മരണത്തിൽനിന്ന് ജീവിതത്തിലേക്ക് മടങ്ങിയെത്തി രേണുകമ്മ. മരിച്ചെന്ന് ഡോക്ടർ വിധിയെഴുതിയതിനെ തുടർന്ന് സംസ്കാര ചടങ്ങുകൾക്ക് കുടുംബം ഒരുങ്ങിയപ്പോഴാണ് ഹാവേരിയിലെ ഗൊഡച്ചികൊണ്ട ഗ്രാമത്തിൽ താമസിക്കുന്ന 63 വയസ്സുകാരിയുടെ മടങ്ങിവരവ്.
ഹാവേരി: മരിച്ചെന്ന് ഉറപ്പിച്ച്, സംസ്കാര ചടങ്ങുകൾക്ക് ഒരുങ്ങുമ്പോൾ അപ്രതീക്ഷിതമായി ജീവനുണ്ടെന്ന് കണ്ടെത്തിയാൽ എങ്ങനെയിരിക്കും? കർണാടകത്തിലെ ഹാവേരി ജില്ലയിൽ നിന്നാണ് ഈ അത്ഭുത വാർത്ത. അന്ത്യോപചാരം അർപ്പിക്കാൻ പൂമാലകളുമായി കാത്തുനിന്ന ബന്ധുക്കൾക്ക് മുന്നിലൂടെ ജീവിതത്തിലേക്ക് മടങ്ങിവന്നിരിക്കുകയാണ് ഒരമ്മ.
ഹാവേരിയിലെ ഗൊഡച്ചികൊണ്ട ഗ്രാമത്തിൽ താമസിക്കുന്ന 63 വയസ്സുകാരിയായ രേണുകമ്മയ്ക്ക് പെട്ടെന്നാണ് കടുത്ത അസുഖം ബാധിച്ചത്. ബിപിയും ഷുഗറും ഒന്നിച്ച് ഡൗണായതോടെ അബോധാവസ്ഥയിലായി. മക്കൾ വിളിച്ചുവരുത്തിയ നാട്ടിലെ ഡോക്ടർ അവർ മരിച്ചെന്ന് വിധിയും എഴുതി. ശ്വാസം നിലച്ചിരുന്നതിനാൽ മക്കളും അത് വിശ്വസിച്ചു.
Related Articles
പിറ്റേന്ന് രാവിലെ വീട്ടുമുറ്റത്ത് ശവസംസ്കാര ചടങ്ങുകൾക്കായി പന്തലുയർന്നു. ബന്ധുക്കൾ അവസാനമായി ഒരുനോക്ക് കാണാൻ പൂമാലകളുമായി എത്തി. മറവു ചെയ്യാനുള്ള കുഴിയും തയ്യാറായി. ഈ ഘട്ടത്തിലാണ് അമ്മയുടെ നെഞ്ച് ചെറുതായി ഉയരുകയും താഴുകയും ചെയ്യുന്നത് മകൻ കണ്ടത്. പിന്നെ താമസിച്ചില്ല, അമ്മയുമായി ആശുപത്രിയിലേക്ക് ഓടി.
ആശുപത്രിയിലെ അത്യാഹിത വിഭാഗത്തിലേക്ക് രേണുകമ്മയെ എത്തിക്കുമ്പോൾ ഡോക്ടർമാർക്ക് ഒരു നിമിഷം പോലും കളയാനില്ലായിരുന്നു. മെഡിക്കൽ സംഘം ഉണർന്നു പ്രവർത്തിച്ചു. അൽപം കഴിഞ്ഞതോടെ രേണുകമ്മ കണ്ണുകൾ തുറന്നു. പിന്നാലെ ഡോക്ടർമാരുടെ വിശദീകരണവും എത്തി, കടുത്ത 'ഡയബറ്റിക് കോമ' അവസ്ഥയിലായതു കൊണ്ടാണത്രേ ശ്വാസം നിലച്ചതായി തോന്നിയത്.
