സൂര്യപ്രകാശത്തിലെ ഹാനികരമായ അൾട്രാവയലറ്റ് രശ്മികൾ ചർമ്മത്തിന് ഏൽപ്പിക്കുന്ന ആഘാതം ചെറുതല്ല. ഈ പ്രശ്നത്തിന് പരിഹാരമായി നാം ഇന്ന് വ്യാപകമായി ഉപയോഗിക്കുന്ന ഒന്നാണ് സൺസ്ക്രീനുകൾ. എന്നാൽ വിപണിയിൽ ലഭ്യമായ നൂറുകണക്കിന് ബ്രാൻഡുകളിൽ…
വേനൽക്കാലമായാലും മഴക്കാലമായാലും ചർമ്മസംരക്ഷണ ചർച്ചകളിൽ ഇന്ന് മുൻപന്തിയിലുള്ള ഒന്നാണ് സൺസ്ക്രീനുകൾ. എന്നാൽ കടയിൽ പോയി കണ്ണിൽ കണ്ട ഒരു സൺസ്ക്രീൻ വാങ്ങി മുഖത്ത് തേച്ചാൽ അത് ഗുണത്തേക്കാളേറെ ദോഷം ചെയ്തേക്കാം. പലപ്പോഴും സൺസ്ക്രീൻ ലേബലിലെ വാക്കുകൾ കണ്ട് നമ്മൾ കുഴങ്ങാറുണ്ട്. ഒരു പ്രൊഫഷണൽ രീതിയിൽ എങ്ങനെ സൺസ്ക്രീൻ തിരഞ്ഞെടുക്കാം എന്നും അതിന്റെ സാങ്കേതിക വശങ്ങൾ എന്തൊക്കെയാണെന്നും പരിശോധിക്കാം.
എന്താണ് ഈ SPF? എത്ര അളവ് വേണം?
സൺസ്ക്രീൻ കുപ്പി കയ്യിലെടുത്താൽ ആദ്യം കണ്ണിൽപ്പെടുക SPF (സൺ പ്രൊട്ടക്ഷൻ ഫാക്ടർ) എന്ന എഴുത്തായിരിക്കും. സൂര്യപ്രകാശമേറ്റ് ചർമ്മം കരിവാളിക്കുന്നതും ചുവന്ന് തടിക്കുന്നതും തടയാനാണ് SPF സഹായിക്കുന്നത്. എന്നാൽ SPF കൂടുന്തോറും സംരക്ഷണം ഇരട്ടിയാകുമെന്ന് പലരും തെറ്റായി ധരിച്ചിട്ടുണ്ട്.
യഥാർത്ഥത്തിൽ, SPF 15 ഏകദേശം 93 ശതമാനം സംരക്ഷണം നൽകുമ്പോൾ, SPF 30 നൽകുന്നത് 97 ശതമാനമാണ്. SPF 50 ആകട്ടെ 98 ശതമാനം സംരക്ഷണവും നൽകുന്നു. കേരളത്തിലെ കഠിനമായ വെയിലത്ത് ജോലി ചെയ്യുന്നവർക്കോ യാത്ര ചെയ്യുന്നവർക്കോ SPF 30 അല്ലെങ്കിൽ 50 ഉള്ള സൺസ്ക്രീനുകളാണ് ഏറ്റവും അനുയോജ്യം. SPF 100 എന്നത് ഒരിക്കലും 100 ശതമാനം സംരക്ഷണം നൽകുന്നില്ല എന്ന യാഥാർത്ഥ്യം കൂടി ഉപഭോക്താക്കൾ തിരിച്ചറിയണം.
Related Articles
പിഎ റേറ്റിംഗും പ്ലസ് ചിഹ്നങ്ങളും
SPF പോലെ തന്നെ പ്രധാനമാണ് പിഎ റേറ്റിംഗ് (PA Rating). ചർമ്മത്തിൽ ചുളിവുകൾ വീഴ്ത്തുന്നതും പ്രായക്കൂടുതൽ തോന്നിക്കുന്നതുമായ യുവിഎ (UVA) രശ്മികളിൽ നിന്നുള്ള സംരക്ഷണമാണിത്. പിഎ റേറ്റിംഗിന് അടുത്തുള്ള പ്ലസ് (+) ചിഹ്നങ്ങളുടെ എണ്ണം നോക്കി വേണം ഇത് തിരഞ്ഞെടുക്കാൻ. പ്ലസ് ചിഹ്നങ്ങളുടെ എണ്ണം കൂടുന്തോറും സംരക്ഷണവും കൂടും. എപ്പോഴും PA+++ അല്ലെങ്കിൽ PA++++ റേറ്റിംഗ് ഉള്ള സൺസ്ക്രീനുകൾ തിരഞ്ഞെടുക്കാൻ ശ്രമിക്കുക. ഇത് ചർമ്മത്തിന്റെ യുവത്വം നിലനിർത്താൻ സഹായിക്കും.
ചർമ്മത്തിന്റെ സ്വഭാവം തിരിച്ചറിയാം
ഓരോരുത്തരുടെയും ചർമ്മം വ്യത്യസ്തമാണ്. അതുകൊണ്ട് തന്നെ സ്കിൻ ടൈപ്പ് നോക്കി വേണം സൺസ്ക്രീൻ വാങ്ങാൻ. എണ്ണമയമുള്ള ചർമ്മമുള്ളവർ 'ഓയിൽ ഫ്രീ' അല്ലെങ്കിൽ 'നോൺ-കോമെഡോജെനിക്' എന്ന് എഴുതിയ സൺസ്ക്രീനുകൾ മാത്രം വാങ്ങുക. ഇത് ചർമ്മത്തിലെ സുഷിരങ്ങൾ അടയുന്നത് തടയുകയും മുഖക്കുരു വരാനുള്ള സാധ്യത കുറയ്ക്കുകയും ചെയ്യും.
