സൈക്കോവ്-ഡി വാക്സീൻ പ്രതിമാസം ഒരു കോടി ഡോസ് ഉൽപ്പാദിപ്പിക്കാൻ സൈഡസ് കാർഡില
ഇന്ത്യയിൽ അടിയന്തിര ഉപയോഗത്തിന് അനുമതി നേടിയ കൊവിഡ് വാക്സീൻ സൈക്കോവ് - ഡി പ്രതിമാസം ഒരു കോടി ഡോസ് നിർമിക്കാൻ ആലോചിക്കുന്നതായി സൈഡസ് കാഡില.
ദില്ലി: ഇന്ത്യയിൽ അടിയന്തിര ഉപയോഗത്തിന് അനുമതി നേടിയ കൊവിഡ് വാക്സീൻ സൈക്കോവ് - ഡി പ്രതിമാസം ഒരു കോടി ഡോസ് നിർമിക്കാൻ ആലോചിക്കുന്നതായി സൈഡസ് കാഡില. അനുമതി ലഭിച്ചാൽ ഇന്ത്യയിൽ ഉപയോഗിക്കുന്ന അഞ്ചാമത്തെ കൊവിഡ് വാക്സിനായിരിക്കും സോക്കോവ്-ഡി. ഓഗസ്റ്റ് മുതൽ നിർമാണം തുടങ്ങാനാണ് ആലോചിക്കുന്നത്. ഈ വർഷം തന്നെ അഞ്ച് കോടി ഡോസ് വാക്സിനാണ് ലക്ഷ്യമിടുന്നത്.
കൊവിഷീൽഡ്, കൊവാക്സീൻ, സ്പൂട്നിക്, മൊഡേണ എന്നീ വാക്സീനുകൾക്കാണ് നിലവിൽ അനുമതിയുള്ളത്. കഴിഞ്ഞ ദിവസമാണ് രാജ്യത്ത് കൊവിഡിനെതിരായ അടിയന്തര ഉപയോഗത്തിന് സൈകോവ്-ഡി വാക്സീൻ ഡ്രഗ്സ് കൺട്രോളർ ജനറൽ ഓഫ് ഇന്ത്യയോട് അനുമതി തേടിയത്. ലോകത്ത് ആദ്യ പ്ലാസ്മിഡ് ഡിഎൻഎ വാക്സിനാണ് സൈക്കോവ്-ഡി. 66.6 ശതമാനം ഫലപ്രാപ്തിയാണ് വാക്സീൻ നിലവിൽ പറയുന്നത്. അനുമതി ലഭിച്ചാൽ, 45 മുതൽ 60 ദിവസത്തിനുള്ളിൽ വാക്സീൻ ലഭ്യമാക്കാനാകുമെന്നും കാഡില മാനേജിങ് ഡയരക്ടർ ഡോ. ഷർവിൽ പട്ടേൽ അറിയിച്ചു.
ഇന്ത്യയിൽ ഏറ്റവും കൂടുതൽ പേരിൽ ക്ലിനിക്കൽ ട്രയൽ നടത്തിയ സൈകോവ്-ഡി വാക്സീൻ പന്ത്രണ്ട് വയസിൽ കൂടുതൽ പ്രായമുള്ള കുട്ടികൾക്കും നൽകാൻ കഴിയുമെന്നാണ് കമ്പനിയുടെ അവകാശവാദം. ഭാരത് ബയോടെക്കിന്റെ കൊവിഡ് വാക്സീനായ കൊവാക്സീന് ശേഷം രാജ്യത്ത് തദ്ദേശിയമായി വികസിപ്പിക്കുന്ന രണ്ടാമത്തെ വാക്സീനാണ് സൈകോവ്-ഡി. അഹമ്മദബാദ് ആസ്ഥാനമായി പ്രവർത്തിക്കുന്ന മരുന്ന് കമ്പനിയായ സൈഡസ് കാഡിലയാണ് വാക്സീൻ വികസിപ്പിച്ചത്.
