'ഇത് അതുതന്നെ, ദൈവകോപം', തുടരെ തുടരെ ആളുകൾ മരിച്ച് വീണപ്പോൾ അവരങ്ങനെ വിശ്വസിച്ചു, പക്ഷേ സത്യം പുറത്തായി; 8 പേരുടെ കൊലപാതകത്തിന്‍റെ ചുരുളഴിഞ്ഞു

ഛത്തീസ്ഗഡിലെ ബലോഡാ ബസാർ ജില്ലയിലുള്ള ഖർവെ എന്ന ചെറിയ ഗ്രാമത്തിൽ അഞ്ച് മാസത്തിനിടെ നടന്ന 8 മരണങ്ങൾ ആസൂത്രിതമായ കൊലപാതകങ്ങളാണെന്ന് പോലീസ് കണ്ടെത്തി

Image Credit: Social Media

റായ്പൂർ: ഛത്തീസ്ഗഡിലെ ബലോഡാ ബസാർ ജില്ലയിലുള്ള ഖർവെ എന്ന ചെറിയ ഗ്രാമത്തിൽ അഞ്ച് മാസത്തിനിടെ നടന്ന 8 മരണങ്ങൾ ആസൂത്രിതമായ കൊലപാതകങ്ങളാണെന്ന് പോലീസ് കണ്ടെത്തി. കഴിഞ്ഞ ഫെബ്രുവരി മുതൽ മെയ് വരെയുള്ള കാലയളവിലാണ് ഈ മരണങ്ങളെല്ലാം സംഭവിച്ചത്. സംഭവവുമായി ബന്ധപ്പെട്ട് ഗ്രാമത്തിലെ പലചരക്ക് കട ഉടമയായ രാംസഹായ് ജയ്‌സ്വാൾ (46) എന്നയാളെ ജൂൺ 22-ന് പോലീസ് അറസ്റ്റ് ചെയ്തു. നാടൻ മദ്യത്തിൽ വീര്യമേറിയ എലിവിഷം കലർത്തി നൽകിയാണ് രാംസഹായ് ഇവരെ കൊലപ്പെടുത്തിയത്. മദ്യം കഴിച്ച് 15 മിനിറ്റിനുള്ളിൽ തന്നെ ഇരകൾ മരണപ്പെട്ടിരുന്നു. വ്യക്തിപരമായ ചെറിയ തർക്കങ്ങൾ, ഭൂമി സംബന്ധമായ തർക്കങ്ങൾ, പണം കടം കൊടുത്ത് തിരിച്ചുകിട്ടാത്തത്, ആഭിചാരക്രിയകൾ നടത്തുന്നുവെന്ന സംശയം തുടങ്ങിയ നിസ്സാര കാരണങ്ങളുടെ പേരിലുള്ള പ്രതികാരമാണ് കൊലപാതകങ്ങൾക്ക് പിന്നിലെന്ന് പോലീസ് പറയുന്നു. രണ്ട് കേസുകളിൽ ലക്ഷ്യം വെച്ച ആളുകൾക്ക് പകരം മറ്റ് ചിലരാണ് വിഷമദ്യം കഴിച്ച് മരിച്ചത്.

ദൈവകോപമെന്ന് വിശ്വസിച്ച് ഗ്രാമീണർ

തുടർച്ചയായി ആളുകൾ മരിച്ചതോടെ ഗ്രാമീണർ ഇത് ദൈവകോപമാണെന്ന് ഭയന്നിരുന്നു. പല മരണങ്ങളും ഹൃദയാഘാതം മൂലമോ സ്വാഭാവിക മരണങ്ങളോ ആണെന്നാണ് ഡോക്ടർമാരും ബന്ധുക്കളും ആദ്യം കരുതിയിരുന്നത്. ഫെബ്രുവരി 7-ന് ബദ്രി പട്ടേൽ (58) എന്നയാൾ മരിച്ചതായിരുന്നു ആദ്യ സംഭവം. പിന്നീട് ബുഥാലു സാഹു (60), ഛത്തുറാം സാഹു (59), ബുധ്‌റാം ജയ്‌സ്വാൾ (60), വിനോദ് സാഹു (38), ഗജാനൻ മാഞ്ജി (55), ചൈതുറാം സാഹു (59), മഹേത്രു സാഹു (40) എന്നിവരും സമാനമായ രീതിയിൽ മരണപ്പെട്ടു. ഗ്രാമത്തിൽ ദോഷം അകറ്റാനായി പ്രദേശവാസികൾ പൂജകളും നടത്തിയിരുന്നു.

വഴിത്തിരിവായത് ഒരു രക്ഷപ്പെടൽ

മെയ് 14-ന് തികച്ചും ആരോഗ്യവാനായിരുന്ന മഹേത്രു സാഹു മരിച്ചതോടെയാണ് ഗ്രാമീണർക്ക് സംശയം തോന്നിയത്. തുടർന്ന് നടത്തിയ ചർച്ചകൾക്കിടയിലാണ്, കാർത്തിക് കുംഹാർ (23) എന്ന യുവാവ് രാംസഹായ് നൽകിയ മദ്യം കഴിച്ച് നിമിഷങ്ങൾക്കകം ഛർദ്ദിക്കുകയും ബോധരഹിതനാവുകയും ചെയ്ത സംഭവം പുറത്തറിയുന്നത്. അന്ന് 5-6 മണിക്കൂറുകൾക്ക് ശേഷമാണ് കാർത്തിക്കിന് ബോധം തിരിച്ചുകിട്ടിയത്.

മരണപ്പെട്ടവരെല്ലാം രാംസഹായോടൊപ്പം മദ്യം കഴിച്ചിരുന്നവരാണെന്ന കാര്യം ഇതോടെ ഗ്രാമീണർ പരസ്പരം ബന്ധിപ്പിച്ചു. തുടർന്ന് ജൂൺ 6-ന് നാട്ടുകാർ പോലീസിൽ പരാതി നൽകുകയും പോലീസ് അന്വേഷണത്തിൽ ഞെട്ടിക്കുന്ന കൊലപാതക പരമ്പരയുടെ ചുരുളഴിയുകയുമായിരുന്നു. കേസിൽ കൃത്യമായ സാഹചര്യത്തെളിവുകൾ ലഭിച്ചിട്ടുണ്ടെന്ന് പോലീസ് അറിയിച്ചു. ശാസ്ത്രീയ തെളിവുകൾക്കായി മരിച്ചവരിൽ 7 പേരുടെ മൃതദേഹങ്ങൾ പുറത്തെടുത്ത് ഫോറൻസിക് പരിശോധനയ്ക്ക് അയച്ചിരിക്കുകയാണ്.