സുസ്ഥിര നവീകരണവും വികസനവും: അമൃത വിശ്വ വിദ്യാപീഠത്തിന് യുനെസ്കോ ചെയർ അംഗീകാരം
2020ലെ എൻ.ഐ.ആർ.എഫ് ഇന്ത്യ റാങ്കിംഗിൽ രാജ്യത്തെ മികച്ച സർവ്വകലാശാലകളിൽ നാലാം സ്ഥാനം നേടിയ അമൃത വിശ്വ വിദ്യാപീഠം നാലുവർഷം അഭിമാനകരമായ ചെയർ പദവി വഹിക്കും
രാജ്യത്തെ സുസ്ഥിര വികസനത്തിന് ഉത്തേജകമായി, “സുസ്ഥിര നവീകരണത്തിനും വികസനത്തിനുമുള്ള അനുഭവപരിചയ പഠനത്തിന്” അമൃത വിശ്വ വിദ്യാപീഠത്തിന് യുനെസ്കോ ചെയർ പദവി നൽകി. പരീക്ഷണാത്മക പഠനത്തെ അടിസ്ഥാനമാക്കി ഒരു പാഠ്യപദ്ധതി രൂപകൽപ്പന ചെയ്യുന്നതിലൂടെ സുസ്ഥിര സമൂഹം കെട്ടിപ്പടുക്കുന്നതിന് സമഗ്രമായ ഒരു ചട്ടക്കൂട് വികസിപ്പിക്കും. ദുർബലരും ഗ്രാമീണ സമൂഹങ്ങളും തമ്മിലുള്ള സുസ്ഥിര പരിഹാരങ്ങൾ നടപ്പിലാക്കുന്നതിന് ആവശ്യമായ അറിവ്, കഴിവുകൾ, മനോഭാവങ്ങൾ, മൂല്യങ്ങൾ എന്നിവ നേടാൻ ഈ പാഠ്യപദ്ധതി അക്കാദമിക് സമൂഹത്തെ പ്രാപ്തമാക്കും.
സർവ്വകലാശാലയിലെ ഇന്റർനാഷണൽ പ്രോഗ്രാമുകളുടെ ഡീനും, സെന്റർ ഫോർ വയർലെസ് നെറ്റ്‌വർക്ക്സ് & ആപ്ലിക്കേഷൻസ് ഡയറക്ടറുമായ ഡോ. മനീഷ സുധീറിന്റെ നേതൃത്വത്തിൽ അടുത്ത നാല് വർഷത്തേക്ക് അമൃത വിശ്വ വിദ്യാപീഠം ചെയർ പദവി വഹിക്കും.
ലിംഗസമത്വവും സ്ത്രീ ശാക്തീകരണവും എന്ന പഠനത്തിന് രാജ്യത്ത് ആദ്യമായി യുനെസ്കോ ചെയർ പദവി അമൃതയ്ക്ക് ലഭിച്ചിരുന്നു. രണ്ടാമത്തെ യുനെസ്കോ ചെയർ angeekaramanu ഇപ്പോൾ ലഭിച്ചതെന്നും ഈ നേട്ടം ഞങ്ങൾക്ക് അത്യധികം അഭിമാനാർഹമാണെന്നും ഡോ. മനീഷ സുധീർ പറഞ്ഞു.
