സമൂഹത്തിൽ പൊതുവായി നിലനിൽക്കുന്ന ധാരണ, ലൈംഗിക താൽപ്പര്യങ്ങൾ എല്ലാവർക്കും സ്ഥിരമായി ഉണ്ടാകണം എന്നതാണ്. ഇതിൽനിന്ന് വ്യത്യസ്തമായ അനുഭവം ഉണ്ടാകുമ്പോൾ പലർക്കും വലിയ മാനസിക സംഘർഷം ഉണ്ടാകാറുണ്ട്. ഇത്തരത്തിലുള്ള ധാരണകളെ..
ലൈംഗിക ന്യൂനപക്ഷങ്ങളെക്കുറിച്ചുള്ള സംവാദങ്ങൾ ഇന്ന് സോഷ്യൽ മീഡിയയിൽ സജീവമാണ്. ഈ ചർച്ചകളിൽ അടുത്തിടെ മുഴങ്ങിക്കേൾക്കുന്ന ഒരു വാക്കാണ് 'ഗ്രേസെക്ഷ്വാലിറ്റി'. എന്നാൽ ഇത് പുതിയൊരു ആശയമല്ല, 2000-ന്റെ തുടക്കം മുതൽ ഏസെക്ഷ്വാലിറ്റി സ്പെക്ട്രത്തിൽ ഈ പദം നിലവിലുണ്ട്. ലൈംഗികതയെക്കുറിച്ചുള്ള പരമ്പരാഗത കാഴ്ചപ്പാടുകൾക്ക് മാറ്റം വരുത്തിക്കൊണ്ട് 'ഗ്രേസെക്ഷ്വാലിറ്റി' എന്ന സ്വത്വം യുവതലമുറക്കിടയിൽ ചർച്ചയാവുകയാണ്. ജെൻ സി എന്ന് വിളിക്കപ്പെടുന്ന യുവതലമുറ ഈ വിഷയത്തെപ്പറ്റി ഇന്ന് കൂടുതൽ തുറന്നു സംസാരിക്കുന്നു. സമൂഹത്തിൽ പൊതുവായി നിലനിൽക്കുന്ന ധാരണ, ലൈംഗിക താൽപ്പര്യങ്ങൾ എല്ലാവർക്കും സ്ഥിരമായി ഉണ്ടാകണം എന്നതാണ്. ഇതിൽനിന്ന് വ്യത്യസ്തമായ അനുഭവം ഉണ്ടാകുമ്പോൾ പലർക്കും വലിയ മാനസിക സംഘർഷം ഉണ്ടാകാറുണ്ട്. ഇത്തരത്തിലുള്ള ധാരണകളെ മറ്റിമറിക്കുകയാണ് ജെൻ സി.
എന്താണ് ഗ്രേസെക്ഷ്വാലിറ്റി?
ഏസെക്ഷ്വാലിറ്റി അഥവാ ലൈംഗിക ആകർഷണം ഇല്ലാത്ത അവസ്ഥയ്ക്കും, അലോസെക്ഷ്വാലിറ്റി, അഥവാ പതിവായി ലൈംഗിക ആകർഷണം അനുഭവിക്കുന്ന അവസ്ഥയ്ക്കും ഇടയിലുള്ളതാണ് ഗ്രേസെക്ഷ്വാലിറ്റി. ഗ്രേസെക്ഷ്വൽ എന്ന് സ്വയം തിരിച്ചറിയുന്ന ആളുകൾക്ക് ലൈംഗിക ആകർഷണം വളരെ വിരളമായി മാത്രമോ, അല്ലെങ്കിൽ വളരെ കുറഞ്ഞ തീവ്രതയിൽ മാത്രമേ അനുഭവപ്പെടാറുള്ളൂ.
പ്രധാന പ്രത്യേകതകൾ:
Related Articles
- അപൂർവ ആകർഷണം: പല മാസങ്ങളോളം ലൈംഗിക താൽപര്യങ്ങളില്ലാതെ ഇരുന്നശേഷം, പെട്ടെന്ന് ചിലപ്പോൾ മാത്രം ആകർഷണം അനുഭവപ്പെടുക.
- തീവ്രതയില്ലായ്മ: ആകർഷണം തോന്നിയാൽ പോലും, അത് ലൈംഗിക ബന്ധത്തിലേക്ക് കടക്കാൻ പ്രേരിപ്പിക്കുന്നത്ര ശക്തമായിരിക്കില്ല.
