സിപിഎം മലപ്പുറം ജില്ലാ കമ്മിറ്റി പുനസംഘടിപ്പിക്കുകയും പുതിയ അംഗങ്ങളെ ഉൾപ്പെടുത്തുകയും ചെയ്തു. പി നന്ദകുമാറിന്റെ മലപ്പുറം വിരുദ്ധ പ്രസ്താവന തെറ്റായ ഉദ്ദേശത്തിലല്ലെന്ന് ജില്ലാ സെക്രട്ടറി വി പി അനിൽ വ്യക്തമാക്കി
മലപ്പുറം: പാർട്ടിയുടെ സംഘടനാപരമായ ദൗർബല്യങ്ങൾ കൃത്യമായി വിലയിരുത്തി പാർട്ടി അടിത്തറ കൂടുതൽ ശക്തിപ്പെടുത്താനുള്ള സുപ്രധാന തീരുമാനങ്ങളുമായി സി പി എം മലപ്പുറം ജില്ലാ വിപുലീകൃത കമ്മിറ്റി യോഗം ചേർന്നു. ജില്ലാ കമ്മിറ്റിയിലേക്ക് കൂടുതൽ നേതാക്കളെ ഉൾപ്പെടുത്തി പുനസംഘടിപ്പിക്കാനും യോഗത്തിൽ തീരുമാനമായി. തിരൂരങ്ങാടി ഏരിയ സെക്രട്ടറിയായ തയ്യിൽ അലവിയെ പുതുതായി ജില്ലാ കമ്മിറ്റിയിൽ ഉൾപ്പെടുത്തി. കൂടാതെ കെ ബദറുന്നിസ, പി പത്മജ, എം ടി അഹമ്മദ്, ഇ നരേന്ദ്ര ദേവ് എന്നിവരെ ജില്ലാ കമ്മിറ്റിയിലേക്ക് ക്ഷണിതാക്കളായും തെരഞ്ഞെടുത്തു. വാർത്താസമ്മേളനത്തിൽ ജില്ലാ സെക്രട്ടറി വി പി അനിൽ തീരുമാനങ്ങൾ വിശദീകരിച്ചു. മതനിരപേക്ഷ ആശയങ്ങൾ ഉയർത്തിപ്പിടിച്ചാണ് പാർട്ടി മുന്നോട്ട് പോകുന്നതെന്നും, മുസ്ലിം ലീഗിന്റെയും ജമാഅത്തെ ഇസ്ലാമിയുടെയും നിലപാടുകൾ വ്യക്തമാണെന്നും അദ്ദേഹം പറഞ്ഞു. ഇരുവരുടെയും പ്രചാരണങ്ങളിൽ തെറ്റിദ്ധരിക്കപ്പെട്ട ജനവിഭാഗങ്ങളെ ഇടതുപക്ഷത്തോടൊപ്പം അണിനിരത്താനുള്ള ബോധവൽക്കരണ പ്രവർത്തനങ്ങൾക്ക് പാർട്ടി തുടക്കം കുറിച്ചതായും സെക്രട്ടറി അറിയിച്ചു.
നന്ദകുമാറിന്റെ പ്രസ്താവന തെറ്റായ ഉദ്ദേശത്തിലല്ല
പി നന്ദകുമാറിന്റെ വിവാദ മലപ്പുറം പരാമർശത്തിലും ജില്ലാ സെക്രട്ടറി നിലപാട് വ്യക്തമാക്കി. തന്റെ പ്രസ്താവനയെക്കുറിച്ച് നന്ദകുമാർ തന്നെ വിശദീകരണം നൽകിയിട്ടുണ്ടെന്നും, പറഞ്ഞ കാര്യങ്ങൾ തെറ്റായ ഉദ്ദേശത്തോടെയുള്ളതല്ലെന്ന് അദ്ദേഹം വ്യക്തമാക്കിയിട്ടുണ്ടെന്നും വി പി അനിൽ ചൂണ്ടിക്കാട്ടി. മലപ്പുറം എന്നത് തികഞ്ഞ മതസൗഹാർദ്ദമുള്ള ജില്ലയാണെന്നതാണ് സി പി എമ്മിന്റെ എന്നും നിലനിൽക്കുന്ന നിലപാടെന്നും അദ്ദേഹം കൂട്ടിച്ചേർത്തു. മലയോര മേഖലയിലെ 11 പ്രദേശങ്ങൾ പരിസ്ഥിതിലോല മേഖലയിൽ (ESA) ഉൾപ്പെടുന്നതുമായി ബന്ധപ്പെട്ട വിഷയം പ്രിയങ്ക ഗാന്ധി എം പി കാര്യമായി ഇടപെട്ടില്ലെന്ന് വിമർശിച്ച യോഗം, പ്രദേശവാസികളുടെ ഈ വിഷയം ഏറ്റെടുക്കാൻ തീരുമാനിച്ചു. മന്ത്രിയെ തടഞ്ഞ് വഴിയിൽ ഇറക്കിവിട്ട സംഭവത്തിൽ യുവമോർച്ചയ്ക്കെതിരെ നടപടിയെടുക്കാത്തതിൽ യു ഡി എഫ് സർക്കാരിന്‍റെ സംഘപരിവാർ സമീപനം വ്യക്തമാണെന്നും അദ്ദേഹം കുറ്റപ്പെടുത്തി.