"വളരെയധികം പ്രശംസ നേടിയ പരീക്ഷണാത്മക പഠന പരിപാടി, ലീവ്-ഇൻ-ലാബ്സിന്റെ ആശയം ഞങ്ങളുടെ ചാൻസലർ ശ്രീ മാതാ അമൃതാനന്ദമയി ദേവിയുടേതാണ്. അമൃതയെക്കുറിച്ചുള്ള കാഴ്ചപ്പാടിൽ എല്ലായ്പ്പോഴും അനുകമ്പയുള്ള ഗവേഷണവും സുസ്ഥിര വികസനവും ഉൾപ്പെടുന്നു. വർഷങ്ങളായി ഇരുപത്തൊന്നു സംസ്ഥാനങ്ങളിൽ ഗ്രാമീണ സമൂഹങ്ങളുടെ സുസ്ഥിര വികസനത്തിന് ലീവ് ഇൻ ലാബ്സ് പ്രവർത്തിക്കുന്നു. ഇതാണ് ഞങ്ങളെ യുനെസ്കോ ചെയറിന് അർഹരാക്കിയത്. ലോകമെമ്പാടുമുള്ള മറ്റ് യുനെസ്കോ ചെയർമാരുമായും സർവകലാശാലകളുമായും സഹകരിച്ച് ഞങ്ങളുടെ പരീക്ഷണാത്മക പഠന ആശയം ലോകമെമ്പാടും എത്തിക്കാൻ ഇതുവഴി സാധിക്കും. ഒറ്റപ്പെട്ട സമൂഹങ്ങളിലെ അംഗങ്ങൾ നേരിടുന്ന വെല്ലുവിളികളെക്കുറിച്ച് മനസ്സിലാക്കുന്നതിനും അവരുമായി സഹകരിച്ച് സുസ്ഥിരമായ പരിഹാരങ്ങൾ രൂപകൽപ്പന ചെയ്യുന്നതിനും ഒരു പരീക്ഷണാത്മക പഠന ചട്ടക്കൂട് ഈ ചെയറിലൂടെ അമൃത വികസിപ്പിക്കും"-ഡോ. മനീഷ സുധീർ കൂട്ടിച്ചേർത്തു.
യുനെസ്കോ ചെയർ എന്ന നിലയിൽ, തങ്ങളുടെ വിദ്യാഭ്യാസ, ഗവേഷണ ശേഷി മെച്ചപ്പെടുത്തുന്നതിനായി അറിവും വൈദഗ്ധ്യവും പങ്കിടുന്ന 700 ലധികം വിദ്യാഭ്യാസ സ്ഥാപനങ്ങളുടെ ഭാഗമായി അമൃത സർവ്വകലാശാല മാറും. പി‌ജി അദ്ധ്യാപന പരിപാടികൾ (ജോയിന്റ് പിഎച്ച്ഡി, ഡബിൾ പിഎച്ച്ഡി പ്രോഗ്രാമുകളും ഡ്യുവൽ മാസ്റ്റേഴ്സ് പ്രോഗ്രാമുകളും ഉൾപ്പെടെ), ഹ്രസ്വകാല സർട്ടിഫിക്കറ്റ് കോഴ്സുകൾ, ഗവേഷണം (വിദ്യാർത്ഥികൾക്കും അധ്യാപകർക്കുമുള്ള സീഡ്-ഗ്രാന്റ് പ്രോഗ്രാം ഉൾപ്പെടെ) കോൺഫറൻസുകൾ, സ്‌കോളർഷിപ്പുകൾ, സുസ്ഥിര വികസനത്തിനുള്ള പരിഹാരങ്ങളുടെ പ്രായോഗികത പരിശോധന എന്നിവയൊക്കെയാണ് അമൃത ചെയറായി നയിക്കുക.
ഹ്രസ്വകാല പ്രോഗ്രാമായി ബിരുദ, ബിരുദാനന്തരബിരുദ വിദ്യാർത്ഥികൾ ഏറ്റെടുക്കുന്ന ലീവ്-ഇൻ-ലാബ്സ് വിപുലീകരിക്കുന്നതിന്റെ ഭാഗമായി അമൃത വിശ്വ വിദ്യാപീഠം ഇ4ലൈഫിന്റെ ധനസഹായത്തോടെ 100 ഇന്റർനാഷണൽ പിഎച്ച്ഡി ഫെലോഷിപ്പുകൾ പ്രഖ്യാപിച്ചു. ഇന്ത്യയിലുടനീളം സർവകലാശാല സ്വീകരിച്ച നൂറിലധികം ഗ്രാമങ്ങളുടെ സുസ്ഥിര വികസനവുമായി ബന്ധപ്പെട്ട പ്രവർത്തനങ്ങൾ വേഗത്തിലക്കുകയാണ് ലക്ഷ്യം. അമൃത 100 അന്തർ‌ദ്ദേശീയ, ഇന്ത്യൻ വിദ്യാർത്ഥികൾക്ക് ധനസഹായം നൽകുകയും അവരെ സുസ്ഥിര വികസനത്തിന് പിഎച്ച്ഡി ബിരുദം നേടാൻ സഹായിക്കുകയും ചെയ്യും. 45 അന്താരാഷ്ട്ര വിദ്യാർത്ഥികൾ ഉൾപ്പെടെ 60 പിഎച്ച്ഡി വിദ്യാർത്ഥികളുള്ള ആദ്യ ബാച്ചിനെ ഉടൻ സ്വീകരിക്കാൻ സർവ്വകലാശാല ഒരുങ്ങിക്കഴിഞ്ഞു.
