കവളപ്പാറയില്‍ കാണാതായവരെ തിരയാന്‍ ജിപിആര്‍ സംവിധാനം

ഹൈദരാബാദിൽ നിന്നുള്ള ആറംഗ ശാസ്ത്രജ്ഞരുടെ സംഘം ഉച്ചയോടെ കവളപ്പാറയിലെത്തും. 

സ്വത്തും പണവും എന്തിന്, കാലുറപ്പിച്ച ഭൂമി പോലും ഒഴുകിപോയ കുടുംബങ്ങളാണ് പുത്തുമലയില്‍ ഇപ്പോഴുള്ളത്. കണ്ണടച്ചാല്‍, എല്ലാം ഒഴുക്കിക്കൊണ്ട് പോകാനായെത്തുന്ന മലവെള്ളമാണ് പലരുടെയും ഉറക്കം കെടുത്തുന്നത്. മരിച്ചവര്‍ക്കായി, ഇനി ബാക്കിയുള്ളത് അന്ത്യകര്‍മ്മങ്ങള്‍ മാത്രമാണ്. അതിന് മൃതദേഹം കണ്ടെത്തണം. എന്നാല്‍ പുത്തുമലയിലും കവളപ്പാറയിലുമായി മുപ്പതോളം പേരെ ഇനിയും കണ്ടെത്താനുണ്ട്. കുത്തൊഴുക്കില്‍ ഏങ്ങോട്ട് പോയെന്നുപോലും അറിയാതെ...

വയനാട്: കവളപ്പാറ ഉരുൾപൊട്ടലിൽ കാണാതായവർക്കായി ഇന്ന് ജിപിആർ സംവിധാനം ഉപയോഗിച്ച് തിരച്ചിൽ നടത്തും. ഹൈദരാബാദിൽ നിന്നുള്ള ആറംഗ ശാസ്ത്രജ്ഞരുടെ സംഘം ഉച്ചയോടെ കവളപ്പാറയിലെത്തും. ഇതുവരെ 38 മൃതദേഹങ്ങളാണ് കണ്ടെടുത്തത്. ഇനി 21 പേരെ കൂടി കണ്ടെത്താനുണ്ട്. 

മന്ത്രി എ കെ ബാലൻ ഇന്ന് കവളപ്പാറയിലെ ദുരിതാശ്വാസ ക്യാമ്പുകള്‍ സന്ദർശിക്കും. പതിനാല് ഹിറ്റാച്ചികള്‍ ഉപയോഗിച്ചാണ് തെരച്ചിൽ നടത്തുന്നത്. മഴ മാറി നിൽക്കുന്നതും തെരച്ചിൽ വേഗത്തിലാക്കിയിട്ടുണ്ട്. ചതുപ്പ് പ്രദേശങ്ങളിൽ ഡ്രോണുകൾ ഉപയോഗിച്ച് നിരീക്ഷണം നടത്തുന്നുണ്ട്. ഏഴുപേർക്കായി തെരച്ചിൽ തുടരുന്ന പുത്തുമലയിലും റഡാർ എത്തിക്കാനാണ് ശ്രമം.