെ കർഷകരിൽ നിന്ന് പാൽ സംഭരിക്കില്ല. സംഭരിച്ച  പാൽ വിൽക്കാനാവാത്ത  സാഹചര്യത്തിലാണ്  തീരുമാനം. രണ്ട് ദിവസത്തിനിടെ സംഭരിച്ച ഏഴ് ലക്ഷം ലിറ്റർ പാൽ വിൽക്കാനാകുന്നില്ലെന്ന് മിൽമ, 

3:32 PM IST

ശമ്പളം വെട്ടിക്കുറയ്ക്കരുതെന്ന് കേന്ദ്രം

ദില്ലി: കൊവിഡ് ഭീതിക്കിടെ ശമ്പളം വെട്ടിക്കുറയ്ക്കലോ പിരിച്ചു വിടലോ പാടില്ലെന്ന് കേന്ദ്ര തൊഴിൽ മന്ത്രാലയം പൊതു, സ്വകാര്യ സ്ഥാപനങ്ങൾക്ക്  നിർദ്ദേശം നൽകി. 

3:29 PM IST

സർട്ടിഫിക്കറ്റ് വെരിഫിക്കേഷനുള്ള തീയതിയും നീട്ടി

തിരുവനന്തപുരം: അസി ഇൻഫർമേഷൻ ഓഫീസർ തസ്തികയിലേക്കുള്ള സർട്ടിഫിക്കറ്റ് വെരിഫിക്കേഷനുള്ള തീയതിയും നീട്ടി.

3:27 PM IST

300 ഡോക്ടർമാരുടെ നിയമനം 24 മണിക്കൂറിനകം

തിരുവനന്തപുരം: 300 ഡോക്ടർമാരുടേയും 400 ഹെൽത്ത് ഇൻസ്പെക്ടർമാരുടേയും നിയമനം 24 മണിക്കുറിനകം നടത്തുമെന്ന് പി എസ് സി. നിലവിലെ ലിസ്റ്റിൽ നിന്നാണ് നിയമനം

3:23 PM IST

'കൊവിഡ് ഗുരുതരമായാൽ മലേറിയ പ്രതിരോധ മരുന്ന് കൊടുക്കാം'

ദില്ലി: കൊവിഡ് ഗുരുതരമായവർക്ക്  Hydroxychloroquine മരുന്ന് നൽകാമെന്ന് ഐസിഎംആർ. മലേറിയ പ്രതിരോധ മരുന്നാണ് ഇത്. 

3:23 PM IST

പിഎസ്‍സി പരീക്ഷകൾ മാറ്റി

തിരുവനന്തപുരം: കൊവിഡ് 19 മുൻകരുതലിന്‍റെ ഭാഗമായി സംസ്ഥാനത്തെ എല്ലാ പിഎസ്‍സി പരീക്ഷകളും മാറ്റിവച്ചു. ഏപ്രിൽ 30 വരെയുള്ള പരീക്ഷകളാണ് മാറ്റിവച്ചത്. 

3:03 PM IST

ദില്ലി ഹൈക്കോടതിയും അടച്ചു

ദില്ലി ഹൈക്കോടതി ഏപ്രിൽ 4 വരെ പ്രവർത്തിക്കില്ല. ദില്ലിയിലെ എല്ലാ ജില്ലാ കോടതികളും ഏപ്രിൽ 4 വരെ അടച്ചിടും. അത്യാവശ്യ കേസുകൾ വീഡിയോ കോൺഫറൻസ് വഴി കേൾക്കുമെന്നും അറിയിപ്പ്. 

2:55 PM IST

തമിഴ്‍നാട്ടിൽ നിരോധനാജ്ഞ

ചെന്നൈ: തമിഴ്നാട്ടിൽ നാളെ വൈകിട്ട് ആറ് മണി മുതൽ നിരോധനാജ്ഞ നിലവിൽ വരും. എല്ലാ ജില്ലാ അതിർത്തികളും അടയ്ക്കും. അത്യാവശ്യ സർവ്വീസുകൾക്ക് മാത്രമായിരിക്കും അനുമതി. പൊതുഗതാഗത സംവിധാനം നിർത്തും. ആളുകൾ കൂട്ടം കൂടുന്നതിന് വിലക്കുണ്ട്. 

2:55 PM IST

ലോകസഭ അനിശ്ചിത കാലത്തേക്ക് പിരിഞ്ഞു

കൊവിഡ് ഭീതിയുടെ പശ്ചാത്തലത്തിൽ ലോകസഭ അനിശ്ചിത കാലത്തേക്ക് പിരിഞ്ഞു.

2:30 PM IST

കേന്ദ്ര സർക്കാരിനെ അഭിനന്ദിച്ച് സുപ്രീം കോടതി

കൊവിഡ് പ്രതിരോധ നടപടികളിൽ കേന്ദ്ര സർക്കാരിനെ അഭിനന്ദിച്ച് സുപ്രീം കോടതി. എതിരാളികൾ പോലും സർക്കാരിന്‍റെ നടപടിയിൽ തൃപ്തരെന്ന് സുപ്രീം കോടതി ചീഫ് ജസ്റ്റിസ്. 

1:59 PM IST

മത്സ്യ ബന്ധനം നിർത്തുന്നു

കൊവിഡ് 19ന്‍റെ പശ്ചാത്തലത്തിൽ എറണാകുളം ജില്ലയിലെ മത്സ്യബന്ധനം നിർത്തുന്നു. ഇന്ന് രാത്രി മുതൽ ബോട്ടുകൾ കടലിൽ പോകില്ല

1:58 PM IST

കുഴൽക്കിണർ നിർമ്മാണം നിർത്തിവയ്ക്കുന്നു

കൊവിസ് 19 പശ്ചാത്തലത്തിൽ സംസ്ഥാനത്ത് കുഴൽക്കിണർ നിർമാണം താൽക്കാലികമായി നിർത്തി വെക്കുന്നു. സർക്കാർ നടപടികളോട് സഹകരിച്ചും അംഗങ്ങളുടേയും തൊഴിലാളികളുടേയും സുരക്ഷ കണക്കിലെടുത്തും ബോർവൽ നിർമാണവും അനുബന്ധ പ്രവൃത്തികളും നിർത്തിവെക്കാൻ ആൾ കേരള ബോവൽ ഡ്രില്ലിങ്ങ് കോൺട്രാക്റ്റേഴ്സ് അസോസിയേഷൻ തീരുമാനിച്ചു.

