ഭലാരാ വനമേഖലയിൽ നിന്ന് ഒരു എസ്എൽആർ റൈഫിളും വെടിയുണ്ടകളും ഉൾപ്പെടെയുള്ള ആയുധങ്ങൾ പിടിച്ചെടുത്തു. പിടിച്ചെടുത്ത ആയുധങ്ങളുടെ ഉറവിടം കണ്ടെത്താനും ഇതിന് പിന്നിലുള്ളവരെ തിരിച്ചറിയാനും പോലീസ് അന്വേഷണം ആരംഭിച്ചിട്ടുണ്ട്.
ഡോഡ: ജമ്മു കശ്മീരിലെ ഡോഡയിൽ പൊലീസ് നടത്തിയ സംയുക്ത തിരച്ചിലിൽ തീവ്രവാദികളുടെ ഒളിത്താവളം കണ്ടെത്തി. ഠത്രി പോലീസ് സ്റ്റേഷൻ പരിധിയിൽ വരുന്ന ഭലാരാ വനമേഖലയിൽ ഞായറാഴ്ച നടത്തിയ പ്രത്യേക ഓപ്പറേഷൻ ഗ്രൂപ്പിൻ്റെ നീക്കത്തിലാണ് വലിയ ഒളിത്താവളം കണ്ടെത്തിയത്. സീനിയർ സൂപ്രണ്ട് ഓഫ് പോലീസ് (എസ്.എസ്.പി.) ഡോഡ സന്ദീപ് മേത്തയുടെ മേൽനോട്ടത്തിലാണ് ഓപ്പറേഷൻ നടന്നത്. രഹസ്യ വിവരത്തെ തുടർന്ന് നടത്തിയ തിരച്ചിലിൽ ഒരു എസ്എൽആർ റൈഫിളും വെടിയുണ്ടകളും കണ്ടെടുത്തു.
ആയുധങ്ങളും വെടിക്കോപ്പുകളും പിടിച്ചെടുത്തത് മേഖലയിലെ സുരക്ഷാ സംവിധാനം ശക്തിപ്പെടുത്തുന്നതിനും ദേശവിരുദ്ധ ശക്തികളെ തടയുന്നതിനും നിർണായകമാണെന്ന് ജമ്മു കശ്മീർ പോലീസ് പ്രസ്താവനയിൽ പറയുന്നു. ഡോഡ ജില്ലയിൽ സമാധാനവും സുസ്ഥിരതയും പൊതു സുരക്ഷയും നിലനിർത്തുന്നതിനുള്ള അചഞ്ചലമായ പ്രതിബദ്ധതയാണ് ഈ ഓപ്പറേഷൻ തെളിയിക്കുന്നതെന്നും പൊലീസ് പറയുന്നു. പിടിച്ചെടുത്ത ആയുധങ്ങളുടെ ഉറവിടം കണ്ടെത്താനും ഇത് ഒളിപ്പിച്ചുവെച്ച വ്യക്തികളെയോ ഗ്രൂപ്പുകളെയോ തിരിച്ചറിയാനും കൂടുതൽ അന്വേഷണം പുരോഗമിക്കുകയാണ്.
ഷോപ്പിയാനിൽ നടന്ന റെയ്ഡുകൾ
നേരത്തെ, നവംബറിൽ ഷോപ്പിയാൻ പോലീസ് പ്രദേശത്ത് പ്രധാന റെയ്ഡുകൾ നടത്തിയിരുന്നു. നിരോധിത സംഘടനയായ ജമാഅത്ത്-ഇ-ഇസ്ലാമിയുമായി ബന്ധമുള്ള വ്യക്തികളെയും സ്ഥാപനങ്ങളെയും ലക്ഷ്യമിട്ടാണ് യു.എ.പി.എ. നിയമപ്രകാരം ഈ പരിശോധനകൾ നടത്തിയത്. ഹിസ്ബുൾ മുജാഹിദ്ദീൻ പോലുള്ള തീവ്രവാദി ഗ്രൂപ്പുകളുമായി ബന്ധമുണ്ടെന്ന് ആരോപിച്ച് ജമാഅത്ത്-ഇ-ഇസ്ലാമി ജമ്മു കശ്മീരിനെ ഇന്ത്യൻ സർക്കാർ പലതവണ നിരോധിച്ചിട്ടുണ്ട്. ഏറ്റവും ഒടുവിൽ 2019-ൽ ഏർപ്പെടുത്തിയ നിരോധനം 2024 ഫെബ്രുവരിയിൽ അഞ്ച് വർഷത്തേക്ക് കൂടി നീട്ടി. 1947-ലെ ഇന്ത്യാ വിഭജനത്തിന് ശേഷം ഈ പ്രസ്ഥാനം പാകിസ്ഥാൻ, ഇന്ത്യ എന്നിവിടങ്ങളിൽ സ്വതന്ത്ര സംഘടനകളായി പ്രവർത്തിക്കാൻ തുടങ്ങി.
