ദില്ലിയിൽ 55 ഹോട്ട് സ്പോട്ടുകള്‍; നിരവധി കോളനികള്‍ സീല്‍ ചെയ്തു, മഹാരാഷ്ട്രയില്‍ 350 കൊവിഡ് കേസുകള്‍

കൊവിഡ് 19-ന്റെ പശ്ചാത്തലത്തിൽ ആരോഗ്യ പ്രവർത്തകരുടെ സുരക്ഷക്കായി പ്രത്യേക മാർഗരേഖ പുറത്തിറക്കാൻ കേന്ദ്രത്തിന് നിർദ്ദേശം നൽകണമെന്ന് ആവശ്യപ്പെട്ട് ഇന്ത്യൻ പ്രൊഫഷണൽ നഴ്സസ് അസോസിയേഷൻ സുപ്രീംകോടതിയെ സമീപിച്ചു. കേസ് കോടതി നാളെ പരിഗണിക്കും

ഗുജറാത്ത് എംഎല്‍എ ഇമ്രാന്‍ ഖെഡാവാലക്ക് കൊവിഡ് സ്ഥിരീകരിച്ചു. മുഖ്യമന്ത്രി വിജയ് രുപാണിയുമായി എംഎല്‍എ കൂടിക്കാഴ്‍ച നടത്തിയിരുന്നു. ഉപമുഖ്യമന്ത്രി നിതിൻ പട്ടേൽ, ആഭ്യന്തര സഹമന്ത്രി, മാധ്യമപ്രവർത്തകർ എന്നിവരെയും ഇന്ന് ഇമ്രാൻ ഖേഡവാല കണ്ടിരുന്നു. കൊവിഡ് ഹോട്ട്സ്പോട്ടുകളിൽ എംഎൽഎ ബോധവൽക്കരണ പരിപാടിയിൽ പങ്കെടുത്തിരുന്നു.

ദില്ലിയിൽ ഹോട്ട് സ്പോട്ടുകളുടെ എണ്ണം 55 ആയി ഉയര്‍ന്നു. സെൻട്രൽ ദില്ലിയിലെയും വെസ്റ്റ് ദില്ലിയിലെയും നിരവധി കോളനികൾ സീൽ ചെയ്തു. ബെംഗളൂരുവിൽ 38 കൊവിഡ് ഹോട്ട് സ്പോട്ടുകളാണ് പുതിയതായി ഉയര്‍ന്നത്. നഗരത്തിലെ മടിവാള, വസന്ത് നഗർ, എസ് ജി പാളയ, സി വി രാമൻ നഗർ തുടങ്ങിയ മേഖലകൾ തീവ്ര ബാധിതം

കോവളത്ത് ലോക്ക് ഡൗണ്‍ ലംഘിച്ച് വിദേശികൾ കടലില്‍ ഇറങ്ങിയ സംഭവത്തിൽ പൊലീസ് കേസെടുത്തു. പതിനാറ് വിദേശികൾക്കും ഇവർ താമസിച്ചിരുന്ന ഹോട്ടൽ കാലിഫോർണിയക്കുമെതിരെയാണ് കോവളം പൊലീസ് കേസെടുത്തത്

കൊവിഡ് ബാധിച്ച് തെലങ്കാനയില്‍ ഒരാള്‍ക്കൂടി മരിച്ചു. ആകെ മരണം 18 ആയി. ഇന്ന് 25 പേര്‍ക്കാണ് കൊവിഡ് സ്ഥിരീകരിച്ചത്. 

സംസ്ഥാനത്ത് ലോക്ക് ഡൌണ്‍ നിയന്ത്രണങ്ങള്‍ ലംഘിച്ചു യാത്ര ചെയ്തതിന് ഇന്ന് കേസെടുത്തത് 2182 പേര്‍ക്കെതിരെ. ഇന്ന് മാത്രം അറസ്റ്റിലായത് 2012 പേരാണ്. ഇവരില്‍ നിന്ന് 1532 വാഹനങ്ങളും പിടിച്ചെടുത്തു. കൊല്ലത്താണ് ഏറ്റവുമധികം കേസുകള്‍ റിപ്പോര്‍ട്ട് ചെയ്തിട്ടുള്ളത്.

ഉത്തർപ്രദേശിലെ യോ​ഗി ആദിത്യനാഥ് സർക്കാരിനെതിരെ കോൺ​ഗ്രസ് നേതാവ് പ്രിയങ്ക ​ഗാന്ധി. സംസ്ഥാനത്ത് കൊവിഡ് 19 പരിശോധന ശോകാവസ്ഥയിലാണെന്നും രോഗം ബാധിച്ചതിനെ തുടര്‍ന്ന് ഒരാള്‍ മരിച്ചതിന് ശേഷം അഞ്ച് പേരെയാണ് പോസറ്റീവാണെന്ന് കണ്ടെത്തിയതെന്നും പ്രിയങ്ക ഗാന്ധി പറഞ്ഞു

ദില്ലിയില്‍ ഇന്ന് കൊവിഡ് സ്ഥിരീകരിച്ചത് 51 പേര്‍ക്ക്. 1561 പേര്‍ക്കാണ് ഇതുവരെ ഇവിടെ കൊവിഡ് സ്ഥിരീകരിച്ചത്. ഇന്ന് രണ്ടുപേര്‍ കൂടി മരിച്ചതോടെ മരണസംഖ്യ 30 ആയി. 