1:49 PM IST

റൂട്ട് മാപ്പ് തയ്യാറാക്കാതെ തമിഴ്നാട് സർക്കാർ

ചെന്നൈ: കോയമ്പത്തൂർ സ്വദേശിക്ക് കോവിഡ് സ്ഥിരീകരിച്ച സംഭവത്തിൽ റൂട്ട് മാപ്പ് തയ്യാറാക്കാതെ തമിഴ്‍നാട് സർക്കാർ. കണ്ണൂർ എക്സ്പ്രസിലെ റൂട്ട് മാപ്പ് തയ്യാറാക്കുന്ന കാര്യത്തിൽ കേരളാ സർക്കാരുമായി ഇതുവരെ ബന്ധപെട്ടിട്ടില്ല. പരിശോധിച്ചു വരുന്നുവെന്നാണ് വിശദീകരണം. മാർച്ച് 17നാണു യുവതി ബംഗളുരുവിൽ നിന്ന് കോയമ്പത്തൂരിലേക്കു യാത്ര നടത്തിയത്. 

1:49 PM IST

കോട്ടയത്തെ ബാർബർ ഷോപ്പുകൾ അടച്ചിടും

കോട്ടയം: വരുന്ന 31 വരെ കോട്ടയം ജില്ലയിൽ ബാർബർ - ബ്യൂട്ടി പാർലർ ഷോപ്പുകൾ അടച്ചിടും.

1:49 PM IST

ബയോമെട്രിക് സംവിധാനം ഒഴിവാക്കി

എസ്ബിഐ ശാഖകളിൽ ജീവനക്കാർക്ക് ബയോമെട്രിക് സംവിധാനം ഒഴിവാക്കി.

1:40 PM IST

വിമാന സർവ്വീസ് നിർത്തണമെന്ന് മമത ബാനർജി

കൊൽക്കത്ത: പശ്ചിമ ബംഗാളിലേക്കുള്ള  എല്ലാ വിമാന സർവീസുകളും നിർത്തി വക്കണമെന്നാവശ്യപ്പെട്ട് മുഖ്യമന്ത്രി മമത ബാനർജി പ്രധാനമന്ത്രിക്ക്  കത്തെഴുതി.

1:32 PM IST

ഒരു ബെവ്കോ ജീവനക്കാരൻ കൂടി നിരീക്ഷണത്തിൽ

തിരുവനന്തപുരം പവർഹൗസ് റോഡിലെ ബെവ് കോ ഔട്ട് ലെറ്റിലെ ഒരു ജീവനക്കാരൻ കൂടി നിരീക്ഷണത്തിൽ. പനി ബാധിച്ചതിനെ തുടർന്ന് ജീവനക്കാരൻ വീട്ടിൽ നിരീക്ഷണത്തിലാണ്.

1:21 PM IST

മാധ്യമ മേധാവിമാരുമായി ചർച്ച

ദില്ലി: മാധ്യമ മേധാവിമാരുമായി പ്രധാനമന്ത്രി നരേന്ദ്ര മോദി ചർച്ച നടത്തുന്നു. കൊവിഡ് പ്രതിരോധത്തിന് പ്രധാനമന്ത്രി മാധ്യമങ്ങളുടെ സഹകരണം തേടി. ലോക്ക്ഡൗണിൻറെ ആവശ്യം ജനങ്ങളെ ബോധ്യപ്പെടുത്തണമെന്ന് മോദി. ഏഷ്യാനെറ്റ് ന്യൂസ് ഉൾപ്പടെയുള്ള മാധ്യമങ്ങളുടെ സഹകരണമാണ് പ്രധാനമന്ത്രി തേടിയത്. 

1:21 PM IST

വയനാട്ടിൽ ആവശ്യമെങ്കിൽ നിരോധാനാജ്ഞ

വയനാട്ടിൽ ആവശ്യമെങ്കിൽ നിരോധാനാജ്ഞ പുറപ്പെടുവിക്കുമെന്ന് കലക്ടർ. നാളെ ഇത്‌ സംബന്ധിച്ച് തീരുമാനമെടുക്കും. 
കളിക്കളങ്ങളിലും ചെക്പോസ്റ്റിലും നിരോധനാജ്ഞ പ്രഖ്യാപിച്ചു. 

1:17 PM IST

നിർദ്ദേശം ലംഘിച്ചവർക്കെതിരെ കേസ്

ആരോഗ്യവകുപ്പിൻ്റെ നിർദ്ദേശിച്ച് കറങ്ങി നടന്ന രണ്ട് മലപ്പുറം സ്വദേശികൾക്കെതിരെ കഴക്കൂട്ടം പൊലീസ് കേസെടുത്തു. അബുബാദിയിൽ നിന്നും ഇന്നലെയെത്തി ഇവർക്ക് മുറി നൽകിയ ഹോട്ടൽ മാനേജർക്കെതിരെയും കേസെടുത്തു. വിദേശത്തു നിന്നുമെത്തിയവരെ നിരീക്ഷണ കേന്ദ്രത്തിലേക്ക് മാറ്റി. 

1:12 PM IST

മഹാരാഷ്ട്ര ഗോവൻ അതിർത്തി അടച്ചു

മഹാരാഷ്ട്ര ഗോവൻ അതിർത്തി അടച്ചു. മറ്റ് അതിർത്തികളും ഉടൻ അടയ്ക്കുമെന്ന് ആരോഗ്യ മന്ത്രി രാജേഷ് തോപ്പെ. സമൂഹ വ്യാപനം സംസ്ഥാനത്ത് ഉണ്ടായിട്ടില്ലെന്നും രാജേഷ് തൊപ്പെ.

1:10 PM IST

കാസർകോട് ജില്ലാ അതിർത്തിയിൽ നിയന്ത്രണം

കണ്ണൂർ കാസർകോട് ജില്ലാ അതിർത്തിയിലെ ഹൈവേ ഒഴികെയുള്ള പാതകൾ അടച്ചു. ഹൈവേയിലൂടെ വാഹനങ്ങൾ കടത്തുന്നതിന് കർശന നിയന്ത്രണം.

