ഈദുൽ ഫിത്തർ പ്രമാണിച്ച് ദുബായിലെ സർക്കാർ ജീവനക്കാർക്ക് മാർച്ച് മാസത്തെ ശമ്പളം നേരത്തെ നൽകാൻ ഉത്തരവിട്ടു. മാർച്ച് 17-ന് ശമ്പളം അക്കൗണ്ടുകളിൽ എത്തും. പ്രവാസി മലയാളികൾ ഉൾപ്പെടെയുള്ള ജീവനക്കാർക്ക് ഈദ് ആഘോഷങ്ങൾക്ക് മുൻകൂട്ടി തയ്യാറെടുക്കാൻ സാധിക്കും.
ദുബായ്: പശ്ചിമേഷ്യയിൽ സംഘർഷം ശക്തമായിരിക്കെ ഈദ് ആഘോഷം പൊടിപൊടിക്കാനുള്ള ഒരുക്കത്തിൽ ദുബായ്. വരാനിരിക്കുന്ന ഈദുൽ ഫിത്തർ ആഘോഷങ്ങൾ പ്രമാണിച്ച് ദുബായിലെ സർക്കാർ ജീവനക്കാർക്ക് ഈ മാസത്തെ ശമ്പളം നേരത്തെ വിതരണം ചെയ്യാൻ ദുബായ് ഭരണാധികാരി ഉത്തരവിട്ടു. സാധാരണ ലഭിക്കുന്ന തീയതിക്ക് മുൻപായി മാർച്ച് 17-ന് തന്നെ ശമ്പളം ജീവനക്കാരുടെ അക്കൗണ്ടുകളിൽ എത്തും. ഈദ് ആഘോഷങ്ങൾക്കായി കുടുംബങ്ങൾക്കും ജീവനക്കാർക്കും മുൻകൂട്ടി തയ്യാറെടുപ്പുകൾ നടത്തുന്നതിനും സാമ്പത്തികമായ സൗകര്യം ഒരുക്കുന്നതിനുമാണ് ഈ തീരുമാനം. ദുബായ് ഗവൺമെന്റിന് കീഴിലുള്ള വിവിധ വകുപ്പുകളിലെയും സ്ഥാപനങ്ങളിലെയും മുഴുവൻ ജീവനക്കാർക്കും ഈ ആനുകൂല്യം ലഭിക്കും. ഭരണാധികാരികളുടെ ഈ തീരുമാനം പ്രവാസി മലയാളികൾ ഉൾപ്പെടെയുള്ള ആയിരക്കണക്കിന് ജീവനക്കാർക്ക് വലിയ ആശ്വാസമാകും.
