ഗ്രാമി അവാർഡ് ജേതാവും ഗായകനുമായ ജോ ഡിഫി കൊവിഡ് 19 ബാധ മൂലം മരിച്ചു
ഈ മഹാമാരിയുടെ സമയത്ത് ജാഗ്രതയുള്ളവരും ശ്രദ്ധാലുക്കളുമായി ഇരിക്കാൻ പൊതുജനങ്ങളെയും എന്റെ എല്ലാ ആരാധകരെയും ഓർമ്മിപ്പിക്കാൻ ആഗ്രഹിക്കുന്നു." ഡിഫി ഫേസ്ബുക്ക് പേജിൽ കുറിച്ച വാക്കുകൾ.
വാഷിംഗ്ടൺ: ഗ്രാമി അവാർഡ് ജേതാവും പ്രസിദ്ധ ഗായകനുമായ ജോ ഡിഫി കൊറോണ വൈറസ് ബാധയെ തുടർന്ന് അന്തരിച്ചു. 61 വയസ്സായിരുന്നു. 1990 കളിലെ നിരവധി ഹിറ്റ് ഗാനങ്ങൾ ഇദ്ദേഹത്തിന്റേതായിട്ടുണ്ട്. കൊറോണ വൈറസ് ബാധ മൂലമുണ്ടായ ആരോഗ്യപ്രശ്നങ്ങളാണ് മരണത്തിന് കാരണം എന്ന് ഡിഫിയുടെ ഫേസ്ബുക്ക് പേജിൽ വ്യക്തമാക്കിയിട്ടുണ്ട്. രണ്ട് ദിവസം മുമ്പാണ് കൊവിഡ് 19 സ്ഥിരീകരിച്ചെന്നും പരിശോധനയ്ക്ക് വിധേയനാകുന്നു എന്നും ഡിഫി അറിയിച്ചത്.
“ഞാനും എന്റെ കുടുംബവും ഇപ്പോൾ സ്വകാര്യത ആഗ്രഹിക്കുന്നു. ഈ മഹാമാരിയുടെ സമയത്ത് ജാഗ്രതയുള്ളവരും ശ്രദ്ധാലുക്കളുമായി ഇരിക്കാൻ പൊതുജനങ്ങളെയും എന്റെ എല്ലാ ആരാധകരെയും ഓർമ്മിപ്പിക്കാൻ ആഗ്രഹിക്കുന്നു." ഡിഫി ഫേസ്ബുക്ക് പേജിൽ കുറിച്ച വാക്കുകൾ. ഒക്ലഹോമ സ്വദേശിയായ ഡിഫി 1990 കളിൽ നിരവധി ഹിറ്റ് ഗാനങ്ങൾ ആരാധകർക്കായി നൽകിയിരുന്നു. പിക്കപ്പ് മാൻ, പ്രോപ് മി അപ്പ് ബിസൈഡ് ദി ജ്യൂക്ക്ബോക്സ് (ഞാൻ മരിക്കുകയാണെങ്കിൽ), ജോൺ ഡിയർ ഗ്രീൻ എന്നിവ അദ്ദേഹത്തിന്റെ നിരവധി ഹിറ്റ് ഗാനങ്ങൾ ചിലതാണ്.
അദ്ദേഹത്തിന്റെ ആദ്യ ആൽബം "തൗസന്റ് വിൻഡിംഗ് റോഡ്സ്" 1990 ൽ പുറത്തിറങ്ങി. ഡിഫിയുടെ ഏറ്റവും ഹിറ്റ് ഗാനമായ ഹോം ആൽബത്തിലാണുള്ളത്. അമേരിക്കൻ ഐക്യനാടുകളിൽ 137,000 ആളുകൾ കൊറോണ വൈറസ് ബാധിച്ചതായി റിപ്പോർട്ടുണ്ട്. 2,400 ൽ അധികം ആളുകൾ മരിച്ചു.