1:08 PM IST

ട്രെയിൻ റീഫണ്ട് ഏപ്രിൽ 1ന് ശേഷം

കൊവിഡ് സുരക്ഷാ നടപടിയുടെ ഭാഗമായി മാർച്ച് 31 വരെ റദ്ധാക്കിയ  ട്രെയിനുകളുടെ റീഫണ്ട് എപ്രിൽ 1ന് ശേഷം ജൂൺ 21 വരെ ലഭിക്കുന്നതാണ്. ബുക്കിങ്ങ്, റിസർവേഷൻ, പാർസൽ, കാറ്ററിങ്ങ് കൗണ്ടറുകൾ അടച്ചതിനാൽ യാത്രക്കാർ റെയിൽവേ സറ്റേഷനുകളിൽ വരുന്നത് ഒഴിവാക്കണമെന്നും റെയിൽവേ. 

12:43 PM IST

കേരള അതിർത്തി അടച്ചു

തിരുവനന്തപുരം: ആര്യങ്കാവ് പുളിയറ ചെക്ക് പോസ്റ്റ് വഴിയുള്ള ഗതാഗതത്തിനു കേരളവും വിലക്ക് ഏർപ്പെടുത്തി. ചരക്കു വാഹനങ്ങളും ട്രാൻസ്‌പോർട്ട് ബസുകളും മാത്രം കടത്തി വിടും.

12:39 PM IST

ഭക്ഷ്യ സാധനങ്ങൾ വീട്ടിലെത്തിക്കാൻ ശ്രമം.

കാസർകോട് ഭക്ഷ്യ സാധനങ്ങൾ വാങ്ങാൻ പറ്റാത്തവർക്ക് വീട്ടിൽ എത്തിക്കാൻ ശ്രമം വൈകീട്ട് മുഖ്യമന്ത്രി വ്യാപാരി വ്യവസായികളുമായി ചർച്ച നടത്തും. കാസർകോട് ആരും പുറത്തു ഇറങ്ങരുത്. 

12:36 PM IST

ഭാഗിക ലോക്ക് ഡൗൺ മൂന്ന് ജില്ലകളിൽ

സംസ്ഥാനത്തെ മൂന്ന് ജില്ലകളിൽ ഭാഗിക ലോക്ക്ഡൗൺ. കണ്ണൂർ, എറണാകുളം, പത്തനംതിട്ട ജില്ലകൾ ഭാഗികമായി ലോക്ക്ഡൗൺ ചെയ്യും. ഇവിടെ അവശ്യ സാധനങ്ങൾ മാത്രം വിൽക്കുന്ന കടകൾ തുറക്കും.

Read more at: കാസര്‍കോട് അടച്ചിടും, മറ്റ് ജില്ലകളിൽ ഭാഗിക ലോക് ഡൗൺ, ബാറുകൾ അടക്കും ...

 

12:21 PM IST

കൊയമ്പത്തൂർ സ്വദേശി സ‌ഞ്ചരിച്ചത് കണ്ണൂർ എക്സ്പ്രസിൽ

കൊവിഡ് സ്ഥരീകരിച്ച കോയമ്പത്തൂർ സ്വദേശി സഞ്ചരിച്ചത് കണ്ണൂർ എക്സ്പ്രസിൽ. ബെംഗ്ലൂരുവിൽ നിന്ന് യാത്ര നടത്തിയത് മാർച്ച് 17 ന്. സ്പെയിനിൽ നിന്നാണ് ബംഗൂരുവിൽ എത്തിയത്. സമ്പർക്ക പട്ടിക തയാറാക്കാനുള്ള ശ്രമം തുടരുന്നു.

12:21 PM IST

കാസർകോട് പൂർണ്ണ ലോക് ഡൗൺ, മറ്റിടങ്ങളിൽ ഭാഗികം

തിരുവനന്തപുരം:  കാസർകോട് ജില്ലയിൽ പൂർണ്ണ ലോക് ഡൗണിനും രോഗം സ്ഥിരീകരിച്ച മറ്റിടങ്ങളിൽ ഭാഗിക ലോക് ഡൗണിനും തലസ്ഥാനത്ത് ചേർന്ന മന്ത്രിസഭാ യോഗം നിർദ്ദേശം നൽകി.

12:17 PM IST

സംസ്ഥാനത്തെ ബാറുകൾ അടയ്ക്കും; ബെവ്കോയിൽ കടുത്ത നിയന്ത്രണം

തിരുവനന്തപുരം: കൊവിഡ് മുൻകരുതലിന്‍റെ ഭാഗമായി തലസ്ഥാനത്തെ ബാറുകൾ അടയ്ക്കും. ബെവ്കോയിൽ കടുത്ത നിയന്ത്രണങ്ങൾ.

11:54 AM IST

ഭക്ഷണവും മരുന്നും ഉറപ്പാക്കുമെന്ന് പഞ്ചാബ് മുഖ്യമന്ത്രി

പഞ്ചാബ്: ആവശ്യക്കാർക്ക് സൗജന്യ ഭക്ഷണം, മരുന്ന്, താമസം എന്നിവ ഉറപ്പുവരുത്തുമെന്ന് പഞ്ചാബ് മുഖ്യമന്ത്രി ക്യാപ്റ്റൻ അമരീന്ദർ സിംഗ് . ഇതിനായി മുഖ്യമന്ത്രിയുടെ  ദുരിതാശ്വാസ നിധിയിൽ നിന്ന് 20 കോടി രൂപ അനുവദിച്ചു

11:54 AM IST

കോട്ടയത്ത് മൂന്ന് പേർക്കെതിരെ കേസെടുത്തു

കോട്ടയം: ക്വാറന്‍റൈൻ നിർദ്ദേശം അവഗണിച്ച മൂന്ന് പേർക്കെതിരെ കോട്ടയത്ത് കേസെടുത്തു. വിദേശത്ത് നിന്ന് എത്തിയിട്ടും ആരോഗ്യവകുപ്പിൻ്റെ നിർദ്ദേശം പാലിക്കാതെ നാട്ടിൽ കറങ്ങി നടന്നതിനാണ് കേസ്. കാഞ്ഞിപ്പള്ളി വഴിക്കത്തോട് സുരേന്ദ്രൻ ഭാര്യ സരള, കുടമാളൂർ പുളിഞ്ചുവട് സ്വദേശി അജിത്ത് എന്നിവർക്കെതിരെയാണ് കേസ്. കഴിഞ്ഞ 16ന് ഖത്തറിൽ നിന്ന് മടങ്ങി എത്തിയ ദമ്പതികളോട് ആരോഗ്യ വകുപ്പ് ക്വാറൻ്റെെൻ നിർദ്ദേശിച്ചിരുന്നു. ഒമാനിൽ നിന്നെത്തിയ അജിത്ത് 11 ദിവസായി ഹോം ക്വാറൻ്റൈനിലായിരുന്നു. 

