Malayalam News Highlights: വ്യോമാക്രമണം കടുപ്പിച്ച് ഇസ്രയേൽ, ഗാസയെ വിഭജിച്ചെന്ന് വാദം

പുറകോട്ടെടുത്ത പിക്കപ്പ് ലോറിയിടിച്ച് ഒന്നര വയസുകാരന് ദാരുണാന്ത്യം. ആനക്കര ഉമ്മത്തൂർ നിരപ്പ് സ്വദേശി പൈങ്കണ്ണത്തൊടി വീട്ടിൽ മുബാറക്ക് - ആരിഫ ദമ്പതികളുടെ മകൻ ഒന്നര വയസുള്ള മുഹമ്മദ് മുസമിൽ ആണ് മരിച്ചത്. വീടിന്റെ തൊട്ടുമുൻവശത്തെ മൈതാനത്ത് വിറക് കീറാൻ കൊണ്ടുവന്ന യന്ത്രം കാണാൻ എത്തിയതായിരുന്നു മുസമിൽ. 

മലപ്പുറത്ത് പാർട്ടി വിലക്ക് ലംഘിച്ച് പലസ്തീൻ ഐക്യദാർഢ്യ പരിപാടി സംഘടിപ്പിച്ചത് നിലപാടാണെന്നും അതിൽ മാറ്റമില്ലെന്നും കോൺഗ്രസ് നേതാവ് ആര്യാടൻ ഷൗക്കത്ത്. ഇക്കാര്യത്തിൽ പാർട്ടിക്കുണ്ടായ തെറ്റിദ്ധാരണ മാറ്റും. താൻ അച്ചടക്കം ലംഘിച്ചോ എന്നത് മാധ്യമങ്ങളോട് പറയുന്നില്ല. കെപിസിസി ജനറൽ സെക്രട്ടറിയാണ് താനെന്ന് പറഞ്ഞ ആര്യാടൻ ഷൗക്കത്ത് അച്ചടക്കമുള്ള പാർട്ടി പ്രവർത്തകനാണെന്നും പ്രതികരിച്ചു. സിപിഎമ്മിന്റെ ക്ഷണം തള്ളാനും ആര്യാടൻ ഷൗക്കത്ത് തയ്യാറായില്ല.

അസമയത്തെ വെടിക്കെട്ട് നിരോധനത്തിൽ അപ്പീലുമായി കൊച്ചിൻ ദേവസ്വം ബോർഡ്. വെടിക്കെട്ട് ക്ഷേത്രാചാരങ്ങളുടെ ഭാഗമാണെന്നും വെടിക്കെട്ട് ഒഴിവാക്കാനാവില്ലെന്നും ചൂണ്ടിക്കാട്ടി സിങ്കിൾ ബഞ്ച് ഉത്തരവിനെതിരെ ഡിവിഷൻ ബഞ്ചിനെ സമീപിക്കും. ഇന്ന് ചേർന്ന കൊച്ചിൻ ദേവസ്വം ബോർഡ് യോഗത്തിലാണ് തീരുമാനം

അസമയത്ത് വെടിക്കെട്ട് വിലക്കിയ ഹൈക്കോടതി സിംഗിൾ ബെഞ്ച് വിധിക്കെതിരെ സംസ്ഥാന സർക്കാർ ഹൈക്കോടതിയിൽ. ഇടക്കാല ഉത്തരവ് റദ്ദാക്കണമെന്ന് ആവശ്യപ്പെട്ടാണ് സർക്കാർ അപ്പീൽ നൽകിയത്. പരിഗണനാ വിഷയത്തിന് അപ്പുറമുള്ള കാര്യങ്ങളാണ് സിംഗിൾ ബെഞ്ച് പരിശോധിച്ചതെന്ന് സർക്കാർ ഹർജിയിൽ വ്യക്തമാക്കി.

തിരുവനന്തപുരം നഗരത്തിന്റെ വിവിധ ഭാഗങ്ങളിൽ കെ എസ് യു പ്രവർത്തകരും പൊലീസും തമ്മിൽ സംഘർഷം. ഉന്നത വിദ്യാഭ്യാസ വകുപ്പ് മന്ത്രി കെ ബിന്ദുവിന്റെ രാജിയാവശ്യവുമായി കെ എസ് യു പ്രവർത്തകർ മന്ത്രിയുടെ വീട്ടിലേക്ക് നടത്തിയ പ്രതിഷേധ മാർച്ചാണ് തലസ്ഥാനത്ത് സംഘർഷത്തിലേക്ക് നയിച്ചത്. ബാരിക്കേട് മറിച്ചിടാൻ പ്രവർത്തകർ ശ്രമിച്ചതോടെ, പ്രവർത്തകർക്കെതിരെ പൊലീസ് ജലപീരങ്കി പ്രയോഗിച്ചു. ലാത്തി വീശി. ഇതോടെ, പ്രവർത്തകരും പൊലീസും തമ്മിൽ കയ്യാങ്കളിയായി. ലാത്തി ചാർജിൽ വനിതാ പ്രവ‍‍ർ‍ത്തക‍ര്‍ അടക്കം നിരവധിപ്പേർക്ക് പരിക്കേറ്റു.

കര്‍ണാടക സിവിൽ സർവ്വീസ് പരീക്ഷയ്ക്കെത്തിയെ വിദ്യാർത്ഥിനിയോട് താലി അഴിച്ചുമാറ്റാന്‍ ആവശ്യപ്പെട്ടതായി ആരോപണം. കര്‍ണാടകയിലെ കലബുറഗിയിലാണ് സംഭവം. പ്രവേശന കവാടത്തിലെ സുരക്ഷാ പരിശോധനകള്‍ക്കിടെയാണ്  വനിതാ ഉദ്യോഗാര്‍ത്ഥിയ്ക്ക് ദുരനുഭവം ഉണ്ടായതെന്നാണ് പരാതി. പരീക്ഷയിലെ ചോദ്യങ്ങളേക്കുറിച്ചുള്ള രൂക്ഷ വിമര്‍ശനങ്ങള്‍ക്കിടയിലാണ് പുതിയ ആരോപണം

കൈപമംഗലത്ത് 11 കെ വി ലൈനിൽ നിന്നും ഷോക്കേറ്റ് കെഎസ്ഇബി ജീവനക്കാരൻ മരിച്ചു. കെഎസ്ഇബി കയ്പമംഗലം സെക്ഷനിലെ ജീവനക്കാരൻ അഴീക്കോട് പേബസാർ  സ്വദേശി തമ്പി (45) ആണ് മരിച്ചത്. ചെന്ത്രാപ്പിന്നി ചിറക്കൽ പള്ളിക്കടുത്ത് ഉച്ചക്ക് പന്ത്രണ്ടരയോടെ ആയിരുന്നു അപകടം. ഏരിയൽ ട്രോളി വാഹനത്തിൽ കയറി 11 കെ.വി ലൈനിലെ ഇൻസുലേറ്റർ മാറാനായി ശ്രമിക്കുമ്പോഴാണ് ഷോക്കേറ്റത്. ലൈൻ ഓഫ് ചെയ്ത ശേഷമാണ് ജോലിക്ക് കയറിയതെന്ന് ഉദ്യോഗസ്ഥർ പറയുന്നു. എന്നാല് എങ്ങിനെയാണ് വൈദ്യുതി പ്രവഹിച്ചതെന്ന് വ്യക്തമല്ല. ഉടൻ തന്നെ ചെന്ത്രാപ്പിന്നിയിൽ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. 

