അമേരിക്കൻ എഐ മോഡലുകളുടെ ഔട്ട്പുട്ടുകൾ ഉപയോഗിച്ച് ചൈന സൈനിക എ.ഐ സംവിധാനങ്ങളെ പരിശീലിപ്പിക്കുന്നതായി റിപ്പോർട്ട്. 'മോഡൽ ഡിസ്റ്റിലേഷൻ' എന്ന സാങ്കേതികവിദ്യ ഉപയോഗിച്ച് യു.എസ് മോഡലുകളുടെ കഴിവുകൾ സ്വന്തമാക്കുന്നുവെന്നാണ് ആരോപണം. ഇത് യു.എസ്-ചൈന എ.ഐ സുരക്ഷാ ചർച്ചകളിൽ പുതിയ തർക്കവിഷയമായി മാറിയിരിക്കുകയാണ്.
ബീജിംഗ്: ഓപ്പൺഎഐ (OpenAI), ആന്ത്രോപിക് (Anthropic) തുടങ്ങിയ അമേരിക്കൻ ആർട്ടിഫിഷ്യൽ ഇന്റലിജൻസ് കമ്പനികളുടെ അത്യാധുനിക മോഡലുകളിൽ നിന്നുള്ള ഔട്ട്പുട്ടുകൾ ഉപയോഗിച്ച് ചൈന സ്വന്തം സൈനിക ആവശ്യങ്ങൾക്കായുള്ള എ.ഐ സംവിധാനങ്ങളെ പരിശീലിപ്പിച്ചതായി റോയിട്ടേഴ്സ് റിപ്പോർട്ട്. 80-ലധികം ചൈനീസ് അക്കാദമിക് പ്രബന്ധങ്ങളും പേറ്റന്റുകളും വിശകലനം ചെയ്താണ് റിപ്പോർട്ട് തയ്യാറാക്കിയിരിക്കുന്നത്.
വാഷിംഗ്ടൺ ചൈനയ്ക്കെതിരെ അഡ്വാൻസ്ഡ് ചിപ്പുകളുടെയും മറ്റ് നിർണായക സാങ്കേതികവിദ്യകളുടെയും കയറ്റുമതിക്ക് കടുത്ത നിയന്ത്രണങ്ങൾ ഏർപ്പെടുത്തിയിട്ടുണ്ടെങ്കിലും, യു.എസ് വികസിപ്പിച്ച എ.ഐ മോഡലുകളെ ആശ്രയിച്ച് ആഭ്യന്തര എ.ഐ സംവിധാനങ്ങൾ വികസിപ്പിക്കാനുള്ള ശ്രമങ്ങളാണ് ചൈനീസ് സൈനിക-സുരക്ഷാ സ്ഥാപനങ്ങൾ നടത്തുന്നതെന്ന് റിപ്പോർട്ട് പറയുന്നു.
'മോഡൽ ഡിസ്റ്റിലേഷൻ' പ്രധാന ആയുധം
"മോഡൽ ഡിസ്റ്റിലേഷൻ" എന്ന സാങ്കേതിക വിദ്യയാണ് ചൈന വ്യാപകമായി ഉപയോഗിക്കുന്നതെന്നാണ് റിപ്പോർട്ടിലെ പ്രധാന കണ്ടെത്തൽ. കൂടുതൽ ശേഷിയുള്ള വലിയ എ.ഐ മോഡലുകളുടെ ഔട്ട്പുട്ടുകൾ ഉപയോഗിച്ച് ചെറിയതും പ്രത്യേക ആവശ്യങ്ങൾക്കായി രൂപകൽപ്പന ചെയ്തതുമായ മോഡലുകളെ പരിശീലിപ്പിക്കുന്ന രീതിയാണിത്. ഇതിലൂടെ ഉയർന്ന കമ്പ്യൂട്ടിങ് ശേഷി ആവശ്യമില്ലാതെ പ്രാദേശികമായി പ്രവർത്തിപ്പിക്കാവുന്ന എ.ഐ സംവിധാനങ്ങൾ വികസിപ്പിക്കാൻ സാധിക്കുന്നു.
Related Articles
വാഷിംഗ്ടൺ ആസ്ഥാനമായ ജെയിംസ്ടൗൺ ഫൗണ്ടേഷൻ ശേഖരിച്ച പഠനങ്ങൾ ഉദ്ധരിച്ചുകൊണ്ട് റോയിട്ടേഴ്സ് പറയുന്നത്, ചൈനീസ് പീപ്പിൾസ് ലിബറേഷൻ ആർമിയുമായി (PLA) ബന്ധപ്പെട്ട ഗവേഷകരും മറ്റ് പ്രതിരോധ സ്ഥാപനങ്ങളും ഈ രീതി വിവിധ പദ്ധതികളിൽ ഉപയോഗിച്ചുവെന്നാണ്.