11:51 AM IST

സപ്ലൈക്കോ ഔട്ട്ലെറ്റുകളിൽ വൻ തിരക്ക്

തിരുവനന്തപുരം: തലസ്ഥാനത്തെ സപ്ലൈക്കോ ഔട്ട്ലെറ്റുകളിൽ വൻ തിരക്ക്. തിരക്ക് കൂടിയതോടെ പലയിടത്തും പൊലീസ് ഇടപെട്ടു. ഒരു സമയം അഞ്ച് പേരെ മാത്രമാണ് ഔട്ട് ലെറ്റിൽ പ്രവേശിപ്പിക്കുന്നത്.

11:49 AM IST

വ്യാജസന്ദേശം പ്രചരിപ്പിച്ചയാൾ അറസ്റ്റിൽ

കണ്ണൂർ: കണ്ണൂർ ജില്ലയിൽ എല്ലായിടത്തും അർദ്ധരാത്രി ഹെലികോപ്റ്ററിൽ മീതൈൻ  വാക്‌സിൻ എന്ന വിഷപദാർത്ഥം തളിക്കുന്നുണ്ടെന്ന  വ്യാജസന്ദേശം പ്രചരിപ്പിച്ചയാൾ അറസ്റ്റിൽ. മുഴപ്പിലങ്ങാട് സ്വദേശി ഷാന ഷരീഫ് ആണ് അറസ്റ്റിലായത്. സോഷ്യൽ മീഡിയയിൽ പൊലീസ് നിരീക്ഷണം ശക്തമാക്കിയിട്ടുണ്ട്. 

11:44 AM IST

സുപ്രീം കോടതി ഭാഗികമായി അടച്ചു

സുപ്രീം കോടതി ഭാഗികമായി അടച്ചു. കോടതിയിലെ ലോയേഴ്സ് ചേംബർ അടച്ചു. അത്യാവശ്യ കേസുകൾ വീഡിയോ  കോൺഫറൻസിംഗ് വഴി പരിഗണിക്കും. ലോയേഴ്സ് ചേംബർ ഇന്ന് വൈകിട്ട് 5 മണിക്ക് സീൽ ചെയ്യും. അഭിഭാഷകർ കോടതിയിലേക്ക് വരുന്നതും വിലക്കി

11:21 AM IST

ദില്ലിയിൽ രണ്ട് പേർക്ക് കൂടി കൊവിഡ്

ദില്ലിയിൽ 2 പേർക്ക് കൂടി കൊവിഡ് സ്ഥിരീകരിച്ചു, ഇതോടെ രാജ്യതലസ്ഥാനത്ത് 30 പേർക്ക് രോഗം സ്ഥിരീകരിച്ചു. 

11:21 AM IST

ബീവറേജ് കോർപ്പറേഷൻ ഷോപ്പുകളിൽ കനത്ത ക്യൂ

വടകരയിലെ ബീവറേജ് കോർപ്പറേഷൻ ഷോപ്പുകളിൽ കനത്ത ക്യൂ. വടകരയിൽ നിരോധനാജ്ഞ ലoഘിച്ച് ബീവറേജ് കോർപ്പറേഷന്‍റെ ഷോപ്പിൽ ക്യൂ നിന്ന ഉപഭോക്തക്കളെ പോലീസ് എത്തി ലാത്തി വിശി ഓടിച്ചു. 

11:19 AM IST

സംസ്ഥാനത്തെ തുറമുഖങ്ങളിൽ മത്സ്യ ലേലം നിരോധിച്ചു

സംസ്ഥാനത്തെ  തുറമുഖങ്ങളിൽ മത്സ്യ ലേലം നിരോധിച്ചു. ഇന്നുമുതൽ ഈ മാസം 31 വരെയാണ് കൂട്ടം കൂടിയുള്ള ലേലംവിളി നിരോധിച്ചത്. മത്സ്യഫെഡും, ഫിഷറീസ് വകുപ്പും ചേർന്ന് മത്സ്യത്തിന്‍റെ വില നിശ്ചയിച്ച് നൽകും.

11:03 AM IST

415 പേർക്ക് കൊവിഡ്

ദില്ലി: രാജ്യത്ത് 415 പേർക്ക് കൊവിഡ് ബാധ സ്ഥിരീകരിച്ചു. 

11:01 AM IST

പാസ്പോർട്ട് സേവാ കേന്ദ്രങ്ങളും അടച്ചിടും

തിരുവനന്തപുരം: പാസ്പോ‍ർട്ട് സേവകേന്ദ്രങ്ങളും പോസ്റ്റോഫീസ് പാസ്പോർട്ട് കേന്ദ്രങ്ങളും ഈ മാസം 31 വരെ അടച്ചിടാൻ ഉത്തരവ്. ഈ കാലയളവിനുള്ളിൽ സേവാ കേന്ദ്രങ്ങളിൽ എത്തേണ്ടവർ ഓൺ ലൈൻ വഴി പുതിയ സമയം എടുക്കണം.

10:59 AM IST

കൊറോണ 'ഫെസ്റ്റിവൽ' നടത്തിയവർക്കെതിരെ കേസ്

അഹമ്മദാബാദ്: ഇന്നലെ വൈകിട്ട് 5 മണിക്ക് ജനതാ കർഫ്യൂവിന്‍റെ ഭാഗമായി നന്ദി പ്രകടനത്തിന് കൊറോണ ഫെസ്റ്റിവൽ നടത്തിയ 19 പേർക്കെതിരെ അഹമ്മദാബാദ് പൊലീസ് കേസെടുത്തു.

10:57 AM IST

നിലപാട് കടുപ്പിച്ച് കേന്ദ്രം; ലോക്ക് ഡൗൺ കർശനമായി നടപ്പാക്കണം

ദില്ലി: ലോക്ക് ഡൗൺ വിഷയത്തിൽ കേന്ദ്രം നിലപാട് കടുപ്പിക്കുന്നു, ലോക്ക്ഡൗൺ കർശനമായി നടപ്പാക്കണമെന്ന് കേന്ദ്രം നിർദ്ദേശം നൽകി. അടച്ചുപൂട്ടൽ നിർദ്ദേശങ്ങൾ സംസ്ഥാനങ്ങൾ കർശനമായി പാലിക്കണം. ഇല്ലെങ്കിൽ നിയമനടപടി ഉണ്ടാകുമെന്നും മുന്നറിയിപ്പ് .

