കൊവിഡ് ബാധിച്ച് മരണം, മൃതദേഹം സംസ്കരിച്ച് 18ാം ദിവസം വൃദ്ധ മടങ്ങിയെത്തി, അമ്പരന്ന് ബന്ധുക്കൾ
രോഗം മാറിയ തന്നെ കൂട്ടാൻ ആരും ആശുപത്രിയിലേക്ക് വരാത്തതിൽ മനംനൊന്തിരുന്ന ഗിരിജമ്മയ്ക്ക് ആശുപത്രി അധികൃതർ വീട്ടിലെത്താൻ 3000 രൂപ നൽകി. ഇതുമായി വീട്ടിലെത്തിയപ്പോഴാണ് നടന്നതെല്ലാം ഗിരിജ്ജമ്മയും അറിയുന്നത്...
ഹൈദരാബാദ്: 70 കാരിയായ തന്റെ ഭാര്യ ഗിരിജ്ജമ്മയെ കൊവിഡ് ബാധിച്ച് ആശുപത്രിയിൽ പ്രവേശിപ്പിച്ചതായിരുന്നു മുത്യാല ഗദ്ദയ്യ. കൊവിഡ് ബാധിച്ച ഭാര്യ വിജയവാഡയിലെ ആശുപത്രിയിൽ വച്ച് മരിച്ചു. മെയ് 15ന് മൂടിക്കെട്ടി കിട്ടിയ ഭാര്യയുടെ മൃതദേഹം ഗദ്ദയ്യ കൊവിഡ് പ്രോട്ടോക്കോൾ പ്രകാരം സംസ്കരിച്ചു. എന്നാൽ 18ാം ദിവസം ഗദ്ദയ്യയെയും വീട്ടുകാരെയും കാത്തിരുന്നത് ഞെട്ടിക്കുന്ന കാഴ്ചയായിരുന്നു, മരിച്ചെന്ന് കരുതിയ 70 കാരി ഗിരിജ്ജമ്മ തിരിച്ചുവന്നു!
ആന്ധ്രാപ്രദേശിലെ ജഗയ്യപ്പേട്ട് മണ്ഡാലിലിലെ ക്രിസ്റ്റീനപേട്ട് ഗ്രാമത്തിലാണ് വിചിത്രമായ അനുഭവം ഉണ്ടായത്. മെയ് 12നാണ് വിജയവാഡയിലെ സർക്കാർ ആശുപത്രിയിൽ വൃദ്ധയെ പ്രവേശിപ്പിച്ചത്. മെയ് 15ന് ആശുപത്രിയിലെത്തി അന്വേഷിച്ചപ്പോൾ ഭാര്യ മരിച്ചുപോയെന്നാണ് ഗദ്ദയ്യക്ക് ലഭിച്ച വിവരം. കെട്ടിപ്പൊതുഞ്ഞ ഒരു മൃതദേഹവും അയാൾ ആശുപത്രിയിൽ നിന്ന് ഏറ്റുവാങ്ങി. തകർന്നുപോയ ആ വൃദ്ധൻ, മൃതദേഹം തന്റെ ഗ്രാമത്തിലെത്തിക്കുകയും ആചാരപ്രകാരം സംസ്കരിക്കുകയും ചെയ്തു. ദിവസങ്ങൾ കഴിഞ്ഞ് മെയ് 23ന് അവരുടെ 35കാരൻ മകൻ മുത്യാല രമേശും കൊവിഡ് ബാധിച്ച് മരിച്ചു.
ഇതോടെ പൂർണ്ണമായി തകർന്ന കുടുംബം മകന്റെ സംസ്കാര ചടങ്ങുകളും നടത്തി. എന്നാൽ ഗിരിജമ്മ വീട്ടിലെത്തിയപ്പോഴാണ് ഞെട്ടിക്കുന്ന സത്യം കുടുംബം മനസ്സിലാക്കിയത്. ഗിരിജമ്മയ്ക്ക് പകരം ആശുപത്രി കൈമാറിയത് മറ്റൊരു മൃതദേഹമായിരുന്നു. രോഗം മാറിയ തന്നെ കൂട്ടാൻ ആരും ആശുപത്രിയിലേക്ക് വരാത്തതിൽ മനംനൊന്തിരുന്ന ഗിരിജമ്മയ്ക്ക് ആശുപത്രി അധികൃതർ വീട്ടിലെത്താൻ 3000 രൂപ നൽകി. ഇതുമായി വീട്ടിലെത്തിയപ്പോഴാണ് നടന്നതെല്ലാം ഗിരിജ്ജമ്മയും അറിയുന്നത്. കെട്ടിപ്പൊതിഞ്ഞ് തന്നതിനാൽ മൃതദേഹം മറ്റാരുടേതെങ്കിലുമാണോ എന്ന് ഗിരിജ്ജമ്മയുടെ കുടുംബമോ, നാട്ടുകാരോ നോക്കിയിരുന്നില്ല. കൊവിഡ് ബാധ ഭയന്ന് ഇവ‍ർ പെട്ടന്ന് സംസ്കരിക്കുകയായിരുന്നു.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ച് നിന്നാല്‍ നമുക്കീ മഹാമാരിയെ തോല്‍പ്പിക്കാനാവും. #BreakTheChain #ANCares #IndiaFightsCorona
