ആരോപണവിധേയരായ സ്ത്രീയെയും പുരുഷനെയും കേസിൽ കക്ഷികളാക്കാതെ ദൃശ്യങ്ങൾ പുറത്തുവിടാൻ ഹോട്ടലിനെ നിർബന്ധിക്കാൻ കഴിയുമോ എന്നത് സംശയാസ്പദമാണെന്ന് ജഡ്ജി പറഞ്ഞു
ദില്ലി: രണ്ട് സൈനിക ഉദ്യോഗസ്ഥർ ഉൾപ്പെട്ട വിവാഹേതര ബന്ധ കേസിൽ സ്വകാര്യതയ്ക്കുള്ള അവകാശം ഉയർത്തിപ്പിടിച്ച് കോടതി വിധി. ഹോട്ടലിലെ സിസിടിവി ദൃശ്യങ്ങൾ ആവശ്യപ്പെട്ടുള്ള അപേക്ഷ ഡൽഹി കോടതി തള്ളി. ഇന്ത്യൻ സൈന്യത്തിലെമേജറാണ് തന്റെ ഭാര്യക്ക് മറ്റൊരു ഉദ്യോഗസ്ഥനുമായി, (മറ്റൊരു മേജറുമായി) ബന്ധമുണ്ടെന്ന് ആരോപിച്ച് ഹർജി സമർപ്പിച്ചത്. ആരോപണവിധേയരായ സ്ത്രീക്കും പുരുഷനും സ്വകാര്യതയ്ക്ക് അവകാശമുണ്ടെന്നും അവരുടെ ഡാറ്റയും ബുക്കിംഗ് വിശദാംശങ്ങളും മൂന്നാം കക്ഷികളിൽ നിന്ന് മറച്ചുവെക്കണമെന്നും കോടതി നിരീക്ഷിച്ചു. ഹോട്ടലുകൾ അവരുടെ അതിഥികളുടെ രഹസ്യം സംരക്ഷിക്കണമെന്ന് സിവിൽ ജഡ്ജി വൈഭവ് പ്രതാപ് സിംഗ് നിരീക്ഷിച്ചു.
ഭാര്യയുടെയും കാമുകന്റെയും വാദം കേൾക്കാനുള്ള അവകാശത്തെക്കുറിച്ചും ഹർജി ആശങ്ക ഉയർത്തുന്നുണ്ടെന്ന് അദ്ദേഹം പറഞ്ഞു. ആരോപണവിധേയരായ സ്ത്രീയെയും പുരുഷനെയും കേസിൽ കക്ഷികളാക്കാതെ ദൃശ്യങ്ങൾ പുറത്തുവിടാൻ ഹോട്ടലിനെ നിർബന്ധിക്കാൻ കഴിയുമോ എന്നത് സംശയാസ്പദമാണെന്ന് ജഡ്ജി പറഞ്ഞു. അവരുടെ സ്വകാര്യതാ അവകാശങ്ങൾ സംരക്ഷിക്കാൻ അവസരം നൽകാതെ അത്തരം സ്വകാര്യ വിവരങ്ങൾ പുറത്തുവിടുന്നത് സ്വാഭാവിക നീതിക്കും സ്വകാര്യതയ്ക്കുള്ള മൗലികാവകാശത്തിനും എതിരായ ലംഘനമായിരിക്കുമെന്നും കോടതി നിരീക്ഷിച്ചു.
കോടതികൾ സ്വകാര്യ തർക്കങ്ങൾക്കുള്ള അന്വേഷണ സ്ഥാപനങ്ങളോ ആഭ്യന്തര നടപടിക്രമങ്ങളിൽ തെളിവുകൾ ശേഖരിക്കുന്നതിനുള്ള ഏജൻസിയോ അല്ലെന്നും ജഡ്ജി വ്യക്തമാക്കി. പരാതിക്കാരന് 1950-ലെ സൈനിക നിയമപ്രകാരവും നിലവിലുള്ള നിയമപ്രകാരവും പരിഹാരങ്ങൾ ലഭിക്കണമെന്ന് ജഡ്ജി പറഞ്ഞു. ആഭ്യന്തര സംവിധാനങ്ങളെ മറികടക്കാനോ അനുബന്ധമായി നൽകാനോ കോടതിയെ ഉപയോഗിക്കാൻ കഴിയില്ലെന്ന് ചൂണ്ടിക്കാട്ടി.
Related Articles
ഗ്രഹാം ഗ്രീനിന്റെ 'ദി എൻഡ് ഓഫ് ദി അഫയർ' എന്ന നോവലും ജഡ്ജി ഉത്തരവിൽ ഉദ്ധരിച്ചു. വിവാഹത്തെ ഒറ്റിക്കൊടുത്തത് കാമുകനല്ല, മറിച്ച് പ്രതിജ്ഞയെടുത്ത് ലംഘിച്ച ആളാണ്. പുറത്തുള്ളയാൾ ഒരിക്കലും അതിൽ ബന്ധിതനല്ലെന്നും ഉത്തരവിൽ പറയുന്നു. വിവാഹേതര ബന്ധത്തെക്കുറിച്ച് സുപ്രീം കോടതിയുടെ സുപ്രധാന വിധിയെക്കുറിച്ചും ജഡ്ജി ചൂണ്ടിക്കാട്ടി. ഭാരതീയ ന്യായ സംഹിത (ബിഎൻഎസ്) നടപ്പിലാക്കുമ്പോൾ പാർലമെന്റ് പോലും വ്യഭിചാര നിയമം ഇല്ലാതാക്കിയതായി അദ്ദേഹം ഓർമ്മിപ്പിച്ചു.