10:53 AM IST

സുപ്രീംകോടതി അഭിഭാഷകർ പ്രാക്ടീസ് നിർത്തി

സുപ്രീംകോടതി അഭിഭാഷകർ ഏപ്രിൽ 4 വരെ പ്രാക്ടീസ് നിർത്തി

10:51 AM IST

കേരള ഹൈക്കോടതി അടച്ചു

കൊച്ചി: കൊവിഡ് ഭീതിക്കിടെ കേരള ഹൈക്കോടതി അടച്ചു, ഏപ്രിൽ എട്ട് വരെയാണ് കോടതി അടച്ചത്. അടിയന്തര പ്രാധാന്യമുള്ള കേസുകൾ മാത്രം പരിഗണിക്കും . ഇതിനായി ആഴ്ചയിൽ രണ്ട് ദിവസം സിറ്റിംഗ് . ചൊവ്വയും വെള്ളിയുമാണ് സിറ്റിംഗ് നടക്കുക .

Read more at: കേരള ഹൈക്കോടതി അടച്ചു; അടിയന്തര പ്രാധാന്യമുള്ള കേസുകൾ പരിഗണിക്കാൻ ആഴ്ചയിൽ രണ്ട് ദിവസം സിറ്റിംഗ് 

 

10:41 AM IST

വ്യാപാരം പുനരാരംഭിച്ചു

ഓഹരിവിപണിയിൽ വ്യാപാരം പുനരാരംഭിച്ചു. സെൻസെക്സ് 1450പോയിന്റ് നഷ്ടത്തിൽ 28465 ഇൽ വ്യാപാരം തുടരുന്നു

10:41 AM IST

കോട്ടയത്ത് ആളുകൾ കൂടുന്നിടത്ത് നിരോധനാജ്ഞ

കോട്ടയത്ത് ആളുകൾ കൂടുന്ന സ്ഥലങ്ങളിൽ നിരോധനാഞ്ജ ഏർപ്പെടുത്തുമെന്ന് ജില്ലാ കളക്ടർ. ആളുകൾ കൂടിയാൽ കർശന നടപടി. മുഖ്യമന്ത്രിയുടെ യോഗത്തിന് ശേഷം തീരുമാനമെടുക്കും. മാളുകളിലും ആരാധനാലയങ്ങളിലും നിയന്ത്രണം ഏർപ്പെടുത്തുമെന്നും ജില്ലാ കളക്ടർ സുധീർബാബു. 

10:41 AM IST

നിർദ്ദേശങ്ങൾ പാലിക്കാതെ കൊച്ചിൻ റിഫൈനറി

കൊച്ചി: ആരോഗ്യ വകുപ്പിന്‍റെ നിർദേശങ്ങൾ അനുസരിക്കാതെ പ്രൊപ്പലീൻ പ്ലാന്‍റിന്‍റെ നിർമ്മാണ പ്രവർത്തനങ്ങൾ തുടർന്ന് കൊച്ചിൻ റിഫൈനറി. ഇതര സംസ്ഥാന തൊഴിലാളികൾ ഉൾപ്പെടെ ആയിരക്കണക്കിന് ജീവനക്കാർ കൂട്ടത്തോടെ പണിയെടുക്കുന്നു. പ്ലാൻ്റിനുള്ളിൽ തൊഴിലാളികൾ കൂട്ടത്തോടെ നിൽക്കുന്ന ദൃശ്യങ്ങൾ പുറത്ത്.മാസ്കുകൾ നൽകുന്നില്ലെന്ന് പരാതി.

10:39 AM IST

മൈസൂരുവിൽ ഒരാൾക്ക് കൂടി കൊവിഡ്

മൈസൂരുവിൽ ഒരാൾക്ക് കൂടി കൊവിഡ്  സ്ഥിരീകരിച്ചു ഇതോടെ കർണ്ണാടകത്തിലെ രോഗബാധിതരുടെ എണ്ണം 27 ആയി.

10:39 AM IST

തലസ്ഥാനത്തെ ബെവ്കോ ജീവനക്കാരി നിരീക്ഷണത്തിൽ

തിരുവനന്തപുരം: കോവിഡ്- 19 രോഗലക്ഷണങ്ങളുള്ള തലസ്ഥാനത്തെ ബെവ്കോ ഔട്ട് ലെറ്റ് ജീവനക്കാരി നിരീക്ഷണത്തിൽ. പനി ബാധിച്ച് സ്വകാര്യ ആശുപത്രിയിൽ പ്രവേശിപ്പിച്ച ജീവനക്കാരിയെ മെഡിക്കൽ കോളജ് ആശുപത്രിയിലേക്ക് മാറ്റി. നിരീക്ഷണത്തിൽ കഴിയുന്ന ജീവനക്കാരിയുടെ പരിശോധന ഫലം ലഭിച്ചിട്ടില്ല.

10:38 AM IST

ഗുജറാത്തിൽ കൊവിഡ് ബാധിതരുടെ എണ്ണം 29 ആയി

അഹമ്മദാബാദ്: ഗുജറാത്തിൽ കൊവിഡ് ബാധിതരുടെ എണ്ണം 29 ആയി ഉയർന്നു. അഹമ്മദാബാദിൽ 13, സൂറത്തിൽ 4, രാജ്കോട്ടിൽ 1, വഡോദര 6, ഗാന്ധിനഗർ 4, കുച്ച് 1 എന്നിങ്ങനെയാണ് ജില്ല തിരിച്ചുള്ള കണക്കുകൾ. ഗുജറാത്ത് അതിർത്തികൾ അടച്ചു. 

10:38 AM IST

വൈദികൻ അറസ്റ്റിൽ

വിലക്ക് ലംഘിച്ച് വിശ്വാസികളുമായി കുർബാന നടത്തിയ വൈദികൻ അറസ്റ്റിൽ. ചാലക്കുടി കൂടപ്പുഴ നിത്യ സഹായമാത പളളിയിലെ ഫാ. പോളി പടയാട്ടിയാണ് അറസ്റ്റിലായത്. കുർബാനയിൽ പങ്കെടുത്ത വിശ്വാസികൾക്കെതിരെയും കേസെടുത്തു. വികാരി ഫാ. പോളി പടയാട്ടി ഉൾപ്പെടെ നൂറു പേരെ പ്രതിയാക്കി. 