- ചിലരുമായി മാത്രം: വൈകാരികമായി വളരെ അടുത്ത ബന്ധം സ്ഥാപിച്ച വ്യക്തികളോട് മാത്രം ആകർഷണം തോന്നുക (ഇതിൽ ഉൾപ്പെടുന്ന ഒരു ഉപവിഭാഗമാണ് ഡെമിസെക്ഷ്വാലിറ്റി).
ഗ്രേസെക്ഷ്വൽ ആയ ഒരാൾക്ക് ലൈംഗികബന്ധം ആസ്വദിക്കാൻ സാധിക്കും. എന്നാൽ അവർ ബന്ധത്തിൽ ഏർപ്പെടുന്നത് ലൈംഗിക ആകർഷണം കൊണ്ടല്ല, മറിച്ച് പങ്കാളിയോടുള്ള സ്നേഹമോ, വൈകാരിക ബന്ധം ദൃഢമാക്കാനോ വേണ്ടിയായിരിക്കും. ലൈംഗികത അവർക്ക് ഒരു മുൻഗണനാ വിഷയമായിരിക്കില്ല.
ചുരുക്കത്തിൽ, ഗ്രേസെക്ഷ്വാലിറ്റി എന്നത് ലൈംഗികതയെ കറുപ്പ്-വെളുപ്പ് എന്നപോലെ രണ്ടായി തിരിക്കാനാവില്ല, അതിനിടയിൽ ഒരുപാട് അനുഭവങ്ങളുണ്ട് എന്ന് തിരിച്ചറിയുന്ന ഒരു സ്വത്വമാണ്. ഡെമിസെക്ഷ്വാലിറ്റി പോലുള്ള സ്വത്വങ്ങളും ഈ ഗ്രേസെക്ഷ്വാലിറ്റിയുടെ ഭാഗമായി കണക്കാക്കാറുണ്ട്.
ജെൻ സിയിൽ തരംഗമാകുന്നതെന്തുകൊണ്ട്?
യുവതലമുറ അവരുടെ ലൈംഗിക സ്വത്വങ്ങളെക്കുറിച്ച് സംസാരിക്കാൻ കൂടുതൽ തുറന്ന സമീപനം സ്വീകരിക്കുന്നു എന്നതാണ് ഇതിന് പിന്നിലെ പ്രധാന കാരണം. സോഷ്യൽ മീഡിയ പ്ലാറ്റ്ഫോമുകളിലൂടെ ഈ വിഷയങ്ങൾ ചർച്ച ചെയ്യപ്പെടുന്നത് ഗ്രേസെക്ഷ്വൽ സ്വത്വത്തിന് വലിയ പ്രചാരം നൽകി.
ലൈംഗികത ഒരു കടമയല്ല എന്നും, ഓരോ വ്യക്തിയുടെയും അനുഭവം വ്യത്യസ്തമായിരിക്കും എന്നും ഇത് ഓർമ്മിപ്പിക്കുന്നു. ഇങ്ങനെയുള്ള അവസ്ഥ വരുന്നത് തങ്ങൾക്ക് 'തകരാർ ഉള്ളത് കൊണ്ടണോ' എന്ന ആശങ്കയെ ഇല്ലാതാക്കുകയും, സ്വന്തം സ്വത്വത്തെ തിരിച്ചറിയാൻ ഗ്രേസെക്ഷ്വാലിറ്റി എന്ന വാക്ക് പലർക്കും സഹായകമാകുകയും ചെയ്യുന്നു.
ഗ്രേസെക്ഷ്വാലിറ്റി എന്നത് പുതിയ ഒരു കാര്യമല്ലെങ്കിലും, ഇത് പൊതുസമൂഹത്തിൽ ചർച്ചയാവുകയും അംഗീകരിക്കപ്പെടുകയും ചെയ്യുന്നത് ഇയൊരു ജെൻ സി കാലഘട്ടത്തിലാണ്. ലിംഗ-ലൈംഗിക ന്യൂനപക്ഷങ്ങളെക്കുറിച്ചുള്ള നമ്മുടെ കാഴ്ചപ്പാടുകൾ കൂടുതൽ വികസിപ്പിക്കാൻ ഈ തുറന്ന സംവാദങ്ങൾ സഹായിക്കുന്നു.