അമിതമായി വിയർക്കുന്നവരോ നീന്താൻ പോകുന്നവരോ ആണെങ്കിൽ 'വാട്ടർ റെസിസ്റ്റന്റ്' സൺസ്ക്രീനുകൾ വേണം ഉപയോഗിക്കാൻ. സാധാരണയായി ഇത്തരം സൺസ്ക്രീനുകൾ 40 മുതൽ 80 മിനിറ്റ് വരെയാണ് ചർമ്മത്തിൽ ഫലപ്രദമായി നിലനിൽക്കുക.
ഫിസിക്കൽ വേഴ്സസ് കെമിക്കൽ സൺസ്ക്രീൻ
സൺസ്ക്രീനുകൾ പ്രധാനമായും രണ്ട് തരത്തിലുണ്ട്. ചർമ്മത്തിന് മുകളിൽ ഒരു കവചം തീർത്ത് സൂര്യപ്രകാശത്തെ പ്രതിഫലിപ്പിച്ചു വിടുന്നതാണ് ഫിസിക്കൽ സൺസ്ക്രീനുകൾ . സിങ്ക് ഓക്സൈഡ് അല്ലെങ്കിൽ ടൈറ്റാനിയം ഡയോക്സൈഡ് എന്നിവയാണ് ഇതിലെ പ്രധാന ചേരുവകൾ. ഇത് പുരട്ടിയ ഉടൻ തന്നെ വെയിലത്തിറങ്ങാം.
എന്നാൽ കെമിക്കൽ സൺസ്ക്രീനുകൾ ചർമ്മത്തിലേക്ക് ആഗിരണം ചെയ്യപ്പെടുകയും സൂര്യരശ്മികളെ ചൂടാക്കി മാറ്റി നിർവീര്യമാക്കുകയും ചെയ്യുന്നു. ഇത്തരം സൺസ്ക്രീനുകൾ പുരട്ടി കുറഞ്ഞത് 20 മിനിറ്റ് കഴിഞ്ഞു മാത്രമേ വെയിലത്തിറങ്ങാൻ പാടുള്ളൂ.
സൺസ്ക്രീൻ വാങ്ങുമ്പോഴും ഉപയോഗിക്കുമ്പോഴും ചില ഇംഗ്ലീഷ് പദങ്ങൾ നമ്മൾ അറിഞ്ഞിരിക്കണം..
യുവിഎ, യുവിബി രശ്മികളെ ഒരുപോലെ തടയുന്നതിനെ ബ്രോഡ് സ്പെക്ട്രം (Broad Spectrum) എന്നാണ് പറയുക. സൺസ്ക്രീൻ പുരട്ടിക്കഴിയുമ്പോൾ മുഖത്ത് കാണുന്ന വെള്ള നിറത്തെ വൈറ്റ് കാസ്റ്റ് എന്ന് വിളിക്കുന്നു. ഒട്ടിപ്പിടിക്കാത്ത സ്വഭാവമുള്ള സൺസ്ക്രീനുകളെ നോൺ-ഗ്രീസി എന്നും വിശേഷിപ്പിക്കാം.
ചർമ്മ വിദഗ്ദ്ധർ പരിശോധിച്ച് ഉറപ്പുവരുത്തിയ ഉൽപ്പന്നങ്ങളിൽ ഡെർമറ്റോളജിക്കലി ടെസ്റ്റഡ് എന്ന് രേഖപ്പെടുത്തിയിട്ടുണ്ടാകും. കൃത്രിമ ഗന്ധങ്ങൾ അലർജി ഉണ്ടാക്കാൻ സാധ്യതയുള്ളതിനാൽ അത്തരം പ്രശ്നമുള്ളവർ ഫ്രാഗ്രൻസ്-ഫ്രീ സൺസ്ക്രീനുകൾ തിരഞ്ഞെടുക്കാൻ ശ്രദ്ധിക്കണം.
മറക്കരുത് ഈ കാര്യങ്ങൾ
സൺസ്ക്രീൻ വാങ്ങുമ്പോൾ അതിന്റെ എക്സ്പയറി ഡേറ്റ് പരിശോധിക്കാൻ മറക്കരുത്. സാധാരണയായി രണ്ട് മുതൽ മൂന്ന് വർഷം വരെയാണ് സൺസ്ക്രീനുകളുടെ കാലാവധി. കാലാവധി കഴിഞ്ഞവ ഉപയോഗിക്കുന്നത് ചർമ്മത്തിൽ പൊള്ളലുണ്ടാക്കാൻ കാരണമാകും.
മുഖത്ത് വെള്ള പാടുകൾ വരുന്നത് ഇഷ്ടമല്ലാത്തവർക്ക് ചർമ്മത്തിന്റെ നിറമുള്ള 'ടിന്റഡ് സൺസ്ക്രീനുകൾ' ഉപയോഗിക്കാവുന്നതാണ്. രാവിലെ വീടിനുള്ളിൽ ഇരിക്കുമ്പോഴും സൺസ്ക്രീൻ പുരട്ടുന്നത് ചർമ്മത്തിന്റെ ആരോഗ്യം മെച്ചപ്പെടുത്തും. കാരണം ലാപ്ടോപ്പ്, മൊബൈൽ എന്നിവയിൽ നിന്നുള്ള നീല വെളിച്ചവും ചർമ്മത്തിന് ദോഷകരമാണ്.