ആലപ്പുഴ ജില്ലയിലെ വയലാർ നാ​ഗംകുളങ്ങരയിൽ കടത്തുവള്ളം മുങ്ങി. എല്ലാവരും നീന്തിരക്ഷപ്പെട്ടു. വള്ളത്തിൽ 12 പേരുണ്ടായിരുന്നു. 

മധ്യപ്രദേശിൽ ഇഞ്ചോടിഞ്ച് പോരാട്ടമെന്ന പ്രവചനങ്ങൾ തള്ളുകയാണ് കേന്ദ്ര മന്ത്രിയും ബിജെപി സ്ഥാനാർഥിയുമായ നരേന്ദ്ര സിംഗ് തോമർ. സംസ്ഥാനത്ത് ഇത്തവണ ബിജെപി അനായാസം ഒറ്റയ്ക്ക് ഭൂരിപക്ഷം നേടുമെന്ന് നരേന്ദ്ര സിംഗ് തോമർ ഏഷ്യാനെറ്റ് ന്യൂസിനോട് പറഞ്ഞു. 

കളമശ്ശേരി സ്ഫോടന കേസ് പ്രതി ഡൊമിനിക് മാർട്ടിനെ 10 ദിവസം പൊലീസ് കസ്റ്റഡിയിൽ വിട്ട് കോടതി. പ്രതിയുടെ രാജ്യാന്തര ബന്ധം അന്വേഷിക്കണമെന്നും പ്രതിയെ പത്തിലേറെ സ്ഥലങ്ങളിലെത്തിച്ച് തെളിവെടുക്കണമെന്നും പൊലീസ്  കോടതിയില്‍ വിശദമാക്കി. അതേ സമയം അഭിഭാഷകൻ വേണ്ടെന്ന നിലപാട് ആവർത്തിക്കുകയാണ് പ്രതി ഡൊമിനിക് മാർട്ടിൻ. പൊലീസിനെതിരെ പരാതിയില്ലെന്നും താൻ ആരോ​ഗ്യവാനാണെന്നും ഇയാൾ പറഞ്ഞു.  

 മൂവാറ്റുപുഴയിലെ ഇതരസസംസ്ഥാന തൊഴിലാളികളുടെ മരണം കൊലപാതകമെന്ന് സ്ഥിരീകരിച്ച് പൊലീസ്. പ്രതിയെന്ന് സംശയിക്കുന്ന ഒഡിഷ സ്വദേശി ​ഗോപാൽ സംസ്ഥാനം വിട്ടു. കൂടാതെ മരിച്ച രണ്ട് പേരുടെയും മൊബൈൽ ഫോണുകളും കാണാതായിട്ടുണ്ട്. ഇയാൾ മൊബൈൽ ഫോണുകളുമായി കടന്നുകളഞ്ഞതാകാമെന്ന് പൊലീസ് പറയുന്നു. 

വിയ്യൂര്‍ അതീവ സുരക്ഷാ ജയിലില്‍ നടന്നത് കലാപശ്രമമെന്ന് എഫ് ഐ ആർ. ടി പി ചന്ദ്രശേഖരൻ വധക്കേസ് പ്രതി കൊടി സുനി ഉൾപ്പെടെ 10 പേർക്കെതിരെ വധശ്രമത്തിനും പൊതുമുതൽ നശിപ്പിച്ചതിനും കേസെടുത്തു. സംഭവത്തിൽ നാല് ജീവനക്കാർക്കും ഒരു തടവ്കാരനും പരിക്കേറ്റിരുന്നു. വധശ്രമം, പൊതുമുതൽ നശിപ്പിക്കൽ, കലാപാഹ്വാനം എന്നീ വകുപ്പുകൾ ചേർത്താണ് വിയ്യൂർ പൊലീസ് കേസെടുത്തത്. 

ഇഡിയെ ഉപയോ​ഗിച്ച് ഭയപ്പെടുത്താൻ നോക്കേണ്ടെന്ന് ഛത്തീസ്​ഗഡ് മുഖ്യമന്ത്രി ഭൂപേഷ് ബാ​ഗേൽ. ഏഷ്യാനെറ്റ് ന്യൂസിനോട് സംസാരിക്കവേ ആയിരുന്നു ബാഗേലിന്‍റെ പ്രതികരണം. മൂന്ന് വർഷമായി തൻ്റെ പിന്നാലെ അന്വേഷണ ഏജൻസികളുണ്ടെന്നും തനിക്കെതിരെ ഒന്നും കണ്ടെത്താനായില്ല എന്നും ഭൂപേഷ് ബാ​ഗേൽ വ്യക്തമാക്കി. മോദിയും അമിത് ഷായും കൂടാതെ ഇഡിയും രാഷ്ട്രീയ ജോലി ഏറ്റെടുക്കുന്നുവെന്നും ബാ​ഗേൽ വിമർശിച്ചു.

നടി ശില്‍പ ഷെട്ടിയുടെ ഭര്‍ത്താവ് രാജ് കുന്ദ്ര നായകനായി എത്തിയതാണ് യുടി 69. യുടി 69ന് ആകെ നേടാനായ കളക്ഷൻ വെറും 47 ലക്ഷം മാത്രമാണ് എന്നാണ് ബോക്സ് ഓഫീസ് റിപ്പോര്‍ട്ട്. ഞായറാഴ്ച ഏകദേശം 17 ലക്ഷമാണ് ചിത്രത്തിന് നേടാനിയിട്ടുണ്ടാകുക എന്നും റിപ്പോര്‍ട്ടുകളില്‍ നിന്ന് വ്യക്തമാകുന്നത്. യുടി 69 ഏകദേശം 20 കോടി ബജറ്റിലാണ് ഒരുങ്ങിയത് എന്നതും കണക്കിലെടുക്കുമ്പോള്‍ ആകെ ഒരു കോടി പോലും മൂന്ന് ദിവസത്തിനുള്ളില്‍ നേടാനാകാത്ത സാഹചര്യത്തില്‍ വൻ നഷ്‍ടമാകുകയാണ്.