10:33 AM IST

കൊവിഡ് ഭീതിക്കിടെ നഗരസഭയുടെ ബജറ്റ് സമ്മേളനം

കൊച്ചി: കോവിഡ് ഭീതിക്കിടയിൽ കൊച്ചി നഗരസഭയുടെ ബജറ്റ് സമ്മേളനം. സമ്മേളനം നടത്തരുതെന്ന ജില്ലാ കലക്ടറുടെ നിർദ്ദേശം തദ്ദേശ മന്ത്രി തള്ളി. നഗരസഭ സെക്രട്ടറിക്കാണ് ബജറ്റ് നടത്തരുതെന്ന് ജില്ല കലക്ടർ നിർദേശം നൽകിയത്. ബജറ്റ് സമ്മേളനം ചേരാൻ തദ്ദേശ മന്ത്രി അനുമതി നൽകിയെന്ന് മേയർ. ഇതിനെ തുടർന്ന് സമ്മേളനം 15 മിനിറ്റിൽ പൂർത്തിയാക്കണം എന്ന് കളക്ടർ നിർദേശം നൽകി. 

10:32 AM IST

ലോക്ക് ഡൗൺ ഗൗരവമായി കാണണമെന്ന് പ്രധാനമന്ത്രി

ദില്ലി: ലോക്കൗഡൗൺ ഗൗരവമായി കാണണമെന്ന് പ്രധാനമന്ത്രി നരേന്ദ്ര മോദി. നിയമം പാലിക്കുമെന്ന് ഉറപ്പുവരുത്തണമെന്ന് മോദി ആവശ്യപ്പെട്ടു. 

Read more at: കൊവിഡ് 19: ലോക് ഡൗൺ ഗൗരവമായി കാണണമെന്ന് പ്രധാനമന്ത്രി ...

 

10:05 AM IST

ഓഹരി വിപണ വ്യാപാരം തൽക്കാലം നിർത്തി

കനത്ത നഷ്ടത്തെ തുടർന്ന് ഓഹരി വിപണി വ്യാപാരം താൽക്കാലികമായി നിർത്തി. 45മിനിറ്റ് നേരത്തേക്കാണ് ഓഹരി വിപണിയിൽ വ്യാപാരം നിർത്തിയത്. സെൻസെക്സ് 2991.85 പോയിന്റ് നഷ്ടത്തിൽ 26924 പോയിന്‍റിൽ. 15മിനിറ്റിൽ നിക്ഷേപർക്ക് 8ലക്ഷം കോടി രൂപ നഷ്ടമായി

10:05 AM IST

വ്യാജ മാധ്യമ പ്രവർത്തകനെതിരെ കേസ്

ജനതാ കർഫ്യുവിന്‍റെ പേരിൽ ആളുകളെ വഴിയിൽ തടഞ്ഞ് ദൃശ്യങ്ങൾ പകർത്തി സോഷ്യൽ മീഡിയയിൽ പ്രചരിപ്പിച്ച ആൾക്കെതിരെ കേസെടുത്തു. പത്തനംതിട്ട കുമ്പഴ സ്വദേശി പ്രകാശ് ഇഞ്ചത്താനത്തിനെതിരെയാണ് പൊലീസ് കേസെടുത്തത്. വ്യക്തികളുടെ സഞ്ചാര സ്വാതന്ത്യം തടസ്സപ്പെടുത്തി, തടഞ്ഞുവെച്ച് ഭീഷണിപ്പെടുത്തി എന്നീ കുറ്റങ്ങൾക്കാണ് കേസ്.

10:04 AM IST

അവശ്യവസ്തുക്കൾക്ക് ക്ഷാമമുണ്ടാകില്ലെന്ന് തിരുവനന്തപുരം കളക്ടർ

തിരുവനന്തപുരം: അവശ്യവസ്തുക്കൾക്ക് ഒരു സാഹചര്യത്തിലും ജില്ലയിൽ ക്ഷാമമുണ്ടാകില്ലെന്ന് ജില്ലാ കളക്ടർ കെ ഗോപാലകൃഷ്ണൻ. പൊതുജനങ്ങൾ അമിതമായി അവശ്യവസ്തുക്കൾ വാങ്ങി ശേഖരിക്കുന്നത് ഒഴിവാക്കണമെന്ന് കളക്ടർ അഭ്യർഥിച്ചു. വ്യാപാര സ്ഥലങ്ങളിലെ ആൾക്കൂട്ടം ഒഴിവാക്കണമെന്നും കളക്ടർ.

9:58 AM IST

തീരദേശ പാതയിലും നിയന്ത്രണം

കൊല്ലം- തിരുവനന്തപുരം തീരദേശ പാതയിലും യാത്രാ നിയന്ത്രണം. അത്യാവശ്യ യാത്രക്കാരെ മാത്രമേ കടത്തിവിടുന്നുള്ളു. ആരോഗ്യ വകുപ്പും പൊലീസും ചേർന്ന് വാഹനങ്ങൾ പരിശോധിക്കുന്നു.

9:58 AM IST

സ്വർണ്ണവിലയിൽ നേരിയ കുറവ്

സ്വർണവിലയിൽ നേരിയ കുറവ്. ഗ്രാമിന് 20രൂപ കുറഞ്ഞു 3780രൂപ ആയി. പവന് 160രൂപ കുറഞ്ഞു 30,240രൂപ

9:57 AM IST

ഒളിമ്പിക്സ് പിന്മാറ്റത്തിൽ കാര്യത്തിൽ ഇന്ന് ചർച്ച

ഒളിംപിക്സിൽ നിന്ന് ഇന്ത്യ പിൻമാറുന്നതിൽ ഇന്ന് ചർച്ച. കായിക മന്ത്രാലയവുമായി ചർച്ച നടത്തുമെന്ന് ഐഒഎ സെക്രട്ടറി ജനറൽ രാജീവ് മേത്ത.

