മദ്യപിക്കില്ലെന്നത് ജിവിതനിഷ്ഠ; ദുഷ്പ്രചാരണത്തിനെതിരെ പരാതി നല്കും; വീഡിയോ പ്രചാരണത്തിന് ടി സിദ്ധിഖിന്റെ മറുപടി
മദ്യപാനിയാണെന്ന് വീഡിയോ പ്രചരിപ്പിച്ചവര്ക്ക് തെളിയിക്കാന് സാധിക്കുമോയെന്ന് ടി സിദ്ധിഖ്. കുടുംബവും സുഹൃത്തുക്കളുമൊന്നിച്ചുള്ള മരുഭൂമി യാത്രയുടെ വീഡിയോ ദൃശ്യങ്ങള് ഉപയോഗിച്ചുള്ള ദുഷ്പ്രചാരണങ്ങള്ക്ക് മറുപടി
ദുബായ്: കുടുംബവും സുഹൃത്തുക്കളുമൊന്നിച്ചുള്ള മരുഭൂമി യാത്രയുടെ വീഡിയോ ദൃശ്യങ്ങള് ഉപയോഗിച്ചുള്ള ദുഷ്പ്രചാരണങ്ങള്ക്ക് മറുപടിയുമായി ടി സിദ്ധിഖ്. വിവിധ സംഘടനകളുടെ പരിപാടികള്ക്കായി ദുബായില് എത്തിയതായിരുന്നു ടി സിദ്ധിഖ്.
ഇങ്ങനെ ഒരു വിശദീകരണം നല്കേണ്ടി വന്ന സാഹചര്യത്തേക്കുറിച്ച് ആലോചിക്കുമ്പോള് ചിരിയാണ് തോന്നുന്നത്. കഴിഞ്ഞ 20ാം തിയതിയാണ് ദുബായിലെത്തുന്നത്. കോഴിക്കോട് ജില്ലാ ഇന്കാസ് കമ്മിറ്റിയുടേത് ഉള്പ്പെടെ നിരവധി പരിപാടികള്ക്ക് വേണ്ടിയായിരുന്നു സന്ദര്ശനം. മദ്യപാനിയാക്കി കാണിക്കാനുള്ള കമ്യൂണിസ്റ്റ് സഹപ്രവര്ത്തകരുടെ ശ്രമങ്ങളെ തള്ളിക്കളയുന്നു. അത്തരം ശ്രമങ്ങള്ക്ക് വശപ്പെട്ട് പോവില്ല.
കുടുംബം തനിക്ക് മുന്നേ ദുബായില് എത്തിയിരുന്നു. അവരുമൊത്തുള്ള ചില നിമിഷങ്ങള് ഉപയോഗിച്ച് ഇങ്ങനെ വ്യാജ പ്രചാരണത്തിനെതിരെ പൊലീസില് പരാതി നല്കുമെന്നും ടി സിദ്ധിഖ് വീഡിയോയില് പറയുന്നു. മദ്യപാനിയാണെന്ന് വീഡിയോ പ്രചരിപ്പിച്ചവര്ക്ക് തെളിയിക്കാന് സാധിക്കുമോയെന്നും ടി സിദ്ധിഖ് ചോദിക്കുന്നു. ഒരിക്കലും മദ്യപിക്കാത്തവരെ പോലും മദ്യപാനി ആക്കാനും , മോശക്കാർ ആക്കാനും സി പി ഐ എം തുനിഞ്ഞിറങ്ങിയാൽ അതിനു വഴങ്ങാൻ എന്നെ കിട്ടില്ല സഘാക്കളെയെന്ന കുറിപ്പോടെയാണ് ടി സിദ്ധിഖ് വീഡിയോ പങ്കുവച്ചിരിക്കുന്നത്.