സൈനിക ഗവേഷണങ്ങളിൽ അമേരിക്കൻ മോഡലുകൾ
PLA യൂണിറ്റ് 96941-ലെ ഗവേഷകർ കഴിഞ്ഞ വർഷം പ്രസിദ്ധീകരിച്ച ഒരു പഠനത്തിൽ, തന്ത്രപ്രധാന സൈനിക സോഫ്റ്റ്വെയർ കോഡുകൾ വിശകലനം ചെയ്യാൻ OpenAIയുടെ GPT-3.5 ഉപയോഗിച്ചതായി വ്യക്തമാക്കുന്നു. രഹസ്യ വിവരങ്ങൾ നേരിട്ട് വിദേശ മോഡലുകളിൽ നൽകുന്നത് സുരക്ഷാ ഭീഷണിയായതിനാൽ, കോഡുകൾ സംഗ്രഹിക്കാൻ GPT-3.5 ഉപയോഗിക്കുകയും പിന്നീട് ആ സംഗ്രഹങ്ങൾ മാത്രം ഉപയോഗിച്ച് ചൈനീസ് സൈനിക നെറ്റ്വർക്കുകളിൽ പ്രവർത്തിക്കുന്ന ആഭ്യന്തര മോഡലിനെ പരിശീലിപ്പിക്കുകയും ചെയ്തുവെന്നാണ് പഠനത്തിൽ പറയുന്നത്.
റോയിട്ടേഴ്സ് പരിശോധിച്ച രേഖകളിൽ ഡ്രോണുകൾ, ആളില്ലാ അന്തർവാഹിനികൾ, നാവിഗേഷൻ സംവിധാനങ്ങൾ, വീഡിയോ വിശകലനം, സോഷ്യൽ മീഡിയ നിരീക്ഷണം, കണ്ടന്റ് മോഡറേഷൻ തുടങ്ങിയ മേഖലകളിലും ഡിസ്റ്റിലേഷൻ ഉപയോഗിച്ചതായി പരാമർശമുണ്ട്.
അമേരിക്കയുടെ ആശങ്ക
അമേരിക്കൻ എ.ഐ മോഡലുകളിൽ നിന്നുള്ള ശേഷികളും യുക്തിപരമായ ചിന്താരീതികളും അനുമതിയില്ലാതെ ചോർത്തിയെടുക്കാൻ ചില ചൈനീസ് സ്ഥാപനങ്ങൾ ഡിസ്റ്റിലേഷൻ ഉപയോഗിക്കുന്നുവെന്നാണ് യു.എസ് ഉദ്യോഗസ്ഥരുടെ ആരോപണം. ഇത് കയറ്റുമതി നിയന്ത്രണങ്ങളും ബൗദ്ധിക സ്വത്തവകാശ നിയമങ്ങളും ലംഘിക്കുന്നതാണെന്നും അവർ ചൂണ്ടിക്കാട്ടുന്നു.
ജെയിംസ്ടൗൺ ഫൗണ്ടേഷനിലെ ഗവേഷകനായ സണ്ണി ചിയാങിന്റെ അഭിപ്രായത്തിൽ, പാശ്ചാത്യ എ.ഐ മോഡലുകളുടെ 'റീസണിംഗ്' കഴിവുകൾ ചെറിയ ആഭ്യന്തര മോഡലുകളിലേക്ക് പകർത്താൻ ചൈനീസ് സൈനിക ഗവേഷകർ ശ്രമിക്കുന്നുവെന്നാണ് നിരവധി പ്രബന്ധങ്ങൾ സൂചിപ്പിക്കുന്നത്.
ചൈനയുടെ വിശദീകരണം
എന്നാൽ ആരോപണങ്ങൾ ചൈന നിഷേധിച്ചു. എ.ഐ രംഗത്ത് അമേരിക്ക ആധിപത്യം സ്ഥാപിക്കാൻ ശ്രമിക്കുകയാണെന്നും, ഡിസ്റ്റിലേഷൻ വ്യവസായത്തിൽ സാധാരണ ഉപയോഗിക്കുന്ന സാങ്കേതിക വിദ്യയാണെന്നും ബീജിംഗ് വാദിക്കുന്നു.
തങ്ങളുടെ എ.ഐ പുരോഗതി വിദേശ മോഡലുകളെ ആശ്രയിച്ചാണെന്ന ആരോപണവും ചൈനീസ് കമ്പനികൾ തള്ളി. തങ്ങളുടെ 'കിമി K3' മോഡൽ ഡിസ്റ്റിലേഷൻ വഴിയല്ല വികസിപ്പിച്ചതെന്നും, തദ്ദേശീയ ഗവേഷണ-നൂതനാശയങ്ങളാണ് വിജയത്തിന് പിന്നിലെന്നും ചൈനീസ് സ്റ്റാർട്ടപ്പായ മൂൺഷോട്ട് അറിയിച്ചു.
സുരക്ഷാ ചർച്ചകളിൽ പുതിയ വിവാദം
എ.ഐ സുരക്ഷയും ഭരണ സംവിധാനവും സംബന്ധിച്ച യു.എസ്-ചൈന ചർച്ചകൾക്ക് മുന്നോടിയായി ഈ വിഷയം പ്രധാന തർക്കവിഷയമായി മാറിയിരിക്കുകയാണ്. ഡിസ്റ്റിലേഷൻ വഴി വിദേശ എ.ഐ മോഡലുകളുടെ ശേഷികൾ സ്വന്തമാക്കാനുള്ള ശ്രമം ഭാവിയിലെ സൈനിക സാങ്കേതിക മത്സരത്തിൽ നിർണായക സ്വാധീനം ചെലുത്തുമെന്നാണ് വിദഗ്ധരുടെ വിലയിരുത്തൽ. അതേസമയം, വൈറ്റ് ഹൗസ്, പെന്റഗൺ, ചൈനീസ് വിദേശകാര്യ മന്ത്രാലയം, പി.എൽ.എ, ഓപ്പൺഎഐ എന്നിവ ഈ റിപ്പോർട്ടുകളോട് ഔദ്യോഗികമായി പ്രതികരിച്ചിട്ടില്ല.