ലോക്ക്ഡൗൺ നീട്ടി ആഭ്യന്തരമന്ത്രാലയം ഉത്തരവിറക്കി. പുതിയ മാർഗ്ഗനിർദ്ദേശങ്ങൾ വരുന്നത് വരെ നിലവിലെ നിർദ്ദേശങ്ങൾ തുടരുമെന്ന് ഉത്തരവിൽ

മെയ് മൂന്ന് വരെ രാജ്യം അടഞ്ഞ് തന്നെ; ലോക്ക് ഡൗൺ നീട്ടി ആഭ്യന്തരമന്ത്രാലയം ഉത്തരവിറക്കി...

ദില്ലിയില്‍ രണ്ട് മലയാളി നഴ്‍സുമാര്‍ക്ക് കൂടി കൊവിഡ് സ്ഥിരീകരിച്ചു. ദില്ലി സാകേത് മാക്സ് ആശുപത്രിയിലെ നഴ്‍സുമാരാണ് ഇവര്‍. ആശുപത്രിയിലെ മൂന്ന് നഴ്‍സുമാര്‍ക്ക് നേരത്തെ കൊവിഡ് സ്ഥിരീകരിച്ചിരുന്നു. 

ഇന്ത്യയുടെ ജിഡിപി വളർച്ചാ നിരക്ക് 2020-ൽ വെറും 1.9 ശതമാനം മാത്രമായിരിക്കുമെന്ന് ആഗോള സാമ്പത്തിക ഏജൻസിയായ ഇന്‍റർനാഷണൽ മോണിറ്ററി ഫണ്ട്, അഥവാ ഐഎംഎഫ്. 1930-കളിൽ ലോകവിപണിയെത്തന്നെ തകർത്ത ആഗോളസാമ്പത്തികമാന്ദ്യത്തിന് സമാനമായ തരം സാമ്പത്തിക നഷ്ടത്തിലേക്ക് ആഗോളവിപണി കൂപ്പുകുത്തുമ്പോൾ, അതിന്‍റെ പ്രതിഫലനങ്ങൾ ഇന്ത്യയിലുമുണ്ടാകുമെന്നാണ് റിപ്പോർട്ട്. കൊവിഡ് പ്രതിസന്ധിയുടെ പശ്ചാത്തലത്തിൽ ലോകമെമ്പാടുമുള്ള സാമ്പത്തിക വിപണി പൂർണമായും നിശ്ചലാവസ്ഥയിലാണ്.

ലോക്ക് ഡൗൺ നീട്ടിയതോടെ മുൻകൂട്ടി ബുക്ക് ചെയ്ത വിമാന ടിക്കറ്റുകൾ ക്യാൻസൽ ചെയ്യുന്നവര്‍ക്ക് പണം തിരിച്ചുനൽകാനാകില്ലെന്ന് വിമാന കമ്പനികൾ പ്രഖ്യാപിച്ചു. മറ്റ് ചാര്‍ജുകൾ ഈടാക്കാതെ മറ്റൊരു ദിവസത്തേക്ക് ടിക്കറ്റ് മാറ്റി നൽകാമെന്നാണ് കമ്പനികളുടെ വാഗ്ദാനം. ഇതോടെ ടിക്കറ്റ് ക്യാൻസൽ ചെയ്യുന്നവര്‍ക്ക് പണം നഷ്ടമാകും.

കര്‍ണാടകത്തില്‍ കൊവിഡ് ബാധിച്ച് ഒരാള്‍ക്കൂടി മരിച്ചു. ഇതോടെ മരണം പത്തായി. 24 മണിക്കൂറിനിടെ നാല് മരണമാണ് ഇവിടെ റിപ്പോര്‍ട്ട് ചെയ്‍തിരിക്കുന്നത്. 

തമിഴ്നാട്ടിൽ നിന്നും അടിയന്തിര ഹൃദയ ശസ്ത്രക്രിയക്കായി ഒരു ദിവസം മാത്രം പ്രായമുള്ള കുഞ്ഞിനെയും വഹിച്ചുള്ള ആംബുലൻസ് കേരളത്തിലേക്ക് പുറപ്പെട്ടു. കേരള, തമിഴ്നാട് സർക്കാരുകളുടെ സംയുക്ത ഇടപെടലിനെ തുടർന്നാണ് അതിർത്തി കടക്കാൻ ആംബുലൻസിന് അനുമതി കിട്ടിയത്. രാത്രിയോടെ ആംബുലൻസ് കൊച്ചിയിൽ എത്തിച്ചേരും.

