ദില്ലിയിലും സമീപ പ്രദേശങ്ങളിലും രാവിലെ മുതൽ കനത്ത മഴ. മോശം കാലാവസ്ഥയെത്തുടർന്ന് ദില്ലി വിമാനത്താവളത്തിൽ നിന്നും 3 അന്താരാഷ്ട്ര സർവീസുകൾ ഉൾപ്പെടെ 15 വിമാനങ്ങൾ റദ്ദാക്കി.
ദില്ലി: ദില്ലിയിലും സമീപ പ്രദേശങ്ങളിലും രാവിലെ മുതൽ കനത്ത മഴ തുടരുന്നു. ന്യൂഡൽഹി ഉൾപ്പെടെ എട്ട് ജില്ലകളിൽ റെഡ് അലർട്ട് പ്രഖ്യാപിച്ചിരിക്കുകയാണ്. ഇടിമിന്നലോടെ മണിക്കൂറിൽ 60 കി.മീ വേഗതയിൽ വീശിയടിച്ച കാറ്റും മഴയും നഗരത്തിൽ കനത്ത വെള്ളക്കെട്ടിലാക്കി. മോശം കാലാവസ്ഥയെത്തുടർന്ന് ദില്ലി വിമാനത്താവളത്തിൽ നിന്നും 3 അന്താരാഷ്ട്ര സർവീസുകൾ ഉൾപ്പെടെ 15 വിമാനങ്ങൾ റദ്ദാക്കി. ജയ്പൂർ, ഛത്തീസ്ഗഡ്, ലക്നൗ എന്നിവിടങ്ങളിലേക്കുള്ള സർവീസുകളും ഇതിൽപ്പെടും. വിമാനക്കമ്പനികൾ യാത്രക്കാർക്ക് ജാഗ്രതാ നിർദേശം നൽകിയിട്ടുണ്ട്. ഗാസിയാബാദ്, നോയിഡ, ഗുരുഗ്രാം തുടങ്ങിയ മേഖലകളിലെ റോഡുകൾ വെള്ളത്തിനടിയിലായതോടെ കനത്ത ഗതാഗതക്കുരുക്ക് രൂപപ്പെട്ടു.
