മതങ്ങൾക്കൊപ്പം 'മനുഷ്യത്വം' കൂടി ഉൾപ്പെടുത്തി ഒരു കോളേജ്; മാത‍ൃക
മതങ്ങളേക്കാൾ മനുഷ്യത്വത്തിന് പ്രാധാന്യം കൊടുക്കുന്നവർക്ക് ഈ ഓപ്ഷൻ തെരഞ്ഞെടുക്കാവുന്നതാണ്.
കൊൽക്കത്ത: ദൈനംദിന ജീവിതത്തിൽ ചിലപ്പോഴേങ്കിലും വിവിധ ആവശ്യങ്ങൾക്ക് വേണ്ടി അപേക്ഷ ഫോമുകൾ പൂരിപ്പിക്കേണ്ടി വരാറുണ്ട്. ഈ ഫോമുകളിൽ അപേക്ഷകരുടെ മതം രേഖപ്പെടുത്തുന്നതിന് വേണ്ടി പ്രത്യേകം കോളവും ഉണ്ടായിരിക്കും. ഇതിൽ ഹിന്ദു, മുസ്ലീം, ക്രിസ്ത്യൻ തുടങ്ങിയ ഓപ്ഷനുകളും ഉണ്ടാകും. എന്നാൽ വർഷങ്ങളായി തുടർന്ന് വരുന്ന ഈ രീതി മാറ്റിമറിച്ചിരിക്കുകയാണ് കൽക്കട്ടയിലെ ബെഥുൻ കോളേജ്.
കോളേജിലെ അഡ്മിഷൻ ഫോമിലാണ് അധികൃതർ മാറ്റം വരുത്തിയിരിക്കുന്നത്. ഫോമിൽ മറ്റ് മതങ്ങൾക്കൊപ്പം തന്നെ 'മനുഷ്യത്വം'(Humanity) എന്ന പുതിയൊരു ഓപ്ഷനും കൂടി ഉൾപ്പെടുത്തിയാണ് ഇവർ മറ്റുള്ളവർക്ക് മാതൃകയായിരിക്കുന്നത്. മതങ്ങളേക്കാൾ മനുഷ്യത്വത്തിന് പ്രാധാന്യം കൊടുക്കുന്നവർക്ക് ഈ ഓപ്ഷൻ തെരഞ്ഞെടുക്കാവുന്നതാണ്. മെയ് 27 മുതൽ ആരംഭിച്ച ബിരുദാന്തര പ്രവേശനത്തിനുള്ള ഫോമിലാണ് മനുഷ്യത്വം കൂടി കോളേജ് അധികൃതർ ഉൾപ്പെടുത്തിയിരിക്കുന്നത്.
ചില വിദ്യാർത്ഥികൾ അഡ്മിഷൻ ഫോമിൽ തങ്ങളുടെ ജാതി വെളിപ്പെടുത്താൻ വിസമ്മതിക്കുന്നതായി ശ്രദ്ധയിൽപ്പെട്ടു. മനുഷ്യന്റെ ജാതി മനുഷ്യത്വമാണെന്ന ആ കുട്ടികളുടെ കാഴ്ചപ്പാടിനെ ഞങ്ങൾ അഭിനന്ദിക്കുകയാണ്. തുടർന്ന് അഡ്മിഷൻ കമ്മിറ്റിയുടെ ഐകകണ്ഠേനയുള്ള തീരുമാനപ്രകാരം ജാതിയുടെ കോളത്തിൽ മനുഷ്യത്വം എന്ന ഓപ്ഷനും കൂടി ഉൾപ്പെടുത്തുകയായിരുന്നുവെന്ന് കോളേജ് പ്രിസിപ്പാൾ മമത റായ് പറഞ്ഞു.
കോളേജിന്റെ ഈ വ്യത്യസ്തമായ ആശയത്തെ അഭിനന്ദിച്ചുകൊണ്ട് നിരവധി പേരാണ് സമൂഹമാധ്യമങ്ങളിലൂടെ രംഗത്തെത്തുന്നത്. 1879ൽ സ്ഥാപിതമായ ബെഥുൻ കോളേജ് , ഹിന്ദു സ്ത്രീ വിദ്യാലയം എന്നാണ് അറിപ്പെട്ടിരുന്നത്. കൂടാതെ ഏഷ്യയിലെ എൻ എ എ സിന്റെ(നാഷണൽ അസ്സസ്സ്മെന്റ് ആന്റ് അക്രഡിറ്റേഷൻ കൗൺസിൽ) ഗ്രേഡ് എ വിഭാഗത്തിലുള്ള ആദ്യ വനിതാ കോളോജ് കൂടിയാണിത്.
