കേരളവര്മ്മ ചെയര്മാൻ സ്ഥാനം എസ്എഫ്ഐക്ക് തന്നെ; അനിരുദ്ധൻ ജയിച്ചു, ശ്രീക്കുട്ടൻ തോറ്റു
ഫോട്ടോഫിനിഷിലേക്ക് നീങ്ങിയ വോട്ടെണ്ണലിൽ അവസാന നിമിഷത്തിലാണ് 3 വോട്ടിന്റെ ഭൂരിപക്ഷത്തിൽ അനിരുദ്ധൻ ജയിച്ചത്. കെഎസ്യു സ്ഥാനാര്ത്ഥി ശ്രീക്കുട്ടൻ 889 വോട്ടും എസ്എഫ്ഐ സ്ഥാനാര്ത്ഥി കെഎസ് അനിരുദ്ധൻ 892 വോട്ടും നേടി.
![Kerala varma college election SFI wins chairman post in recounting KSU lost nbu Kerala varma college election SFI wins chairman post in recounting KSU lost nbu](https://static-ai.asianetnews.com/images/01hgn32wm48ymphntxpjm5vd5w/kerala-varma-college_363x203xt.jpg)
തൃശ്ശൂര്: കേരളവര്മ്മ കോളേജ് യൂണിയന് ചെയര്മാന് സ്ഥാനത്തേക്കുള്ള റീ കൗണ്ടിംഗിൽ എസ്എഫ്ഐ സ്ഥാനാർത്ഥി അനിരുദ്ധന് വിജയം. ഫോട്ടോഫിനിഷിലേക്ക് നീങ്ങിയ വോട്ടെണ്ണലിൽ അവസാന നിമിഷത്തിലാണ് 3 വോട്ടിന്റെ ഭൂരിപക്ഷത്തിൽ അനിരുദ്ധൻ ജയിച്ചത്. കെഎസ്യു സ്ഥാനാര്ത്ഥി ശ്രീക്കുട്ടൻ 889 വോട്ടും എസ്എഫ്ഐ സ്ഥാനാര്ത്ഥി കെഎസ് അനിരുദ്ധൻ 892 വോട്ടും നേടി.
കെഎസ്യു ചെയര്മാന് സ്ഥാനാര്ത്ഥി എസ് ശ്രീക്കുട്ടന് നല്കിയ ഹര്ജിയില് ഹൈക്കോടതി നിർദേശപ്രകാരമാണ് കേരളവര്മ്മ കോളേജില് വീണ്ടും വോട്ടെണ്ണിയത്. വിജയിയായി പ്രഖ്യാപിച്ചിരുന്ന എസ് എഫ് ഐയുടെ സ്ഥാനാർത്ഥിയുടെ വിജയം റദ്ദാക്കിയ കോടതി അസാധുവോട്ടുകളടക്കം കൂട്ടിച്ചേർത്ത് എണ്ണിയത് അപകാതയുണ്ടെന്നും കണ്ടെത്തിയിരുന്നു.
കഴിഞ്ഞ മാസം ഒന്നിനായിരുന്നു കേരളവര്മ്മ കോളേജിലെ യൂണിയന് തെരഞ്ഞെടുപ്പ്. ചെയര്മാന് സ്ഥാനത്തേക്ക് എസ്.എഫ്.ഐ, കെ.എസ്.യു, എ.ബി.വി.പി, എ.ഐ.എസ്.എഫ് സംഘടനകളുടെ സ്ഥാനാര്ഥികളാണ് മത്സരിച്ചത്. ആദ്യം വോട്ടെണ്ണിയപ്പോൾ ശ്രീക്കുട്ടന് 896 വോട്ടും എസ്എഫ്ഐയുടെ അനിരുദ്ധന് 895 വോട്ടുമായിരുന്നു ലഭിച്ചത്. തുടർന്ന് എസ്എഫ്ഐയുടെ ആവശ്യപ്രകാരം റീ കൗണ്ടിംഗ് നടത്തുകയും അനിരുദ്ധന് 11 വോട്ടിന് വിജയിച്ചതായി പ്രഖ്യാപിക്കുകയുമായിരുന്നു. തെരഞ്ഞെടുപ്പിൽ അട്ടിമറി ആരോപിച്ച് കെ.എസ്.യു രംഗത്ത് വന്നതോടെയാണ് വിവാദമായത്.