നിരോധനത്തിനെതിരായ പോപ്പുലർ ഫ്രണ്ടിൻറെ ഹർജി സുപ്രീം കോടതി തള്ളി. ആദ്യം ദില്ലി ഹൈക്കോടതിയിൽ പോകാൻ സുപ്രീം കോടതി നിർദ്ദേശിച്ചു. നിരോധനം ശരിവച്ച യുഎപിഎ ട്രൈബ്യൂണൽ ഉത്തരവിനെതിരെയായിരുന്നു പിഎഫ്ഐ ഹർജി. കഴിഞ്ഞ വർഷമാണ് പോപ്പുലർഫ്രണ്ടിനെ കേന്ദ്ര സർക്കാർ നിരോധിച്ചത്. നിരോധനം  യുഎപിഎ ട്രൈബ്യൂണൽ ശരിവെക്കുകയും ചെയ്തു. ഇതിനെതിരെയായിരുന്നു ഹർജി. ആദ്യം കേൾക്കേണ്ടത് ദില്ലി ഹൈക്കോടതിയാണ്. അതിന് ശേഷം വേണമെങ്കിൽ സുപ്രീംകോടതിയെ സമീപിക്കാമെന്നാണ് കോടതി നിർദ്ദേശം. 

സംസഥാനത്ത് ഇന്ന് സ്വർണവില കുറഞ്ഞു. ഒരു പവൻ സ്വർണത്തിന് 120 രൂപയാണ് കുറഞ്ഞത്. ശനിയാഴ്ചയും സ്വർണവില കുറഞ്ഞിരുന്നു. അതേസമയം ഇന്നലെ വില മാറിയില്ല. ഒരു പവൻ സ്വർണത്തിന്റെ ഇന്നത്തെ വിപണി നിരക്ക് 45080 രൂപയാണ്.  

തൃണമൂൽ കോൺ​ഗ്രസ് എംപി മഹുവ മൊയ്ത്രക്കെതിരായ ആരോപണത്തിൽ മഹുവക്കെതിരെ ഒരു തെളിവുമില്ലെന്ന് എത്തിക്സ് കമ്മിറ്റി അംഗം ഡാനിഷ് അലി എംപി. മഹുവയെ അയോഗ്യയാക്കാനുള്ള നീക്കത്തെ ശക്തമായി എതിർക്കുമെന്നും ഡാനിഷ് അലി എം പി ഏഷ്യാനെറ്റ് ന്യൂസിനോട് പറഞ്ഞു. പണം വാങ്ങിയെന്ന ആക്ഷേപം സമിതിക്ക് തെളിയിക്കാനായിട്ടില്ലെന്നും ഡാനിഷ് അലി പ്രതികരിച്ചു.

തെലങ്കാന തെരഞ്ഞെടുപ്പിൽ വൻ പ്രകടനം കാഴ്ച വെക്കാൻ 'ടീം കോൺഗ്രസ്' കർണാടകയിൽ നിന്ന് തെലങ്കാനയിലേക്ക്. ഡി കെ ശിവകുമാറിന്റെ നേതൃത്വത്തിലുള്ള ടീം കോൺഗ്രസിനെ തെലങ്കാനയിലേക്ക് നിയോഗിച്ചിരിക്കുകയാണ് ഹൈക്കമാൻഡ്. തെലങ്കാനയിലെ പ്രചാരണ പ്രവർത്തനങ്ങൾക്ക് ചുക്കാൻ പിടിക്കുക ഇവരായിരിക്കും. 

ബെംഗളൂരുവിൽ സർക്കാർ ഉദ്യോഗസ്ഥയുടെ കൊലപാതകത്തിൽ മുൻ ഡ്രൈവർ അറസ്റ്റിൽ. ഉദ്യോഗസ്ഥയുടെ മുൻ ഡ്രൈവറായിരുന്ന കിരണാണ് പിടിയിലായത്. ഇന്നലെയാണ് മൈനിംഗ് ആൻഡ് ജിയോളജി വകുപ്പിലെ ഉദ്യോഗസ്ഥയായ പ്രതിമ കെഎസ് കൊല്ലപ്പെട്ടത്. പ്രതിമയുടെ മൃതദേഹം വീട്ടിൽ കഴുത്തറുത്ത നിലയിൽ കണ്ടെത്തുകയായിരുന്നു. 

കളമശ്ശേരി സ്ഫോടന കേസ് പ്രതി ഡൊമിനിക് മാർട്ടിനെ 10 ദിവസം പൊലീസ് കസ്റ്റഡിയിൽ വിട്ട് കോടതി. പ്രതിയുടെ രാജ്യാന്തര ബന്ധം അന്വേഷിക്കണമെന്നും പ്രതിയെ പത്തിലേറെ സ്ഥലങ്ങളിലെത്തിച്ച് തെളിവെടുക്കണമെന്നും പൊലീസ്  കോടതിയില്‍ വിശദമാക്കി. അതേ സമയം അഭിഭാഷകൻ വേണ്ടെന്ന നിലപാട് ആവർത്തിക്കുകയാണ് പ്രതി ഡൊമിനിക് മാർട്ടിൻ. പൊലീസിനെതിരെ പരാതിയില്ലെന്നും താൻ ആരോ​ഗ്യവാനാണെന്നും ഇയാൾ പറഞ്ഞു.  

നിരോധനത്തിനെതിരായ പോപ്പുലർ ഫ്രണ്ടിൻറെ ഹർജി സുപ്രീം കോടതി തള്ളി. ആദ്യം ദില്ലി ഹൈക്കോടതിയിൽ പോകാൻ സുപ്രീം കോടതി നിർദ്ദേശിച്ചു

കോടികള്‍ പൊടിച്ച് സംസ്ഥാന സര്‍ക്കാര്‍ തലസ്ഥാനത്ത് കേരളീയം ആഘോഷങ്ങള്‍ നടത്തുമ്പോള്‍ നാലു മാസമായി മുടങ്ങിയ ക്ഷേമ പെന്‍ഷന്‍ കിട്ടാനുളള കാത്തിരിപ്പിലാണ് സംസ്ഥാനത്തെ 55 ലക്ഷത്തോളം മനുഷ്യര്‍. ക്ഷേമ പെന്‍ഷനെ മാത്രം ആശ്രയിച്ച് ഉപജീവനം നടത്തുന്ന അതിദരിദ്രരായ മനുഷ്യര്‍ പലരും, അന്നന്നത്തെ ആഹാരത്തിനും മരുന്നിനും പോലും ബുദ്ധിമുട്ടുന്ന സ്ഥിതിയിലുമാണ്. കടമെടുപ്പ് പരിധി കഴിയാറായതും സഹകരണ ബാങ്കുകളുടെ കണ്‍സോര്‍ഷ്യം വായ്പ നിഷേധിച്ചതുമാണ് ക്ഷേമ പെന്‍ഷനില്‍ ഇത്ര വലിയ കുടിശികയുടെ കാരണമായി സര്‍ക്കാര്‍ നിരത്തുന്ന ന്യായങ്ങള്‍.

അമേരിക്കൻ പ്രസിഡന്റ് തെരഞ്ഞെടുപ്പ് പ്രചാരണം ചൂടുപിടിക്കുമ്പോൾ ആറ് നിർണായകസംസ്ഥാനങ്ങളിൽ ജോ ബൈഡൻ ട്രംപിന് പിന്നിലെന്ന് അഭിപ്രായ സർവേകൾ. ബൈഡന്റെ പ്രായക്കൂടുതലും സന്പദ്‍രംഗം കൈകാര്യം ചെയ്ത രീതിയും എതിരാവുന്നെന്ന് സൂചന. അരിസോണ, ജോർജിയ, മിഷിഗൻ തുടങ്ങിയ സംസ്ഥാനങ്ങൾ ട്രംപിനൊപ്പമെന്ന് സർവേ ഫലം.

