മാസപ്പടിയിൽ ബിജെപി നേതാവ് ഷോൺ ജോർജ് പുറത്തുവിട്ട ഡയറിയിലെ പേരുകൾ രാഷ്ട്രീയ ആയുധമാക്കാൻ മടിച്ച് ബിജെപി. ഷോണിനെ പരസ്യമായി തളളാതെ പിണറായിക്കെതിരായ ഇഡി കത്തിൽ ആരോപണം കടുപ്പിക്കാനാണ് തീരുമാനം
തിരുവനന്തപുരം: മാസപ്പടിയിൽ ബിജെപി നേതാവ് ഷോൺ ജോർജ് പുറത്തുവിട്ട ഡയറിയിലെ പേരുകൾ രാഷ്ട്രീയ ആയുധമാക്കാൻ മടിച്ച് ബിജെപി. ഷോണിനെ പരസ്യമായി തളളാതെ പിണറായിക്കെതിരായ ഇഡി കത്തിൽ ആരോപണം കടുപ്പിക്കാനാണ് തീരുമാനം. ഷോണിൻ്റെ വെളിപ്പെടുത്തലിന് പിന്നാലെ ഡയറിയിലെ ബിജെപി നേതാക്കളുടെ പേരും പുറത്തുവന്നത് പാർട്ടിയെ വെട്ടിലാക്കിയിരുന്നു. മുഖ്യമന്ത്രിയുടെയും കോൺഗ്രസ് നേതാക്കളുടെയും, പിണറായിയെ കൂടാതെ മറ്റ് സിപിഎം നേതാക്കളുടെയും പേര് പുറത്തുവിട്ടായിരുന്നു സംസ്ഥാന വൈസ് പ്രസിഡൻ്റ് ഷോൺ ജോർജ് നടപടി ആവശ്യപ്പെട്ടത്. എന്നാൽ മുരളീധരൻ ബിജെപി എന്ന പേര് കൂടി വന്നതോടെ തനിക്കെതിരെ ബോധപൂർവമായ നീക്കമുണ്ടായെന്ന അമർഷം വി മുരളീധരൻ പങ്കുവച്ചു. ഷോണിൻ്റെ നീക്കം ശരിയായില്ലെന്ന അഭിപ്രായം മുതിർന്ന നേതാക്കളും പങ്കുവച്ചതോടെ സംസ്ഥാന അധ്യക്ഷൻ രാജീവ് ചന്ദ്രശേഖർ മുരളീധരനെ പിന്തുണച്ച് രംഗത്തുവന്നിരുന്നു. പാർട്ടിയിൽ ഒരു വിവാദവുമില്ലെന്ന് രാജീവ് ചന്ദ്രശേഖർ ഇന്നും പ്രതികരിച്ചു.
