പൊതുപരിപാടിക്കിടെ യുവതികളെ പരസ്യമായി ചുംബിച്ച് ഫിലിപ്പൈൻസ് പ്രസിഡന്റ്
സ്വവര്ഗ്ഗാനുരാഗി ആകാതിരിക്കാൻ സുന്ദരികളായ യുവതികൾ തന്നെ സഹായിക്കുന്നുവെന്നായിരുന്നു യുവതികളെ ചുംബിക്കുന്നതിനിടെ റോഡ്രിഗോയുടെ പരാമർശം.
ടോക്കിയോ: പൊതുപരിപാടിക്കിടെ യുവതികളെ പരസ്യമായി ചുംബിച്ച് ഫിലിപ്പൈൻസ് പ്രസിഡന്റ് റോഡ്രിഗോ ഡ്യുത്തേർത്ത്. ജപ്പാനിലെ ടോക്കിയോയിൽ വച്ച് നടന്ന പരിപാടിയിൽ ഫിലിപ്പൻ സമൂഹത്തെ അഭിസംബോധന ചെയ്ത് സംസാരിച്ച് കൊണ്ടിരിക്കെയാണ് സദസ്സിലുണ്ടായിരുന്ന അഞ്ച് യുവതികളെ സ്റ്റേജിലേക്ക് വിളിച്ച് വരുത്തി അദ്ദേഹം ചുംബിച്ചത്.
സ്വവര്ഗ്ഗാനുരാഗി ആകാതിരിക്കാൻ സുന്ദരികളായ യുവതികൾ തന്നെ സഹായിക്കുന്നുവെന്നായിരുന്നു യുവതികളെ ചുംബിക്കുന്നതിനിടെ റോഡ്രിഗോയുടെ പരാമർശം. ഫിലിപ്പൈൻസ് സെനറ്റർ അന്റോണിയോ ത്രില്ലാൻസിനെ വിമർശിച്ചായിരുന്നു റോഡ്രിഗോയുടെ പരാമർശം. ദീർഘക്കാലമായി ഒപ്പമുള്ള തന്റെ പങ്കാളിക്ക് മുന്നിൽവച്ചാണ് റോഡ്രിഗോ പരസ്യമായി ചുംബനം നടത്തിയത്.
സ്റ്റേജിലേക്ക് വിളിച്ച് വരുത്തിയ ഒന്നാമത്തെ യുവതി റോഡ്രിഗോയുടെ ചുംബനം ഏറ്റുവാങ്ങാൻ മടിച്ചിരുന്നതായി സിഎൻഎൻ റിപ്പോർട്ട് ചെയ്യുന്നു. ബാക്കിയുള്ളവർ റോഡ്രിഗോയുടെ ചുംബനം സന്തോഷത്തോടെ സ്വീകരിക്കുകയും അദ്ദേഹത്തിനൊപ്പം ഫോട്ടോ എടുക്കുകയും ചെയ്തു. 2018-ൽ സിയോളിൽവച്ച് വിവാഹിതയായ യുവതിയെ പരസ്യമായി ചുംബിച്ചതിനെ തുടർന്ന് രൂക്ഷവിമർശനമാണ് റോഡ്രിഗോയ്ക്കെതിരെ ഉയർന്നത്.