പുതിയ ഇന്റ‌ർകോണ്ടിനെന്റൽ ബാലിസ്റ്റിക് മിസൈൽ വിജയകരമായി പരീക്ഷിച്ച് റഷ്യയുടെ പുതിയ ആണവ അന്തർവാഹിനി. മിസൈൽ തൊടുത്തത് കടലിന്റെ അടിത്തട്ടിൽ നിന്ന്.ആറ് ആണവപോർമുനകൾ വഹിക്കാൻ ശേഷിയുള്ളതെന്ന് അമേരിക്കൻ ശാസ്ത്രജ്ഞർ.

സ്പെയിനിലെ കാനറി ഐലന്റ്സിൽ ഈ വർഷമെത്തിയത് 32,000 അഭയാർത്ഥികളെന്ന് കണക്ക്. ഈ വാരാന്ത്യത്തിൽ മാത്രം ബോട്ടുകളിൽ നിന്ന് രക്ഷപ്പെടുത്തിയത് 739 പേർ. അഭയാർത്ഥിപ്രശ്നം പരിഹരിക്കാൻ സ്പാനിഷ് സർക്കാരിനോട് സഹായം തേടി കാനറി ഐലന്റ്സ് മേധാവി

തുർക്കിയിലെ അമേരിക്കൻ വ്യോമസേന ആസ്ഥാനത്തിലേക്ക് കടന്നുകയറാൻ ശ്രമിച്ച് പലസ്തീൻ അനുകൂലികൾ. ജനക്കൂട്ടത്തെ പിരിച്ചുവിടാൻ കണ്ണീർവാതകം പ്രയോഗിച്ച് പൊലീസ്. ഇസ്രയേലിനെ വിമർശിക്കുന്നത് തുടർന്ന് പ്രസിഡന്റ് എർദോഗൻ

'നാലുമണിപ്പൂക്കള്‍'എന്ന ക്ഷയരോഗ ബോധവല്‍ക്കരണ ക്യാമ്പയിന്റെ രണ്ടാംഘട്ട പരിശോധനക്ക് മുന്നോടിയായി ഇടുക്കിയിലെ കുടുംബശ്രീ സിഡിഎസ്, എഡിഎസ് അഗംങ്ങള്‍ക്ക് പരിശീലനം നല്‍കി. രോഗലക്ഷണമുള്ള വ്യക്തികളുടെ സ്‌ക്രീനിംഗ് നടത്തുന്നതിന് വേണ്ട ആലോചനായോഗവും നടത്തി

കളഞ്ഞുകിട്ടിയ സ്വർണം ഉടമയ്ക്ക് തിരിച്ചു നൽകി യുവാക്കൾ. പാലക്കാട് പുതുശ്ശേരി ജംഗ്ഷനിലെ എ ടി എം പരിസരത്ത് നിന്നാണ് വെൽഡിംഗ് തൊഴിലാളികളായ ജി.സുനിൽകുമാർ, എൻ.ബിനു എന്നിവർക്ക് മൂന്ന് പവൻ സ്വർണമാല കളഞ്ഞു കിട്ടിയത്.

മാനന്തവാടിയിൽ കടമുറിയുടെ പൂട്ട് തകര്‍ത്ത് അകത്ത് കയറി പണം മോഷ്ടിച്ചയാളെ പൊലീസ് പിടികൂടി. പിടിയിലായത് തരുവണ സ്വദേശി സുധീഷ്. പ്രതി വലയിലായത്, സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ

ഇതരസംസ്ഥാന തൊഴിലാളികളുടെ പണം കവര്‍ന്ന മോഷ്ടാവ് പിടിയിലായി. ജോലി സ്ഥലത്തെ കെട്ടിടത്തിനുള്ളില്‍ ബാഗില്‍ സൂക്ഷിച്ചിരുന്ന 30500 രൂപ മോഷ്ടിച്ച പാണ്ടനാട് സ്വദേശി അനീഷ് ആണ് ചെങ്ങന്നൂര്‍ പൊലീസിന്റെ പിടിയിലായത്.

മലപ്പുറം കരുവാരക്കുണ്ടിൽ ജോലി വാഗ്ദാനം നൽകി 70 ലക്ഷം തട്ടിയ 45 കാരൻ പിടിയിൽ. തിരുവനന്തപുരം സ്വദേശി സുനിൽകുമാറാണ് പൊലീസ് പിടിയിലായത്. കേന്ദ്ര സർവകലാശാലയിൽ അസിസ്റ്റന്റ് പ്രൊഫസർ തസ്തിക വാഗ്ദാനം നൽകി കരുവാരക്കുണ്ട് സ്വദേശിയിൽ നിന്നും പണം തട്ടുകയായിരുന്നു. 

മലപ്പുറത്ത് മണൽ മാഫിയ സംഘത്തിലെ മൂന്ന് പേർക്കെതിരെ കാപ്പ ചുമത്തി. ഭാരതപ്പുഴയിൽ നിന്നും അനധികൃത മണൽ കടത്ത് നടത്തി നിരവധി കേസുകളിൽ പ്രതികളായ തിരൂർ പോലീസ് സ്റ്റേഷൻ പരിധിയിൽ താമസക്കാരായ നാലുപേർക്കെതിരെ ആണ് നടപടി.

ഇടുക്കി കഞ്ഞിക്കുഴിയിൽ കെട്ടിടത്തിൻറെ മുകളിൽ നിന്ന് കാൽ വഴുതി വീണ് വീട്ടമ്മ മരിച്ചു. കഞ്ഞിക്കുഴി മൂലയിൽ സിനി മാത്യു ആണ് മരിച്ചത്. വീടിനോട് ചേർന്നുള്ള ഇവരുടെ കെട്ടിടത്തിൽ നിന്നാണ് കാൽ വഴുതി വീണത്

കോട്ടയം തിടനാട് പോക്സോ കേസിൽ യുവാവിനെ പൊലീസ് അറസ്റ്റ് ചെയ്തു. പിടിയിലായത്, ആർപ്പൂക്കര വില്ലൂന്നി സ്വദേശി ഷിജുമോൻ പി.വി.കൗൺസിലിങ്ങിനിടയിലാണ് പെൺകുട്ടി വിവരം വെളിപ്പെടുത്തിയത്. 

