സുന്നികളെ അങ്ങേയറ്റം അവഹേളിക്കുന്നതും വേദനിപ്പിക്കുന്നതുമാണ് പുനഃസംഘടന ഉത്തരവ് എന്നാണ് സിറാജ് പത്രത്തിന്റെ എഡിറ്റോറിയലിൽ വിമർശിക്കുന്നത്. വഖഫ് ബോർഡിലും ഹജ് കമ്മിറ്റിയിലും അർഹമായ പ്രാതിനിധ്യം മുഖ്യമന്ത്രി ഉറപ്പ് നൽകിയിരുന്നു. പുതിയ ബോർഡ് പരിശോധിച്ചാൽ സർക്കാരിൻ്റെ കപട മുഖം വ്യക്തമാകുമെന്നും വിമര്‍ശനം.
തിരുവനന്തപുരം: വഖഫ് ബോർഡ് പുനഃസംഘടനയിൽ സർക്കാരിനെതിരെ രൂക്ഷ വിമർശനവുമായി കാന്തപുരം വിഭാഗം സമസ്തയുടെ മുഖപത്രം സിറാജ്. സുന്നികളെ അങ്ങേയറ്റം അവഹേളിക്കുന്നതും വേദനിപ്പിക്കുന്നതുമാണ് പുനഃസംഘടന ഉത്തരവെന്നാണ് സിറാജ് പത്രത്തിന്റെ എഡിറ്റോറിയലിൽ വിമർശിക്കുന്നത്.
വഖഫ് ബോർഡിലും ഹജ് കമ്മിറ്റിയിലും അർഹമായ പ്രാതിനിധ്യം മുഖ്യമന്ത്രി ഉറപ്പ് നൽകിയിരുന്നു. പുതിയ ബോർഡ് പരിശോധിച്ചാൽ സർക്കാരിൻ്റെ കപട മുഖം വ്യക്തമാകും. ഒരു ശതമാനം പോലും വഖഫ് സ്വത്തുകൾ കൈകാര്യം ചെയ്യാൻ അർഹതയില്ലാത്ത ജമാഅത്തെ ഇസ്ലാമിക്കും മുജാഹിദിനും അംഗത്വം നൽകി. തീവ്ര താത്പര്യക്കാരുടെ കൈകളിൽ സ്വത്തുക്കൾ ഏൽപ്പിക്കുന്നതിന്റെ ഉദ്ദേശ്യമെന്താണെന്നും എഡിറ്റോറിയലിൽ ചോദിക്കുന്നു. നിയമപരമായ വഴിയിലൂടെയും, ജനകീയ സമരത്തിലൂടെയും അനീതിക്കെതിരെ സുന്നികൾ പോരാടും. രാഷ്ട്രീയപ്പാർട്ടിയുടെ താല്പര്യം സംരക്ഷിക്കാനുള്ളതല്ല വഖഫ് ബോർഡ് എന്നും എഡിറ്റോറിയൽ പറയുന്നു.
പുനഃസംഘടനയ്ക്ക് സ്റ്റേ ഇല്ല
അതേസമയം, വഖഫ് ബോർഡ് പുനസംഘടിപ്പിച്ച സംസ്ഥാന സർക്കാരിന്റെ ഉത്തരവ് സ്റ്റേ ചെയ്യണം എന്ന മുൻ ചെയർമാൻ കെ എസ് ഹംസയുടെ ആവശ്യം ഹൈക്കോടതി ഇന്നലെ നിരസിച്ചിരുന്നു. വഖഫ് ബോർഡ് അംഗങ്ങളെ നിയോഗിക്കാനുള്ള അവകാശം സർക്കാരിനാണ്. അതുപോലെ പിരിച്ചുവിടാനും സർക്കാരിന് അവകാശം ഉണ്ടെന്നാണ്, ഹർജി പരിഗണിച്ച കോടതി വിലയിരുത്തിയത്. കേസ് ഡിവിഷൻ ബെഞ്ചിന്റെ പരിഗണിക്കായി മാറ്റി. ഡിവിഷൻ ബഞ്ചിന്റെ വിധിക്ക് വിധേയമായിരിക്കും സർക്കാർ തീരുമാനമെന്ന് ഹൈക്കോടതി വ്യക്തമാക്കി. ബോർഡ് പുനസംഘടിപ്പിക്കാൻ ഡിവിഷൻ ബെഞ്ച് ഉത്തരവിട്ടില്ലെന്നായിരുന്നു ഹംസയുടെ വാദം. ബോർഡിലെ ഒഴിവു നികത്താനും പ്രതിനിധ്യം ഉറപ്പാക്കാനുമായിരുന്നു കോടതി നിർദ്ദേശം. എന്നാൽ ഇതിന്റെ മറവിൽ, വഖഫ് ബോർഡ് തന്നെ പുനസംഘടിപ്പിച്ചു എന്ന് ഹംസ വാദിച്ചു. എന്നാൽ കഴിഞ്ഞ സർക്കാർ നിയോഗിച്ച വെഖഫ് ബോർഡിൽ ബോറ വിഭാഗത്തിന് പ്രാതിനിത്യം ഇല്ല എന്നും അവരെ ഉൾപ്പെടെ പരിഗണിച്ചാണ് പുതിയ ബോർഡ് എന്നും സർക്കാർ കോടതിയെ അറിയിച്ചു. പ്രത്യേക സിറ്റിംഗ് നടത്തിയാണ് കോടതി ഹർജി പരിഗണിച്ചത്.
Related Articles
