കെപിസിസിക്ക് മൂന്ന് വർക്കിംഗ് പ്രസിഡന്റുമാർ; കെ വി തോമസിനെ ഒഴിവാക്കി
കൊടിക്കുന്നിൽ സുരേഷ്, പി ടി തോമസ്, ടി സിദ്ദിഖ് എന്നിവരാണ് പുതിയ വർക്കിംഗ് പ്രസിഡന്റുമാർ. കെ വി തോമസിനെ വർക്കിംഗ് പ്രസിഡന്റ് സ്ഥാനത്തുനിന്നും ഒഴിവാക്കി.
ദില്ലി: കെപിസിസി വർക്കിംഗ് പ്രസിഡന്റുമാരായി മൂന്ന് പേരെ നിയോഗിച്ചെന്ന് കോൺഗ്രസ്. കൊടിക്കുന്നിൽ സുരേഷ്, പി ടി തോമസ്, ടി സിദ്ദിഖ് എന്നിവരാണ് പുതിയ വർക്കിംഗ് പ്രസിഡന്റുമാർ. കെ വി തോമസിനെ വർക്കിംഗ് പ്രസിഡന്റ് സ്ഥാനത്തുനിന്നും ഒഴിവാക്കി.
കൊടിക്കുന്നിൽ സുരേഷിന്റെ പേര് കെപിസിസി പ്രസിഡന്റ് സ്ഥാനത്തേക്ക് പരിഗണിക്കുന്നതായി സൂചനകളുണ്ടായിരുന്നു. എന്നാൽ, കെ സുധാകരൻ ആ സ്ഥാനത്തേക്ക് എത്തിയതോടെ കൊടിക്കുന്നിൽ സുരേഷ് വർക്കിംഗ് പ്രസിഡന്റായി. പി ടി തോമസിനെ യുഡിഎഫ് കൺവീനറാക്കാൻ ആലോചനകളുണ്ടായിരുന്നു. എന്നാൽ, താല്പര്യമില്ലെന്ന് അദ്ദേഹം അറിയിക്കുകയായിരുന്നെന്നാണ് വിവരം.
ഗ്രൂപ്പ് പോരും പാർട്ടിക്കുള്ളിലെ പ്രശ്നങ്ങളും പരിഹരിക്കുന്നതിന്റെ ഭാഗമായി കെ വി തോമസിനെ കുറച്ചുനാൾ മുമ്പ് വർക്കിംഗ് പ്രസിഡന്റായി നിയോഗിച്ചിരുന്നു. എന്നാൽ, പുതിയ പട്ടികയിൽ അദ്ദേഹത്തെ ഒഴിവാക്കി.