കൂത്തുപറമ്പ് സ്വദേശിയെ കാറിൽ തട്ടിക്കൊണ്ടുപോയി പണം തട്ടിയ കേസിൽ 6 പേർ അറസ്റ്റിൽ. സ്കൂട്ടർ യാത്രികനായ മുഹമ്മദ് ഹനീഫയെ മർദിച്ച് പണം തട്ടിയെടുത്ത് വഴിയിൽ ഉപേക്ഷിച്ചത്, കഴിഞ്ഞ മാസം 31ന്

യാത്രാക്ലേശം രൂക്ഷമായ കോപ്പാലം മാഹി റൂട്ടിൽ രണ്ടു സൗജന്യ യാത്രാ ബസുകൾ കൂടി അനുവദിച്ചതായി എംഎൽഎ രമേഷ് പറമ്പത്ത്. വിദ്യാർത്ഥികളുടെ യാത്രാദുരിതം സംബന്ധിച്ച് മുഖ്യമന്ത്രി എൻ രംഗസ്വാമിക്ക് പരാതി നൽകിയതിനെ തുട‍ർന്നാണ് പുതിയ ബസുകൾ അനുവദിച്ചത്.

പറളിയില്‍ വ്യാപാരികള്‍ ഇന്ന് കടകളടച്ച് പ്രതിഷേധിക്കും. വ്യാപാരിയെ ഭീഷണിപ്പെടുത്തിയ വഴിയോരക്കച്ചവടക്കാരനെതിരെ നടപടിയെടുക്കണമെന്നാവശ്യപ്പെട്ടാണ് പ്രതിഷേധം. രാവിലെ മുതല്‍ ഉച്ചവരെയാണ് കടകള്‍ അടച്ചിടുക.

കണ്ണൂർ ബോയ്സ് ടൗൺ , പാൽച്ചുരം റോഡിൽ ഇന്ന് മുതൽ ഗതാഗതം പൂർണമായും നിരോധിക്കും. അറ്റകുറ്റപണികൾ നടക്കുന്നതിനാൽ നിലവിൽ ചരക്ക് വാഹനങ്ങൾക്ക് മാത്രമായിരുന്നു നിരോധനം. വയനാട് ജില്ലയിലേക്ക് പോകേണ്ട വാഹനങ്ങൾ നെടുമ്പൊയിൽ ചുരം വഴി പോകണമെന്ന് അധികൃതർ

ഇടുക്കിയിലെ വണ്ടിപ്പെരിയാർ 66 കെ വി സബ്സ്റ്റേഷനിലും കുമളി 33 കെവി സബ് സ്റ്റേഷനിലും അറ്റകുറ്റപ്പണികൾ നടക്കുന്നു. നാളെ കുമളി സബ്സ്‌റ്റേഷൻ പരിധിയിൽ പൂർണമായും വൈദ്യുതി തടസപ്പെടുമെന്ന് കെഎസ്ഇബി

പത്തനംതിട്ട മൈലപ്ര പഞ്ചായത്ത് പ്രസിഡന്റിനെതിരായ അവിശ്വാസ പ്രമേയത്തിൽ ഇന്ന് ചർച്ചയും വോട്ടെടുപ്പും. 13 അംഗ ഭരണസമിതിയില്‍ ആറുവീതമാണ് ഇടത് ,വലത് കക്ഷികൾക്ക് അംഗബലം. ഒരു ബിജെപി പ്രതിനിധിയുടെ നിലപാട് നിർണായകം.

കനത്ത മഴയില്‍ കോതമംഗംലത്ത് 25 ഏക്കര്‍ നെല്‍പ്പാടം വെള്ളത്തിനടിയിലായി. കോട്ടേപ്പാടം, അമലിപ്പുറം മേഖലകളിലാണ് ഒരു മാസമാകാറായ
നെല്‍ച്ചെടികള്‍ നശിച്ചത്. പ്രതിസന്ധികളെ അതിജീവിച്ചിച്ച് വിത്തറിക്കിയ പാടങ്ങള്‍.  ഒറ്റമഴയില്‍ അവ കണ്ണീര്‍ പാടങ്ങളായി. കഴിഞ്ഞ ദിവസം  തുടര്‍ച്ചയായി പെയ്ത മഴയാണ് ചതിച്ചത്

പാലക്കാട് മണ്ണാർക്കാട് കാട്ടുപന്നിയുടെ ആക്രമണത്തിൽ വലഞ്ഞ് നാട്ടുകാർ. വിറകു ശേഖരിക്കാൻ പോയ സ്ത്രീയുടെ കൈവിരൽ കാട്ടുപന്നി കടിച്ചു മുറിച്ചതോടെ ഏറെ ഭീതിയിലാണ് പ്രദേശവാസികൾ. വിരലിൻ്റെ കഷ്ണം പന്നി കടിച്ചെടുത്ത് ഓടിയതിനാൽ തുടർ ചികിത്സ എന്താകുമെന്നറിയില്ല. കാട്ടുപന്നികളെ തുരത്താൻ വനം വകുപ്പിൻ്റെ സജീവ ഇടപെടൽ ഉണ്ടാകണമെന്ന് നാട്ടുകാരുടെ ആവശ്യം

ചെങ്ങന്നൂർ മേഖലയിൽ കാട്ടുപന്നി ശല്യം രൂക്ഷം. ഏക്കർ കണക്കിന് കാർഷിക വിളകളാണ് കൂട്ടത്തോടെ എത്തുന്ന പന്നികൾ നശിപ്പിക്കുന്നത്. പലപ്പോഴും ജനങ്ങൾക്ക് നേരെയും പന്നികളുടെ ആക്രമണം ഉണ്ടായിട്ടും ശാശ്വത പരിഹാരം കാണാന്‍ അധികൃത തയ്യാറാകത്തില് ജനങ്ങള്‍ കടുത്ത പ്രതിഷേധത്തിലാണ്.

അതിരപ്പിള്ളി മലക്കപ്പാറ റൂട്ടിൽ ഇന്നു മുതൽ 15 ദിവസത്തേക്ക് സമ്പൂർണ ഗതാഗത നിയന്ത്രണം. മലക്കപ്പാറയ്ക്ക് സമീപം അമ്പലപ്പാറയിൽ രണ്ടാഴ്ച മുമ്പ് ഇടിഞ്ഞ റോഡ് ശരിയാക്കാനാണ് ഗതാഗത നിയന്ത്രണം. അടുത്ത 15 ദിവസത്തേക്ക് അത്യാവശ്യമുള്ള ഇരുചക്രവാഹനങ്ങൾ ഒഴികെയുള്ള അതിരപ്പിള്ളി ഭാഗത്ത് നിന്ന് വരുന്ന എല്ലാ വാഹനങ്ങളും തടയും. വാഴച്ചാൽ ചെക്ക് പോസ്റ്റിലും, തമിഴ്നാട്- മലക്കപ്പാറ ചെക്ക്പോസ്റ്റിലുമാണ് വാഹനങ്ങൾ തടയുന്നത്. ഇരു ഭാഗത്തും ആമ്പുലൻസ് സേവനം ക്രമീകരിക്കുന്നതാണെന്നും ജില്ലാ ഭരണകൂടം അറിയിച്ചു

ലോക്സസാഭാ തെരഞ്ഞെടുപ്പിൽ ലീഗ് കോട്ടകളിൽ കടന്ന് കയറാൻ പ്രത്യേക പാക്കേജുമായി സിപിഎം. പലസ്തീൻ അനുകൂല റാലിയിൽ തുടങ്ങി പൊന്നാനിയിൽ അപ്രതീക്ഷീത സ്ഥാനാര്‍ത്ഥിയെ പരീക്ഷിക്കുന്നത് വരെ വിപുലമായ നീക്കങ്ങളാണ് അണിയറയിൽ. ലീഗിനോട് സിപിഎമ്മിനുള്ള കരുതലിന്‍റെ പരിധി സസൂക്ഷ്മം നിരീക്ഷിക്കുകയാണ് കോൺഗ്രസും.