"അടിസ്ഥാന ആവശ്യങ്ങളായ ഊർജ്ജം, ജലം, വിദ്യാഭ്യാസം, കാലാവസ്ഥാ വ്യതിയാനം എന്നിവയുടെ ലഭ്യതയില്ലായ്മ, ദുരന്ത ഘട്ടങ്ങളിൽ പ്രതിരോധശേഷിയില്ലായ്മ തുടങ്ങിയ കാരണങ്ങൾ ആധുനിക വികസനത്തിന് വെല്ലുവിളികൾ ഉയർതുന്നുണ്ട്. ശാസ്ത്ര സാങ്കേതിക രംഗത്ത് പുരോഗതി ഉണ്ടായിട്ടും, ലോകമെമ്പാടുമുള്ള ഭൂരിഭാഗം ജനങ്ങൾക്കും ലളിതവും അടിസ്ഥാനവുമായ ആവശ്യങ്ങൾ നിറവേറ്റപ്പെടുന്നില്ല. ഉന്നതതല ഗവേഷണ പ്രവർത്തനങ്ങളുടെ സംഭാവനകൾ സമൂഹത്തിലെ ദുർബല വിഭാഗങ്ങളിൽപ്പെട്ടവരെ എങ്ങനെ മാറ്റുന്നുവെന്ന് ചിന്തിക്കേണ്ട സമയമാണിത്”- ഡോ. മനീഷ സുധീർ പറഞ്ഞു.
ഇന്ത്യയിലെ ഗ്രാമീണ സമൂഹങ്ങൾ നേരിടുന്ന ബുദ്ധിമുട്ടുകൾ വിദ്യാർത്ഥികളെ തുറന്നുകാട്ടുന്നതിനായാണ് 2013ൽ ചാൻസലർ ശ്രീ മാതാ അമൃതാനന്ദമയി ദേവിയുടെ മാർഗനിർദേശപ്രകാരം അമൃത ലീവ്-ഇൻ-ലാബ്സ് ആരംഭിച്ചത്. അത്തരം സമൂഹങ്ങളിലേക്ക് ഒരു നിശ്ചിത സമയത്തേക്ക്‌ വിദ്യാർത്ഥികളെ കൊണ്ടുപോകുകയാണെങ്കിൽ, ഗ്രാമീണരുടെ പ്രശ്‌നങ്ങൾ നന്നായി മനസിലാക്കുന്നതിനും സുസ്ഥിര പരിഹാരങ്ങൾ നവീകരിക്കുന്നതിനായി അവരുമായി പ്രവർ‌ത്തിക്കുന്നതിനും അവരെ പ്രചോദിപ്പിക്കും. മാതാ അമൃതാനന്ദമയി മഠവുമായി സഹകരിച്ച് ഇന്ത്യയിലുടനീളം 101 ഗ്രാമങ്ങളുമായി ലീവ്-ഇൻ-ലാബ്സ് പ്രവർത്തിക്കുന്നു. ഇതിൽ രണ്ടായിരത്തിലധികം ആളുകൾക്ക് പ്രയോജനം ലഭിക്കുന്ന 150ലധികം പ്രോജക്ടുകൾ നടപ്പാക്കിയിട്ടുണ്ട്. നാല്പതിലധികം അന്താരാഷ്ട്ര പങ്കാളിത്തമുള്ള സർവകലാശാലകളിൽ നിന്നും നാനൂറോളം അന്താരാഷ്ട്ര വിദ്യാർത്ഥികൾ ഇതുവരെ ഈ പരിപാടിയിൽ പങ്കെടുത്തു. 2020 എൻ.ഐ.ആർ.എഫ് ഇന്ത്യ റാങ്കിംഗ് പ്രകാരം രാജ്യത്തെ നാലാമത്തെ മികച്ച സർവ്വകലാശാലയാണ് അമൃത വിശ്വ വിദ്യാപീഠം.
