സുഹൃത്തിന്റെ ജന്മദിന ആഘോഷങ്ങൾക്കായി ഒത്തുകൂടിയ മൂവർ സംഘമാണ് ഈ അപകടത്തിൽപ്പെട്ടത്. അപകടസമയത്ത് ബിഎംഡബ്ല്യു മണിക്കൂറിൽ ഏകദേശം 250 കിലോമീറ്റർ വേഗതയിലായിരുന്നു
താനെ: 250 കിലോമീറ്റർ വേഗതയിൽ ചീറിപ്പായുന്നതിനിടെ ഡിവൈഡറിൽ ഇടിച്ച് ആഡംബര കാർ അപകടത്തിൽപ്പെട്ടു. രണ്ട് പേർ കൊല്ലപ്പെട്ടു. മൃതദേഹ ഭാഗങ്ങളും എൻജിനും റോഡിൽ ചിതറിയ നിലയിൽ. മഹാരാഷ്ട്രയിലെ താനെ ജില്ലയിലുണ്ടായ വാഹനാപകടത്തിലാണ് യുവതി ഉൾപ്പെടെ രണ്ടുപേർ കൊല്ലപ്പെടുകയും ഒരാൾക്ക് ഗുരുതരമായി പരിക്കേൽക്കുകയും ചെയ്തത്. ബദ്ലാപൂരിന് സമീപം അമിതവേഗതയിലെത്തിയ ബിഎംഡബ്ല്യു ആഡംബര കാർ റോഡ് ഡിവൈഡറിലിടിച്ച് പലതവണ തലകീഴായി മറിഞ്ഞാണ് അപകടമുണ്ടായത്. സുഹൃത്തിന്റെ ജന്മദിന ആഘോഷങ്ങൾക്കായി ഒത്തുകൂടിയ മൂവർ സംഘമാണ് ഈ അപകടത്തിൽപ്പെട്ടത്. അപകടസമയത്ത് ബിഎംഡബ്ല്യു മണിക്കൂറിൽ ഏകദേശം 250 കിലോമീറ്റർ വേഗതയിലായിരുന്നു എന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ഇടിയുടെ ആഘാതത്തിൽ മരിച്ചവരുടെ ശരീരഭാഗങ്ങൾ റോഡിൽ ചിതറിക്കിടക്കുന്ന നിലയിലായിരുന്നു.
ഞായറാഴ്ച പുലർച്ചെയാണ് അപകടമുണ്ടായത്. ഇടിയുടെ ആഘാതത്തിൽ കാർ പൂർണ്ണമായും തകർന്നു. 26 വയസ്സുകാരനായ യോഗേഷ് നേഗി, 24 വയസ്സുകാരിയായ റെബേക്ക ജേക്കബ് എന്നിവരാണ് അപകടത്തിൽ കൊല്ലപ്പെട്ടത്.ഇവരുടെ മൃതദേഹങ്ങൾ പോസ്റ്റ്മോർട്ടം നടപടികൾക്കായി അയച്ചിരിക്കുകയാണ്. കാർ ഓടിച്ചിരുന്ന അംഗദ് ഗുരുതരമായ പരിക്കുകളോടെ ഒരു സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. മുംബൈ-വഡോദര ഹൈവേയിലെ ബദ്ലാപൂരിന് സമീപം നിർമ്മാണത്തിലിരിക്കുന്ന ഒരു റോഡിലാണ് അപകടമുണ്ടായത്. യോഗേഷിന്റെ ജന്മദിനം ആഘോഷിക്കാനായാണ് ഇവർ ഒത്തുചേർന്നത്. പാർട്ടിക്ക് ശേഷം അംഗദിന്റെ കാറിൽ മൂവരും ചേർന്ന് ഒരു ലേറ്റ് നൈറ്റ് ഡ്രൈവിന് പോകാൻ തീരുമാനിക്കുകയായിരുന്നു. അമിതവേഗതയിലെത്തിയ കാർ ഡിവൈഡറിലിടിച്ചതോടെ ഡ്രൈവർക്ക് നിയന്ത്രണം നഷ്ടപ്പെടുകയും കാർ പലതവണ മറിഞ്ഞ് റോഡരികിലേക്ക് വീഴുകയുമായിരുന്നുവെന്ന് പൊലീസ് വിശദമാക്കി
അമിതവേഗതയും റോഡിലെ അഭ്യാസപ്രകടനങ്ങളുമാണ് അപകടത്തിന് കാരണമായതെന്നാണ് പൊലീസിന്റെ പ്രാഥമിക അന്വേഷണത്തിൽ വ്യക്തമാകുന്നത്. പുലർച്ചെ രണ്ട് മണിക്കും മൂന്ന് മണിക്കും ഇടയിൽ ഈ ആഡംബര കാർ ഹൈവേയിലൂടെ അതിവേഗത്തിൽ പായുന്നത് കണ്ടതായി ദൃക്സാക്ഷികൾ വെളിപ്പെടുത്തിയിട്ടുണ്ട്. രണ്ടുതവണ കാർ വളരെ വേഗത്തിൽ കടന്നുപോയെന്നും മൂന്നാമത്തെ തവണ വലിയൊരു ശബ്ദം കേട്ടാണ് തങ്ങൾ ഓടിയെത്തിയതെന്നും ദൃക്സാക്ഷികളിൽ ഒരാൾ പറഞ്ഞു. സംഭവസ്ഥലത്ത് എത്തുമ്പോൾ കാർ പൂർണ്ണമായും തകർന്ന നിലയിലായിരുന്നുവെന്നും യുവതി കാറിൽ നിന്നും വളരെ ദൂരേക്ക് തെറിച്ചുവീണ് മരണപ്പെട്ടതായും ദൃക്സാക്ഷികൾ പ്രതികരിക്കുന്നത്
Related Articles
അപകടസമയത്ത് ഡ്രൈവർ മദ്യപിച്ചിരുന്നതായി ചില വിവരങ്ങൾ പുറത്തുവരുന്നുണ്ടെങ്കിലും പൊലീസിത് ഔദ്യോഗികമായി സ്ഥിരീകരിച്ചിട്ടില്ല. ആശുപത്രിയിൽ ചികിത്സയിൽ കഴിയുന്ന അംഗദിന്റെ മൊഴി രേഖപ്പെടുത്താൻ പോലീസിന് കഴിഞ്ഞിട്ടില്ല. നിലവിൽ ബദ്ലാപൂർ പൊലീസ് സ്റ്റേഷനിൽ അപകടമരണത്തിന് കേസ് രജിസ്റ്റർ ചെയ്തിട്ടുണ്ടെന്നും വിശദമായ അന്വേഷണം പുരോഗമിക്കുകയാണെന്നും പൊലീസ് അറിയിച്ചു. ഫൊറൻസിക് സംഘവും സ്ഥലത്തെത്തി ശാസ്ത്രീയ തെളിവുകൾ ശേഖരിച്ചിട്ടുണ്ട്.