നവകേരളാ സദസ്സ് സംഘടിപ്പിക്കാനായി തനതു ഫണ്ടില്‍ നിന്നും പണം ചെലവഴിക്കാമെന്ന സര്‍ക്കാർ ഉത്തരവിനെതിരെ യുഡ‍ിഎഫ് ഭരിക്കുന്ന തദ്ദേശ സ്വയം ഭരണ സ്ഥാപനങ്ങള്‍. സംഘാടകര്‍ ആവശ്യപ്പെടുന്ന മുറക്ക് പണം നല്‍കാമെന്ന ഉത്തരവ് അംഗീകരിക്കാനാവില്ലെന്നാണ് യുഡിഎഫ് ഭരണസമിതികളുടെ നിലപാട്. ബജറ്റ് വിഹിതം പോലും കിട്ടാതെ പാടു പെടുന്ന തദ്ദേശ സ്വയംഭരണ സ്ഥാപനങ്ങളെ ഉത്തരവ് കൂടുതല്‍ പ്രതിസന്ധിയിലാക്കുമെന്നാണ് ആശങ്ക.

നേപ്പാളിൽ വെള്ളിയാഴ്ച ഭൂകന്പമുണ്ടായ സ്ഥലങ്ങളിലെ രക്ഷാപ്രവർത്തനം തുടരുന്നു. രക്ഷാപ്രവർത്തനം വൈകാതെ പൂർത്തിയാകും എന്ന് സർക്കാർ അറിയിച്ചു. നേപ്പാൾ പ്രധാനമന്ത്രി പുഷ്പ കുമാർ ദഹലിൻറെ അദ്ധ്യക്ഷതയിൽ മന്ത്രിസഭ ചേർന്ന് മരിച്ചവരുടെ കുടുംബങ്ങൾക്ക് ധനസഹായം പ്രഖ്യാപിച്ചു. 160 പേരാണ് ഭൂകമ്പത്തിൽ മരിച്ചത്. വീടു നഷ്ടപ്പെട്ടവർക്കായി ദുരിതാശ്വാസ കേന്ദ്രങ്ങൾ എല്ലായിടത്തും തുടങ്ങാൻ സർക്കാരിന് ഇതുവരെ ആയിട്ടില്ല. 

സംസ്ഥാനത്തെ നൈറ്റ് ലൈഫ് കേന്ദ്രങ്ങളിലെ അനിഷ്ട സംഭവങ്ങൾ ചർച്ചയാവുന്നതിനിടെ എറണാകുളം തൃക്കാക്കരയിൽ രാത്രി നിയന്ത്രണത്തിനൊരുങ്ങി നഗരസഭ. ഹോട്ടലുകളും വ്യാപാര സ്ഥാപനങ്ങളും രാത്രി 11 മണി മുതൽ പുലർച്ചെ നാല് മണി വരെ അടപ്പിക്കാനാണ് തീരുമാനം. ലഹരി മരുന്ന് വിൽപന വർധിക്കുന്ന സാഹചര്യത്തിലാണ് പുതിയ നടപടി

മാനവീയത്ത് നൈറ്റ് ലൈഫിനിടെയുണ്ടായ സംഘര്‍ഷത്തിൽ കൂടുതൽ പ്രതികളെ പൊലീസ് തിരിച്ചറിഞ്ഞു. ഇന്നലെ അറസ്റ്റിലായ പ്രതികളിൽ ഒരാളായ ശിവയിൽ നിന്നാണ് പൊലീസിന് വിവരം ലഭിച്ചത്. മദ്യ ലഹരിയിലായിരുന്ന പ്രതികള്‍ മറ്റുള്ളവരെ കയ്യേറ്റം ചെയ്യുകയായിരുന്നെന്ന് പൊലീസ് പറഞ്ഞു. പൂന്തുറ സ്വദേശിയെ ആക്രമിച്ചതും മറ്റൊരു യുവാവിനെ നിലത്തിട്ട് ആക്രമിച്ചതും ഒരേ പ്രതികളാണെന്നാണ് പൊലീസ് പറയുന്നത്. അതേസമയം ഇന്നലെ തല്ല് കൊണ്ട ദൃശ്യങ്ങളിലുള്ള വ്യക്തിയെ ഇതുവരെ തിരിച്ചറിയാനായിട്ടില്ല. പ്രതികള്‍ക്കെതിരെ ജാമ്യം ലഭിക്കാവുന്ന വകുപ്പുകള്‍ പ്രകാരമാണ് കേസ് എടുത്തിരിക്കുന്നത്. മറ്റ് പ്രതികള്‍ക്കായി പൊലീസ് തിരച്ചിൽ ഊര്‍ജിതമാക്കിയിട്ടുണ്ട്. 

കളമശ്ശേരി സ്ഫോടനക്കേസിലെ പ്രതി ഡൊമനിക് മാർട്ടിനെ കസ്റ്റഡിയിൽ ആവശ്യപ്പെട്ട് പൊലീസ് നൽകിയ ഹർജി എറണാകുളം ജില്ലാ സെഷൻസ് കോടതി ഇന്ന് പരിഗണിക്കും. 10 ദിവസം പ്രതിയെ കസ്റ്റഡിയിൽ ആവശ്യപ്പെട്ടാണ് പൊലീസ് ഹർജി നൽകിയത്. കേസിൽ കൂടുതൽ പ്രതികൾ ഉൾപ്പെട്ടിട്ടുണ്ടോ എന്നതടക്കമുള്ള വിവരങ്ങൾ തേടാൻ പ്രതിയെ കസ്റ്റഡിയിലെടുത്ത് വിശദമായി ചോദ്യം ചെയ്യേണ്ടതുണ്ടെന്നാണ് പൊലീ്സ് വ്യക്തമാക്കുന്നത്. ഈമാസം 30 വരെയാണ് പ്രതിയെ കോടതി റിമാൻഡ് ചെയ്തത്

വായു മലിനീകരണം ഗുരുതരമാകുന്ന സാഹചര്യത്തിൽ ദില്ലിയിൽ നിയന്ത്രണങ്ങൾ കടുപ്പിച്ചു. ട്രക്കുകൾക്ക് നഗര പരിധിയിൽ പ്രവേശനമില്ല. അവശ്യ സാധനങ്ങളുമായി വരുന്ന ട്രക്കുകൾക്ക് ഇളവുണ്ട്. ഡീസൽ ഭാരവാഹനങ്ങൾക്കും നിയന്ത്രണമുണ്ട്. പ്രൈമറി സ്കൂളുകൾക്ക് വെള്ളിയാഴ്ച വരെ അവധി നീട്ടിയപ്പോൾ പ്ലസ് ടു വരെയുള്ള ക്ലാസുകൾ ഓൺ ലൈനിലേക്ക് മാറ്റി. സർക്കാർ ,സ്വകാര്യ ഓഫീസുകളിൽ ഹാജർ 50 ശതമാനമായി ചുരുക്കും. അല്ലാത്തവർക്ക് വർക്ക് ഫ്രം ഹോം നടപ്പാക്കുമെന്നും സർക്കാർ വ്യക്തമാക്കി
 