തമിഴ്‍നാട്ടില്‍ കൊവിഡ് ബാധിച്ച് ഒരാള്‍ക്കൂടി മരിച്ചു. ദിണ്ടിഗൽ സ്വദേശിയായ 95 കാരനാണ് മരിച്ചത്. കരൂർ ആശുപത്രിയിൽ ചികിത്സയിലായിരുന്നു ഇയാള്‍. തമിഴ്നാട്ടിൽ 31 പേർക്കാണ് ഇന്ന് കൊവിഡ് സ്ഥിരീകരിച്ചത്. കൊവിഡ് ബാധിതർ 1204 ആയി.

കൊവിഡ്‌ ലോക സാമ്പത്തികരംഗത്തെ തകർക്കുമെന്ന് ഐഎംഎഫ്. 2020 സാമ്പത്തിക വർഷം ഇന്ത്യയുടെ വളർച്ച നിരക്ക് 1.9 % മാത്രമാവും. 
90 വർഷത്തിനിടയിലെ ഏറ്റവും വലിയ സാമ്പത്തിക തകർച്ചയായിരിക്കും ഉണ്ടാവുക. യൂറോപ്പും അമേരിക്കയും വളർച്ച നിരക്കിൽ നെഗറ്റിവിലെത്തും. നേരിയ തോതിലെങ്കിലും പിടിച്ചുനിൽക്കുന്നത് ഏഷ്യയാവുമെന്നും ഐഎംഎഫ്

ബാന്ദ്ര റെയിൽവേ സ്റ്റേഷനിൽ ആയിരക്കണക്കിന് അതിഥി തൊഴിലാളികൾ പ്രതിഷേധിക്കുന്നു, സ്വന്തം നാടുകളിലേക്ക് മടങ്ങണമെന്നാവശ്യപ്പെട്ടാണ് പ്രതിഷേധം. പൊലീസ് ലാത്തി വീശി. ഇന്ന് ട്രെയിൻ സർവ്വീസ് തുടങ്ങുമെന്ന പ്രചരണത്തിൽ വിശ്വസിച്ചാണ് ഇവരെകത്തിയത്. 

കൊവിഡ് 19 ബാധിച്ച 13 പേര്‍ കൂടി ഇന്ന് രോഗമുക്തി നേടി. കാസര്‍ഗോഡ് ജില്ലയില്‍ നിന്നുള്ള 6 (കണ്ണൂര്‍ ജില്ലയില്‍ ചികിത്സയിലായിരുന്ന 4 പേര്‍) പേരുടെയും എറണാകുളം, പാലക്കാട് ജില്ലകളില്‍ നിന്നുള്ള 2 പേരുടെ വീതവും, കൊല്ലം, തൃശൂര്‍, മലപ്പുറം ജില്ലകളില്‍ നിന്നുള്ള ഓരോരുത്തരുടെ വീതവും പരിശോധനാ ഫലമാണ് നെഗറ്റീവ് ആയത്. ഇതോടെ നിലവില്‍ 173 പേരാണ് സംസ്ഥാനത്തെ വിവിധ ആശുപത്രികളില്‍ ചികിത്സയിലുള്ളത്. 211 പേരാണ് ഇതുവരെ കൊവിഡില്‍ നിന്നും രോഗമുക്തി നേടിയത്.

സംസ്ഥാനത്ത് ഇന്ന് 8 പേര്‍ക്ക് കൊവിഡ്-19 സ്ഥിരീകരിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. കണ്ണൂര്‍ ജില്ലയില്‍ നിന്നുള്ള 4 പേര്‍ക്കും കോഴിക്കോട് ജില്ലയില്‍ നിന്നുള്ള 3 പേര്‍ക്കും കാസര്‍ഗോഡ് ജില്ലയില്‍ നിന്നുള്ള ഒരാള്‍ക്കുമാണ് രോഗം സ്ഥിരീകരിച്ചത്. ഇതില്‍ 5 പേര്‍ ദുബായില്‍ നിന്നും വന്നവരാണ്. 3 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. കണ്ണൂര്‍ ജില്ലയിലെ 3 പേരും കോഴിക്കോട്, കാസര്‍ഗോഡ് ജില്ലകളിലെ ഓരോരുത്തരുമാണ് ദുബായല്‍ നിന്നും വന്നവര്‍. കോഴിക്കോട് ജില്ലയിലെ രണ്ടുപേര്‍ക്കും കണ്ണൂര്‍ ജില്ലയിലെ
ഒരാള്‍ക്കും സമ്പര്‍ക്കത്തിലൂടെയാണ് രോഗം ബാധിച്ചത്.

Read more at: സംസ്ഥാനത്ത് ഇന്ന് എട്ട് പേര്‍ക്ക് കൊവിഡ്; രോഗം ഭേദമായത് 13 പേര്‍ക്ക് ...

രാജ്യത്ത് കൊവിഡ് മരണം 353 ആയി, ആകെ രോഗബാധിതരുടെ എണ്ണം 10,815 ആയി. 24 മണിക്കൂറിനിടെ 29മരണം, 1463 പുതിയ കേസുകൾ. 1190 പേർക്ക് രോഗം ഭേദമായി