9:55 AM IST

കോട്ടവാസലിൽ തമിഴ്നാട് പൊലീസ് വാഹനങ്ങൾ തടയുന്നു

കൊല്ലം അതിർത്തിയായ കോട്ടവാസലിൽ തമിഴ്നാട് പൊലീസ് വാഹനങ്ങൾ തടയുന്നു. കേരളത്തിൽ നിന്നുള്ള ചരക്ക് വാഹനങ്ങൾ അടക്കം അതിർത്തിയിൽ കുടുങ്ങി. ഒമ്പത് മണിയോടെയാണ് നിയന്ത്രണം ആരംഭിച്ചത്. കാൽനട യാത്രക്കാരെപ്പോലും കടത്തിവിടുന്നില്ല. കോട്ട വാസലിൽ നിന്ന് തമിഴ്നാട് ബസുകളും സർവീസ് നടത്തുന്നില്ല. തമിഴ്നാട്ടിൽ നിന്നുള്ള ചരക്ക് ലോറികൾ കേരളത്തിലേക്ക് കടത്തിവിടുന്നുണ്ട്.

9:52 AM IST

പ്രത്യേക സാമ്പത്തിക പാക്കേജ് വേണമെന്ന് മുരളീധരൻ

കൊവിഡ് 19ന്‍റെ പശ്ചാത്തലത്തിൽ പ്രത്യേക സാമ്പത്തിക പാക്കേജ് പ്രഖ്യാപിക്കണമെന്നാവശ്യപ്പെട്ട് കെ മുരളീധരൻ അടിയന്തരപ്രമേയ നോട്ടീസ് നല്കി. പാർലമെന്‍റ് സമ്മേളനം നിർത്തിവയ്ക്കണം എന്നുമാവശ്യം.

9:48 AM IST

പാലക്കാട് കള്ളുഷാപ്പ് പുതുക്കി നൽകൽ തുടങ്ങി

പാലക്കാട്: പാലക്കാട് കള്ള് ഷാപ്പ് പുതുക്കി നൽകൽ നടപടികൾ തുടങ്ങു. ജില്ലാ കളക്ടർ ഡി ബാലമുരളിയുടെ സന്നിധ്യത്തിലാണ് പുതുക്കൽ നടപടികൾ. ഒരു മീറ്റർ അകലം പാലിച്ച് ആരോഗ്യ മുൻകരുതലോടെയാണ് ഷാപ്പുകൾ പുതുക്കി നൽകുന്ന നടപടികൾ നടക്കുന്നത്. യൂത്ത് കോൺഗ്രസിന്റെ പ്രതിഷേധം കണക്കിലെടുത്ത് പൊലീസ് സുരക്ഷയുണ്ട്.

9:46 AM IST

രൂപ എക്കാലത്തെയും താഴ്ന്ന നിലയിൽ

രൂപയുടെ മൂല്യത്തിൽ റെക്കോർഡ് ഇടിവ്. വിനിമയനിരക്കിൽ ഡോളറിനെതിരെ 76.10 എന്ന നിരക്കിലാണ് ഇന്ത്യൻ രൂപ ഇപ്പോൾ.

9:44 AM IST

വിലക്ക് ലംഘിച്ച് അന്തർ സംസ്‌ഥാന ബസ് സർവ്വീസ്

വിലക്ക് ലംഘിച്ച് സർവീസ് നടത്തിയ അന്തർ സംസ്‌ഥാന ബസ് പൊലീസ് കസ്റ്റഡിയിൽ എടുത്തു. എറണാകുളം വൈറ്റില ഹബ്ബിൽ വച്ചാണ് ബസ് പിടികൂടിയത്. ബെംഗളൂരുവിൽ നിന്നും എത്തിയ ബസ് മരട് പൊലീസാണ് പിടികൂടിയത്. സാം ട്രാവൽസിന്‍റെ ബസാണ് വിലക്ക് ലംഘിച്ച് സർവ്വീസ് നടത്തിയത്. 

9:42 AM IST

ഓൺലൈൻ ടാക്സി സർവ്വീസുകൾ ചുരുക്കുന്നു

ഓൺലൈൻ ടാക്‌സി സർവീസുകളായ ഓലയും ഊബറും സർവീസ് പരിമിതപ്പെടുത്തുന്നു. അത്യാവശ്യ യാത്രകൾ മാത്രമേ അനുവദിക്കൂവെന്ന് ഓല. ഒന്നിലധികം പേർ  ഒന്നിച്ചുള്ള യാത്ര ഊബർ നേരത്തെ തന്നെ നിർത്തിയിരുന്നു

9:40 AM IST

നിർദ്ദേശങ്ങൾ ലംഘിച്ചതിന് കൊല്ലത്തും കേസ്

കൊല്ലം: ആരോഗ്യ വകുപ്പിന്റെ നിർദേശം ലംഘിച്ചതിന് കൊല്ലത്ത് രണ്ട് കേസുകൾ കൂടി രജിസ്റ്റർ ചെയ്തു. കൊല്ലം, കരുനാഗപ്പള്ളി എന്നിവിടങ്ങളിലാണ് കേസ് എടുത്തത്. 

9:36 AM IST

പത്തനതിട്ടയിലും കൂടുതൽ ഐസൊലേഷൻ സെന്‍ററുകൾ

പത്തനംതിട്ട ജില്ലയിലെ 5 നിയമസഭാ മണ്ഡലങ്ങളിലും ഐസൊലേഷൻ സെന്‍ററുകൾ തുടങ്ങും.

9:30 AM IST

കാസർകോട്  കൂടുതൽ ഐസൊലേഷൻ വാർഡുകൾ

കാസർകോട് : ജില്ലയിൽ 44 ഐസൊലേഷൻ വാർഡുകളും കൊവിഡ് സെന്‍ററുകളും തുടങ്ങും. ഇവ ഉടൻ പ്രവർത്തനം തുടങ്ങുമെന്ന് ജില്ലാ കളക്ടർ അറിയിച്ചു. എല്ലാ പഞ്ചായത്തുകളിലും മുൻസിപ്പാലിറ്റികളിലും കൊവിഡ് സെന്‍ററുകൾ തുടങ്ങും. 

9:23 AM IST

ഓഹരി വിപണയിൽ തകർച്ചയോടെ തുടക്കം

ഓഹരിവിപണിയിൽ തകർച്ചയോടെ തുടക്കം. സെൻസെക്സ് 2700 പോയിന്‍റ് നഷ്ടത്തിൽ വ്യാപാരം തുടങ്ങി. നിഫ്റ്റി 8000 നു താഴെ വ്യാപാരം തുടങ്ങി. കോവിഡിനെ തുടർന്ന് ആഗോളവിപണികളിൽ ഉണ്ടായ നഷ്ടം ഇന്ത്യൻ ഓഹരി വിപണിയിലും പ്രതിഫലിക്കുന്നു. 