ഇടുക്കി ശാന്തൻപാറക്കു സമീപം പോത്തൊട്ടിയിൽ ഉരുൾപൊട്ടി. പേത്തൊട്ടി തോടിനു കുറുകെയുണ്ടായിരുന്ന പാലത്തിനു മുകളിലൂടെ വെളളം കഴിഞ്ഞൊഴുകി. തോടിനു സമീപത്ത് താമസിച്ചിരുന്ന ആറു വീടുകളിലെ താമസക്കാരെ ബന്ധു വീടുകളിലേക്കും ശാന്തൻപാറ പഞ്ചായത്ത് കമ്മ്യൂണിറ്റി ഹാളിലേക്കും മാറ്റി. പേത്തൊട്ടി സ്വദേശി മിനിയുടെ വീട്ടിനുള്ളിലേക്കാണ് ആദ്യം വെള്ളമെത്തിയത്. ഇവരുടെ വീട്ടുമുറ്റത്തുണ്ടായിരുന്ന ഇരുചക്ര വാഹനവും ഒഴുക്കിൽപെട്ടു. ശാന്തൻപാറ പഞ്ചായത്ത് പ്രസിഡൻറിൻറെ നേതൃത്വത്തിൽ നാട്ടുകാരും പോലീസും ഫയർ ഫോഴ്സും ചേർന്നാണ് ആളുകളെ സുരക്ഷിത സ്ഥാനത്തേക്ക് മാറ്റിയത്. ഉടുമ്പൻചോല ശാന്തൻപാറ റോഡിൽ മരം വീണ് ഗതാഗതം തടസ്സപ്പെട്ടു. ഫയർഫോഴ്സും റവന്യൂ ഉദ്യോഗസ്ഥരും ചേർന്ന് മരം മുറിച്ചു മാറ്റി. ഇടിഞ്ഞു വീണ മണ്ണും നീക്കം ചെയ്ത ശേഷം ഗതാഗതം പുനസ്ഥാപിച്ചു 

സംസ്ഥാനത്ത് മഴ ജാഗ്രത തുടരുന്നു. ഇന്നും അതിശക്തമായ മഴയ്ക്ക് സാധ്യതയുണ്ട്. 11 ജില്ലകളിൽ ഇന്ന് മഴ മുന്നറിയിപ്പ് ഉണ്ട്. എറണാകുളം, പാലക്കാട് ജില്ലകളിൽ ഇന്ന് ഓറഞ്ച് അലർട്ടാണ്. കോഴിക്കോട്, കണ്ണൂർ, കാസർകോഡ് ഒഴികെയുള്ള മറ്റ് ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്. ചിലയിടങ്ങളിൽ ഇന്ന് ഇടിയോട് കൂടിയ മഴ കിട്ടും. വടക്കൻ തമിഴ്നാട് തീരത്തായുള്ള ചക്രവാതച്ചുഴി ബുധനാഴ്ചയോടെ അറബിക്കടലിൽ ന്യൂനമർദ്ദമായി മാറിയേക്കും. ഈ ദിവസങ്ങളിൽ കേരളത്തിന് കുറുകെ സഞ്ചരിച്ചാകും ഈ ചക്രവാതച്ചുഴി അറബിക്കടലിലേക്ക് കടക്കുക. ബംഗാൾ ഉൾക്കടലിൽ നിന്നുള്ള കാറ്റും മഴയ്ക്ക് അനുകൂലമാണ്. ഇതിന്റെ സ്വാധീനഫലമായി അടുത്ത ദിവസങ്ങളിലും മഴ കനത്തേക്കും

ലോകകപ്പിൽ ദക്ഷിണാഫ്രിക്കയെയും തകർത്ത് ഇന്ത്യൻ ജൈത്രയാത്ര. 243 റൺസിനാണ് ഇന്ത്യയുടെ തുടർ‍ച്ചയായ എട്ടാം ജയം. ഇന്ത്യയുടെ
326 റൺസ് പിന്തുടർന്ന ദക്ഷിണാഫ്രിക്ക വെറും 83ന് പുറത്തായി. മുപ്പത്തിയഞ്ചാം പിറന്നാൾ ദിനത്തിൽ നാൽപ്പത്തിയൊൻപതാം സെഞ്ച്വറി നേടിയ വിരാട് കോലിയാണ് കളിയിലെ താരം.സെഞ്ച്വറി നേട്ടത്തിൽ സച്ചിനൊപ്പമെത്തി കോലി. ശ്രീലങ്ക ഇന്ന് ബംഗ്ലാദേശിനെതിരെ

ഇലക്ട്രൽ ബോണ്ടുകൾ ഇന്നു മുതൽ വീണ്ടും വിതരണം ചെയ്യും. ബോണ്ടിനെതിരെയുള്ള കേസിൽ സുപ്രീംകോടതി ഭരണഘടന ബഞ്ചിൻറെ വിധി വരാനിരിക്കെയാണ് സർക്കാർ നടപടി. ഈ മാസം ഇരുപത് വരെയാകും ബോണ്ടുകൾ എസ്ബിഐ വഴി വിതരണം ചെയ്യുക. കോടതി വിധിക്ക് മുമ്പ് പരമാവധി സംഭാവന ഉറപ്പാക്കാനാണ് സർക്കാർ നീക്കമെന്ന് പ്രതിപക്ഷം കുറ്റപ്പെടുത്തി. കഴിഞ്ഞ മാസവും പത്തു ദിവസം ഇലക്ടറൽ ബോണ്ട് വിതരണം ചെയ്തിരുന്നു. വിഷയം ഹർജിക്കാർ സുപ്രീംകോടതിയുടെ ശ്രദ്ധയിൽപെടുത്തിയേക്കും. 

വാശിയേറിയ ആദ്യ ഘട്ട തെരഞ്ഞെടുപ്പിനായുള്ള പ്രചാരണത്തിന് പിന്നാലെ ഛത്തീസ്ഗഡിലെ ഇരുപത് മണ്ഡലങ്ങളിൽ ഇന്ന് നിശബ്ദ പ്രചാരണം. മുൻ മുഖ്യമന്ത്രിയും മുതിർന്ന ബിജെപി നേതാവുമായ രമൺസിങ്ങിൻ്റെ മണ്ഡലമായ രാജ്നന്ദ് ഗാവിലും ചൊവ്വാഴ്ച്ചയാണ് വോട്ടെടുപ്പ്. മാവോയിസ്റ്റ് ഭീഷണിയുള്ള മേഖലകൾ അടങ്ങുന്ന സീറ്റുകളിലാണ് സംസ്ഥാനത്ത് ഒന്നാം ഘട്ട തെരഞ്ഞെടുപ്പ് നടക്കുന്നത്. ഇതു കണക്കിലെടുത്ത് വലിയ സുരക്ഷയാണ് ഒരുക്കിയിരിക്കുന്നത്. ബസ്തർ അടക്കം മേഖലകളിൽ വോട്ടെടുപ്പിന് കനത്ത സുരക്ഷയാണ് ഒരുക്കിയിരിക്കുന്നത്.

