പ്രധാനമന്ത്രി കെയർ സ്റ്റാർമറുടെ ലേബർ ഗവൺമെന്റിന്റെ കീഴിലുള്ള ബ്രിട്ടീഷ് അധികാരികൾ യുണൈറ്റഡ് കിംഗ്ഡത്തിലേക്കുള്ള കുടിയേറ്റം കുറയ്ക്കാൻ ശ്രമിക്കുന്നതിനിടയിലാണ് ഈ കണക്കുകൾ പുറത്തുവരുന്നത്.
ലണ്ടൻ: ബ്രിട്ടനിൽ പൗരത്വത്തിനപേക്ഷിക്കുന്ന അമേരിക്കയിൽ നിന്നുള്ളവരുടെ എണ്ണത്തിൽ വൻ വർധനവെന്ന് റിപ്പോർട്ട്. മാർച്ചിന് മുമ്പുള്ള 12 മാസത്തിനിടെ, 6,618 യുഎസ് പൗരന്മാർ ബ്രിട്ടീഷ് പൗരന്മാരാകാനോ അല്ലെങ്കിൽ അനിശ്ചിതമായി താമസിക്കാനും ജോലി ചെയ്യാനും അപേക്ഷിച്ചിട്ടുണ്ടെന്ന് യുകെ ഹോം ഓഫീസ് പുറത്തുവിട്ട കണക്കുകൾ വ്യക്തമാക്കുന്നു. 2004ന് ശേഷമുള്ള ഏറ്റവും ഉയർന്ന സംഖ്യയാണിതെന്ന് ആഭ്യന്തര ഓഫീസ് അറിയിച്ചു. യുഎസ് പ്രസിഡന്റ് ഡൊണാൾഡ് ട്രംപ് രണ്ടാം തവണ അധികാരമേറ്റ ജനുവരി മുതൽ മാർച്ച് വരെയുള്ള കാലയളവിൽ 1,900-ലധികം അപേക്ഷകൾ ലഭിച്ചതായി ഡാറ്റ വ്യക്തമാക്കുന്നു. 2025 ന്റെ തുടക്കത്തിൽ അപേക്ഷകളുടെ എണ്ണത്തിലുണ്ടായ കുതിച്ചുചാട്ടം, ഇതുവരെയുള്ള ഏതൊരു പാദത്തിലെയും ഏറ്റവും ഉയർന്ന എണ്ണമാണെന്ന് ദി ഗാർഡിയൻ റിപ്പോർട്ട് ചെയ്തു .
പ്രധാനമന്ത്രി കെയർ സ്റ്റാർമറുടെ ലേബർ ഗവൺമെന്റിന്റെ കീഴിലുള്ള ബ്രിട്ടീഷ് അധികാരികൾ യുണൈറ്റഡ് കിംഗ്ഡത്തിലേക്കുള്ള കുടിയേറ്റം കുറയ്ക്കാൻ ശ്രമിക്കുന്നതിനിടയിലാണ് ഈ കണക്കുകൾ പുറത്തുവരുന്നത്. അടുത്തിടെ, സ്റ്റാർമർ അതിർത്തികളുടെ നിയന്ത്രണം തിരികെ എടുക്കുമെന്ന് പ്രഖ്യാപിച്ചിരുന്നു. അനിയന്ത്രിതമായ കുടിയേറ്റം, ബ്രിട്ടനെ ഒത്തൊരുമിച്ച് മുന്നോട്ട് പോകുന്ന ഒരു രാഷ്ട്രമായി മാറുന്നതിനു പകരം, അപരിചിതരുടെ ഒരു ദ്വീപായി മാറാൻ കാരണമാകുമെന്ന് അദ്ദേഹം മുന്നറിയിപ്പ് നൽകി.
ആളുകൾ നൽകിയ സംഭാവനകൾ കണക്കിലെടുത്ത് കൂടുതൽ വേഗത്തിൽ യോഗ്യത നേടുന്നതിനുള്ള വ്യവസ്ഥകൾ ഉണ്ടാകുമെന്ന് ആഭ്യന്തര സെക്രട്ടറി യെവെറ്റ് കൂപ്പർ ബ്രിട്ടീഷ് പാർലമെന്റിൽ പറഞ്ഞിരുന്നു. "ഇംഗ്ലീഷ് സംസാരിക്കാനുള്ള കഴിവ് എല്ലാവരുടെയും സംഭാവന ചെയ്യാനും സംയോജിപ്പിക്കാനുമുള്ള അവിഭാജ്യ ഘടകമാണെന്നതിനാൽ പുതിയ ഭാഷാ നയം അവതരിപ്പിക്കുമെന്നും കൂപ്പർ പറഞ്ഞു. യുകെയിലേക്കുള്ള യുഎസ് അപേക്ഷകളിലെ വർദ്ധനവ് രണ്ട് രാജ്യങ്ങളിലെയും രാഷ്ട്രീയ സാഹചര്യങ്ങളെ പ്രതിഫലിപ്പിക്കണമെന്നില്ല. കഴിഞ്ഞ വർഷം യുഎസ് പൗരന്മാരിൽ നിന്നുള്ള 5,521 സെറ്റിൽമെന്റ് അപേക്ഷകളിൽ ഭൂരിഭാഗവും കുടുംബ ബന്ധങ്ങൾ വഴി യോഗ്യരായ ആളുകളിൽ നിന്നുള്ളതായിരുന്നുവെന്നും കണക്കുകൾ പറയുന്നു.