9:22 AM IST

പത്തനംതിട്ടിയിൽ ഒരാൾ കൂടി ആശുപത്രിയിൽ നിരീക്ഷണത്തിൽ

പത്തനംതിട്ടിയിൽ ഒരാൾക്കൂടി ആശുപത്രിയിൽ നിരീക്ഷണത്തിൽ. കാനഡയിൽ നിന്നെത്തിയ ആളെയാണ് നിരീക്ഷണത്തിൽ പ്രവേശിപ്പിച്ചത്.

9:11 AM IST

അവൈലബിൾ ക്യാബിനറ്റ് രാവിലെ 10ന്

തിരുവനന്തപുരം: കേരള മന്ത്രിസഭയുടെ അവൈലബിൾ ക്യാബിനറ്റ് രാവിലെ 10ന് ചേരും. തലസ്ഥാനത്തുള്ള മന്ത്രിമാരെ മുഖ്യമന്ത്രി യോഗത്തിന് വിളിച്ചു.

9:07 AM IST

യാത്രാക്കപ്പലുകൾ നിർത്തും

കോഴിക്കോട്: ബേപ്പൂർ തുറമുഖത്ത് നിന്ന് ലക്ഷദ്വീപിലേക്കുള്ള യാത്രാക്കപ്പലുകൾ നിർത്തും. ഇന്ന് ഉച്ചക്ക് പുറപ്പെടുന്ന കപ്പലിന് ശേഷം ഇനി ഒരറിയിപ്പുണ്ടാകുന്നത് വരെ സർവ്വീസ് ഉണ്ടായിരിക്കില്ല. ചരക്ക് കപ്പൽ സർവ്വീസ് നടത്തും. 

9:07 AM IST

മഹാരാഷ്ട്രയിൽ 15 പേർക്ക് കൂടി കൊവിഡ്

മുംബൈ: മഹാരാഷ്ട്രയിൽ 15 പേർക്ക് കൂടെ കൊവിഡ് 19 സ്ഥിരീകരിച്ചു. ഇതോടെ സംസ്ഥാനത്തെ രോഗികളുടെ എണ്ണം 89 ആയി. പുതുതായി രോഗം സ്ഥിരീകരിച്ച 14 പേർ മുംബൈയിലാണ്.1 ആൾ പൂനെയിലും. 

8:50 AM IST

13 സംസ്ഥാനങ്ങളും 80 ജില്ലകളും അടച്ചു

രാജ്യത്ത് 13 സംസ്ഥാനങ്ങളും 80 ജില്ലകളും അടച്ചു

Read more at:കൊവിഡ് 19; ലോക്ക്ഡൗൺ സമയത്ത് ആളുകൾ എന്തൊക്കെ ചെയ്യരുത്? ...

 

8:30 AM IST

ഐസൊലേഷനിലുള്ള രണ്ട് പേർ മുങ്ങി

കൊച്ചി: പറവൂർ പെരുവാരത്ത് ആരോഗ്യവകുപ്പ് ഐസൊലേഷനിലുള്ള രണ്ട് പേർ മുങ്ങി. യു കെ യിൽ നിന്ന് വന്ന ഇവർ വീട്ടിൽ നിരീക്ഷണത്തിലായിരുന്നു. 14 ദിവസത്തെ നിരീക്ഷണ കാലാവധി ഇവർ പൂർത്തിയാക്കിയിട്ടില്ലെന്ന് മെഡിക്കൽ സൂപ്രണ്ട് പറയുന്നു. ആരോഗ്യപ്രവർത്തകർ പൊലീസിൽ പരാതി നൽകി.

Read more at: കൊവിഡ് നിരീക്ഷണത്തിലായിരുന്ന രണ്ട് പേർ കൂടി മുങ്ങി

 

7:50 AM IST

നി‌‌ർദ്ദേശം ലംഘിച്ചവർക്കെതിരെ കേസ്

കോഴിക്കോട്: കോവിഡ് 19 മുൻകരുതൽ നിർദേശം ലംഘിച്ച 2 പേർക്കെതിരെ കോഴിക്കോട് കേസെടുത്തു. 50ലധികം പേരെ പങ്കെടുപ്പിച്ച് വിവാഹം നടത്തിയതിന് എലത്തൂർ സ്വദേശിക്കെതിരെയും ക്യാറന്റൈൻ നിർദ്ദേശം മറികടന്ന് ഇറങ്ങി നടന്നതിന് ചെമ്മങ്ങനാട് സ്വദേശിക്കെതിരെയുമാണ് കേസെടുത്തത്

7:45 AM IST

റൂട്ട് മാപ്പ് തയ്യാറാക്കൽ നിർത്തി

കാസർകോട്: ജില്ലയിലെ കൊവിഡ് സ്ഥിരീകരിച്ചവരുടെ റൂട്ട് മാപ്പ് തയ്യാറാക്കുന്നത് അവസാനിപ്പിക്കാൻ തീരുമാനം. രോഗികളുടെ എണ്ണകൂടുതലും സമയനഷ്ടവും കണക്കിലെടുത്താണ് തീരുമാനം. ഇനി മുതൽ രോഗികളുമായി സമ്പർക്കം പുലർത്തിയവരെ പ്രാദേശിക ജാഗ്രതാ സമിതികൾ നേരിട്ട് ബന്ധപ്പെടും

Read more at: കാസർകോട്ടെ രണ്ട് കൊവിഡ് ബാധിതർ കൂടി വ്യാപക സമ്പർക്കം നടത്തി, റൂട്ട് മാപ്പ് തയ്യാറാക്കുന്നത് നിർത്തി ...

 

അസാധാരണമായ സാഹചര്യത്തിലേക്കാണ് കേരളം പോകുന്നതെന്ന് മുഖ്യമന്ത്രി. ഈ അവസ്ഥയിൽ കേരളം മൊത്തം ലോക്ക് ഡൗണ്‍ പ്രഖ്യാപിക്കുന്നുവെന്നും പിണറായി. മാർച്ച് 31 വരെയാണ് നിലവിലെ ലോക്ക് ഡൗണ്‍