പാർട്ടി വിലക്ക് ലംഘിച്ചു റാലി നടത്തിയ  ആര്യാടൻ ഷൌക്കത്തിനെ കെപിസിസി അച്ചടക്ക സമിതി ഇന്ന് നേരിട്ട് വിളിപ്പിച്ചു തെളിവെടുക്കും. അഞ്ചു മണിക്കാണ് തിരുവഞ്ചൂർ രാധാകൃഷ്ണൻ അധ്യക്ഷൻ ആയ സമിതി യോഗം ചേരുന്നത്. നേരിട്ടത്തി സമിതിക്ക് മുന്നിൽ ഷൗക്കത്ത് വിശദീകരണം നൽകും. പലസ്തീൻ ഐക്യ ദാർഢ്യ പരിപാടി നടത്തിയത് പാർട്ടി വിരുദ്ധ പ്രവർത്തനം അല്ലെന്നു ഷൌക്കത്ത്‌ വിശദീകരിക്കും. എന്നാൽ മുന്നറിയിപ്പ് ലംഘിച്ച ഷൌക്കത്തിനെതീരെ നടപടിക്ക് ആണ് സാധ്യത
 

ആരാധനാലയങ്ങളിൽ അസമയത്ത് വെടിക്കെട്ടിന് നിരോധനമേർപ്പെടുത്തിയ ഹൈക്കോടതി വിധിക്കെതിരെ അപ്പീൽ നൽകാനൊരുങ്ങി മരട് കൊട്ടാരം ക്ഷേത്രം ദേവസ്വം. ബന്ധപ്പെട്ട കക്ഷികളെ കേള്‍ക്കാതെയാണ് ഹൈക്കോടതി പരാമർശമെന്ന് ഭാരവാഹികള്‍ പറഞ്ഞു. 2015 ൽ മരട് ക്ഷേത്രത്തിലെ വെടിക്കെട്ടിനെതിരെ പരിസരവാസികള്‍ നൽകിയ ഹർജിയിലാണ് ക്ഷേത്രങ്ങളിൽ അസമയത്ത് നടക്കുന്ന വെടിക്കെട്ട് ഹൈക്കോടതി നിരോധിച്ചത്.
 

കണ്ണൂർ സർവകലാശാലയിൽ അസോസിയേറ്റ് പ്രൊഫസർ തസ്തികയിലേക്ക് പ്രിയ വർഗീസിൻറെ നിയമനം ശരിവച്ച ഹൈക്കോടതി വിധിക്കെതിരായ അപ്പീൽ സുപ്രീം കോടതി ഇന്ന് പരിഗണിക്കും. ജസ്റ്റിസുമാരായ ജെകെ മഹേശ്വരി, കെവി വിശ്വനാഥൻ എന്നിവർ ഉൾപ്പെട്ട ബഞ്ചാണ് കേസ് പരിഗണിക്കുക. കേസിൽ സത്യവാങ്മൂലം സമർപ്പിക്കാൻ പ്രിയ വർഗീസിന് നാല് ആഴ്ച്ച കോടതി സമയം നൽകിയിരുന്നു. നേരത്തെ കേസ് പരിഗണിക്കവേ നിയമനം ശരിവച്ച ഹൈക്കോടതി വിധിയിൽ പിഴവുണ്ടെന്ന് സുപ്രീംകോടതി നിരീക്ഷിച്ചിരുന്നു

കേരളവര്‍മ്മ കോളേജിലെ തെരഞ്ഞെടുപ്പ് വിവാദത്തില്‍ സമരമേറ്റെടുത്ത് കോണ്‍ഗ്രസ്. ജനാധിപത്യം അട്ടിമറിച്ച മന്ത്രി ആര്‍. ബിന്ദു രാജിവയ്ക്കുക, കേരള വര്‍മ്മയില്‍ വീണ്ടും തെരഞ്ഞെടുപ്പ് നടത്തുക തുടങ്ങിയ ആവശ്യങ്ങളുന്നയിച്ച് ഡിസിസിയുടെ നേതൃത്വത്തില്‍ ഇന്ന് രാവിലെ കോളെജിലേക്ക് മാര്‍ച്ച് നടത്തും. കോൺഗ്രസ് വർക്കിംഗ് കമ്മിറ്റിയംഗവും കെപിസിസി വർക്കിംഗ് പ്രസിഡണ്ടുമായ കൊടിക്കുന്നിൽ സുരേഷ് എംപി മാർച്ച് ഉദ്ഘാടനം ചെയ്യും. വീണ്ടും തെരഞ്ഞെടുപ്പ് ആവശ്യപ്പെട്ട് കെഎസ് യു സംസ്ഥാന അധ്യക്ഷന്‍ അലോഷ്യസ് സേവ്യര്‍ നടത്തുന്ന നിരാഹാര സമരം അഞ്ചാം ദിവസവും തുടരുകയാണ്.

കേരളവർമ കോളേജ് യൂണിയൻ തെരഞ്ഞടുപ്പ് വീണ്ടും നടത്തണമെന്നാവശ്യപ്പെട്ട് റീ കൗണ്ടിംഗിൽ പരാജയപ്പെട്ട കെ.എസ്.യു സ്ഥാനാർത്ഥി ശ്രീകുട്ടൻ നൽകിയ ഹർജി ഹൈക്കോടതി ഇന്ന് പരിഗണിക്കും. മാനദണ്ഡങ്ങൾ പാലിച്ചല്ല റീ കൗണ്ടിംഗ് നടത്തിയതെന്നും എസ്.എഫ് ഐ സ്ഥാനാർത്ഥിയുടെ വിജയം അട്ടിമറിയിലൂടെയാണെന്നും ഹർജിയിൽ പറയുന്നു. റീ കൗണ്ടിംഗ് സമയത്ത് രണ്ട് തവണ വൈദ്യുതി നിലച്ചത് തെരഞ്ഞെടുപ്പ് അട്ടിമറിക്കനാണെന്ന് സംശയിക്കുന്നതായും ഹർജിയിൽ ആരോപിക്കുന്നുണ്ട്. ആദ്യ ഫലം പുറത്ത് വന്നപ്പോൾ കെ.എസ്.യു സ്ഥാനാർത്ഥിയ്ക്ക് 896, എസ്.എഫ്.ഐ സ്ഥാനാർത്ഥിയക്ക് 895 എന്നതായിരുന്നു വോട്ടിങ് നില. എന്നാൽ റീ കൗണ്ടിംഗ് നടന്നപ്പോൾ 11 വോട്ടിന് എസ്.എഫ്ഐ വിജയിക്കുകയായിരുന്നു