ആലുവയില് അഞ്ചുവയസുകാരി ക്രൂരമായി കൊല്ലപ്പെട്ടതിന് പിന്നാലെയാണ് സോഷ്യല്മീഡിയയില് ഇത്തരം പ്രചരണങ്ങള് ആരംഭിച്ചത്.
തിരുവനന്തപുരം: പീഡന സാധ്യത മനസിലായാല് അക്രമിയെ കൊല്ലാന് പെണ്കുട്ടിക്ക് അവകാശമുണ്ടെന്ന രീതിയില് സോഷ്യല്മീഡിയയില് പ്രചരിക്കുന്നത് വ്യാജവാര്ത്തകളെന്ന് പൊലീസ്. ഡിജിപിയുടെ ഫോട്ടോ ഉപയോഗിച്ചാണ് വ്യാജപ്രചരണം നടക്കുന്നത്. ഇത്തരം വ്യാജവാര്ത്തകള് നിര്മ്മിക്കുന്നതും പ്രചരിപ്പിക്കുന്നതും കുറ്റകരമാണെന്ന് പൊലീസ് വ്യക്തമാക്കി.
'ഇന്ത്യന് പീനല് കോഡ് 233 പ്രകാരം ഒരു പെണ്കുട്ടി പീഡനത്തിന് ഇരയാവുകയോ, പീഡിപ്പിക്കപ്പെടാന് സാധ്യത ഉണ്ടെന്ന് മനസിലായാല് അക്രമിയെ കൊല്ലാനുള്ള അവകാശം പെണ്കുട്ടിക്കുണ്ട്.' എന്നാണ് സോഷ്യല്മീഡിയയില് പ്രചരിക്കുന്നത്. ആലുവയില് അഞ്ചുവയസുകാരി ക്രൂരമായി കൊല്ലപ്പെട്ടതിന് പിന്നാലെയാണ് സോഷ്യല്മീഡിയയില് ഇത്തരം പ്രചരണങ്ങള് ആരംഭിച്ചത്.
അതേസമയം, ആലുവ സംഭവത്തില് നീതി ഉറപ്പാക്കുമെന്നും സംസ്ഥാന സര്ക്കാര് സാധ്യമായതെല്ലാം ചെയ്തിട്ടുണ്ടെന്നും മന്ത്രി മുഹമ്മദ് റിയാസ് പറഞ്ഞു. കൊലപാതകത്തിന്റെ പശ്ചാത്തലത്തില് കേരളത്തില് യുപി മാതൃക നടപ്പാക്കണമെന്ന ആവശ്യത്തോടും മന്ത്രി പ്രതികരിച്ചു. കേരളത്തെ യുപിയുമായി താരതമ്യം ചെയ്യുന്നത് യുപിയെ വെള്ള പൂശാനാണ്. ഓരോ മൂന്നു മണിക്കൂറിലും ഒരു ബലാത്സംഗം നടക്കുന്ന സംസ്ഥാനമാണ് യുപി. യുപിയില് പൊലീസ് ഏറ്റുമുട്ടല് നിത്യ സംഭവമാണ്. ബിജെപി നേതാക്കള് പറയുന്നത് മനസിലാക്കാം. കേരളത്തിലെ കോണ്ഗ്രസ് നേതാക്കള് യുപിയെ വെള്ള പൂശുന്നുത്തില് ദേശീയ നേതൃത്വം നിലപാട് വ്യക്തമാക്കണമെന്ന് മുഹമ്മദ് റിയാസ് ആവശ്യപ്പെട്ടു.
പ്രതിക്ക് മരണ ശിക്ഷ കിട്ടണമെന്നാണ് തന്റെ ആഗ്രഹമെന്ന് ആലുവയില് കൊല്ലപ്പെട്ട പെണ്കുട്ടിയുടെ പിതാവ് പ്രതികരിച്ചു. കേസില് കൂടുതല് പ്രതികളുണ്ടെങ്കില് അവരെ ഉടന് പുറത്തു കൊണ്ടുവരണം. പ്രതിക്ക് മരണശിക്ഷ കിട്ടിയാലേ കേരളത്തിനും സന്തോഷമുണ്ടാകൂ. തന്റെ മകള് ഇപ്പോള് കേരളത്തിന്റെ മകള് കൂടിയാണ്. പ്രതിക്ക് ശിക്ഷ ഉറപ്പാക്കിയ ശേഷമേ നാട്ടിലേക്ക് തിരികെ പോകൂയെന്നും പിതാവ് ഏഷ്യാനെറ്റ് ന്യൂസിനോട് പറഞ്ഞു. സംസ്ഥാന സര്ക്കാരിലും പൊലീസിലും പൂര്ണവിശ്വാസമുണ്ട്. ആരോടും പരാതിയില്ലെന്നും അദ്ദേഹം കൂട്ടിച്ചേര്ത്തു.
വിസിറ്റിംഗ് വിസയില് ഇന്ത്യയിലെത്തി ഫേസ്ബുക്ക് സുഹൃത്തിനെ വിവാഹം ചെയ്ത് ശ്രീലങ്കന് യുവതി
