ആലപ്പുഴ മെഡിക്കൽ കോളേജിലാണ് ജനങ്ങൾ ഏറെ പ്രയാസം അനുഭവിക്കുന്നത്. അതുകൊണ്ട് മെഡിക്കൽ സൗകര്യങ്ങൾ കുറവുള്ള ആലപ്പുഴ ജില്ലയാണ് എയിംസ് വരേണ്ടതെന്ന് രമേശ് ചെന്നിത്തല.
ആലപ്പുഴ: കേരളത്തിൽ എയിംസ് ആലപ്പുഴയിലാണ് വരേണ്ടതെന്ന് രമേശ് ചെന്നിത്തല. മെഡിക്കൽ സൗകര്യങ്ങൾ കുറവുള്ള ജില്ലയാണ് ആലപ്പുഴ. ആലപ്പുഴ മെഡിക്കൽ കോളേജിലാണ് ജനങ്ങൾ ഏറെ പ്രയാസം അനുഭവിക്കുന്നത്. അതുകൊണ്ടുതന്നെ എയിംസ് വരേണ്ടത് ഇവിടെയാണെന്നും രമേശ് ചെന്നിത്തല പറഞ്ഞു. ആലപ്പുഴയിൽ മൂന്നോ നാലോ സ്ഥലങ്ങളിൽ സർക്കാർ ഭൂമി തന്നെയുണ്ട്. ഹരിപ്പാട് 25 ഏക്കർ സ്ഥലമുണ്ടെന്നും അദ്ദേഹം പറഞ്ഞു.
അതേസമയം, ആഗോള അയ്യപ്പ സംഗമം സമ്പൂർണ്ണ പരാജയമാണെന്ന് ചെന്നിത്തല പറഞ്ഞു. 51 രാജ്യങ്ങളിൽ നിന്ന് ആളുകൾ എത്തുമെന്നാണ് പറഞ്ഞത്. ഇരുമുടി കെട്ടുമായി എത്തിയ ഭക്തരുടെ പേരാണ് എഴുതി വെച്ചത്. തിരഞ്ഞെടുപ്പിന് വോട്ട് തട്ടാനുള്ള കാപട്യം നിറഞ്ഞ ശ്രമം മാത്രമാണിതെന്നും അദ്ദേഹം പറഞ്ഞു.
എയിംസ് ആലപ്പുഴയിൽ കൊണ്ടുവരുമെന്ന് സുരേഷ് ഗോപി
കേരളത്തിൽ എയിംസ് ആലപ്പുഴയിൽ കൊണ്ട് വരുമെന്ന് ആവർത്തിച്ച് കേന്ദ്രമന്ത്രി സുരേഷ് ഗോപി. തൃശൂർ അവിണിശ്ശേരി പഞ്ചായത്തിൽ സംഘടിപ്പിച്ച കലുങ്ക് സദസ്സിലാണ് പ്രതികരണം. കേരളത്തിൽ എയിംസ് വരുമെന്ന് കേന്ദ്രമന്ത്രി തന്നെ ഉറപ്പുനൽകിയിട്ടുണ്ട്, ആലപ്പുഴയ്ക്ക് വികസനത്തിന്റെ യോഗ്യത നേടി കൊടുക്കേണ്ടതുണ്ട്. രാഷ്ട്രീയ ഉദ്ദേശത്തോടെ ചിലർ അത് ചെയ്യില്ലെന്ന് നിശ്ചയിച്ചാൽ കേരളത്തിൽ നിന്നുള്ള ആദ്യത്തെ ബിജെപി എംപി എന്ന നിലയിൽ തൃശ്ശൂരിൽ എയിംസ് കൊണ്ട് വരുമെന്നും സുരേഷ് ഗോപി പറഞ്ഞു.
Related Articles
